ਸ਼ਿਮਲਾ: 26 ਮਈ, ਦੇਸ਼ ਕਲਿੱਕ ਬਿਓਰੋ
ਬੀਤੇ ਕੱਲ੍ਹ ਐਤਵਾਰ ਨੂੰ ਸ਼ਿਮਲਾ ਵਿੱਚ ਹਿਮਾਚਲ ਪ੍ਰਦੇਸ਼ ਸਕੱਤਰੇਤ ਦੀ ਇਮਾਰਤ ਨੂੰ ਉਡਾਉਣ ਦੀ ਧਮਕੀ ਭਰੀ ਈ.ਮੇਲ ਆਈ। ਜਿਸ ਨਾਲ ਪ੍ਰਸ਼ਾਸ਼ਨ ਨੇ ਈਮੇਲ ਦੀ ਧਮਕੀ ਮਿਲਣ ਤੋਂ ਬਾਅਦ ਬੰਬ ਨਿਰੋਧਕ ਅਤੇ ਕੁੱਤਿਆਂ ਦੇ ਦਸਤੇ ਨੂੰ ਤੁਰੰਤ ਮੌਕੇ ‘ਤੇ ਭੇਜ ਦਿੱਤਾ ਗਿਆ। ਇੱਕ ਮਹੀਨੇ ਤੋਂ ਵੱਧ ਸਮੇਂ ਵਿੱਚ ਦੂਜੀ ਵਾਰ ਅਤੇ ਇਹ 16 ਅਪ੍ਰੈਲ ਤੋਂ ਬਾਅਦ ਰਾਜ ਵਿੱਚ ਛੇਵਾਂ ਝੂਠਾ ਬੰਬ ਈਮੇਲ ਸੀ।
ਅਧਿਕਾਰੀਆਂ ਦੇ ਅਨੁਸਾਰ, ਮੁੱਖ ਸਕੱਤਰ ਦੇ ਦਫ਼ਤਰ ਦੇ ਅਧਿਕਾਰਤ ਈਮੇਲ ਆਈਡੀ ‘ਤੇ ਈਮੇਲ ਪ੍ਰਾਪਤ ਹੁੰਦੇ ਹੀ, ਪੁਲਿਸ, ਬੰਬ ਦਸਤੇ ਅਤੇ ਕੁੱਤਿਆਂ ਦੇ ਦਸਤੇ ਦੀਆਂ ਟੀਮਾਂ ਸਕੱਤਰੇਤ ਭੇਜ ਦਿੱਤੀਆਂ ਗਈਆਂ। “ਟੀਮਾਂ ਨੇ ਪੂਰੀ ਇਮਾਰਤ ਦੀ ਚੰਗੀ ਤਰ੍ਹਾਂ ਤਲਾਸ਼ੀ ਲਈ। ਹਾਲਾਂਕਿ, ਕੁਝ ਵੀ ਇਤਰਾਜ਼ਯੋਗ ਨਹੀਂ ਮਿਲਿਆ। ਐਤਵਾਰ ਹੋਣ ਕਰਕੇ ਇਮਾਰਤ ਵਿੱਚ ਕੋਈ ਕਰਮਚਾਰੀ ਨਹੀਂ ਸੀ, ਪਰ ਫਿਰ ਵੀ, ਸਾਵਧਾਨੀ ਵਜੋਂ ਪੁਲਿਸ ਫੋਰਸ ਤਾਇਨਾਤ ਕੀਤੀ ਗਈ ਹੈ,” ਇੱਕ ਅਧਿਕਾਰੀ ਨੇ ਕਿਹਾ। ਐਤਵਾਰ ਨੂੰ ਈਮੇਲ ਬੰਬ ਦੀ ਧਮਕੀ ਹਿਮਾਚਲ ਪ੍ਰਦੇਸ਼ ਵਿੱਚ ਛੇਵੀਂ ਅਜਿਹੀ ਘਟਨਾ ਹੈ।
ਇਕੱਲੇ ਸਕੱਤਰੇਤ ਨੂੰ ਹੀ ਇਹ ਧਮਕੀ ਨਹੀਂ ਮਿਲੀ। ਇਸ ਤੋਂ ਪਹਿਲਾਂ ਜ਼ਿਲ੍ਹਿਆਂ ਦੇ ਪ੍ਰਸਾਸ਼ਨਕ ਦਫਤਰਾਂ ਨੂੰ ਵੀ ਉਡਾਉਣ ਦੀ ਧਮਕੀ ਮਿਲ ਚੱਕੀ ਹੈ।ਇਸ ਤੋਂ ਪਹਿਲਾਂ ਹਮੀਰਪੁਰ, ਮੰਡੀ, ਚੰਬਾ ਅਤੇ ਕੁੱਲੂ ਦੇ ਡਿਪਟੀ ਕਮਿਸ਼ਨਰ ਦਫ਼ਤਰਾਂ ਨੂੰ ਵੀ ਬੰਬ ਨਾਲ ਉਡਾਉਣ ਦੀਆਂ ਧਮਕੀਆਂ ਮਿਲੀਆਂ ਹਨ। ਇਨ੍ਹਾਂ ਸਾਰੇ ਮਾਮਲਿਆਂ ਵਿੱਚ ਈਮੇਲ ਜਾਂ ਚਿੱਠੀਆਂ ਰਾਹੀਂ ਧਮਕੀਆਂ ਦਿੱਤੀਆਂ ਗਈਆਂ ਸਨ ਪਰ ਤਲਾਸ਼ੀ ਦੌਰਾਨ ਕਿਤੇ ਵੀ ਕੋਈ ਵਿਸਫੋਟਕ ਸਮੱਗਰੀ ਨਹੀਂ ਮਿਲੀ।
