ਧਾਰਮਿਕ, ਸਮਾਜਿਕ, ਰਾਜਨੀਤਿਕ ਦੇ ਨਾਲ ਨਾਲ ਸਾਹਿਤਕ ਰੁਚੀਆਂ ਰੱਖਣ ਵਾਲੇ ਸ੍ਰੀ ਗੜੀ ਨੇ ਕਮੇਟੀ ਰੂਮ ‘ਚ ਪਤਵੰਤਿਆਂ ਨਾਲ ਕੀਤੀ ਮਿਲਣੀ
ਆਕਲੈਂਡ (ਨਿਊਜ਼ਲੈਂਡ), 28 ਜੁਲਾਈ, ਹਰਗੋਬਿੰਦ ਸਿੰਘ ਸ਼ੇਖਪੁਰੀਆ :
ਗੁਰਦੁਆਰਾ ਸ੍ਰੀ ਦਸ਼ਮੇਸ਼ ਦਰਬਾਰ ਸਾਹਿਬ ਪਾਪਾਟੋਏਟੋਏ ਆਕਲੈਂਡ ਵਿਖੇ ਪੰਜਾਬ ਦੇ ਐਸ ਸੀ ਕਮਿਸ਼ਨ ਦੇ ਚੇਅਰਮੈਨ ਸ਼੍ਰੀ ਜਸਵੀਰ ਸਿੰਘ ਗੜੀ ਨੇ ਨਤਮਸਤਕ ਹੋਣ ਉਪਰੰਤ ਕਮੇਟੀ ਰੂਮ ਵਿੱਚ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਚੇਅਰਮੈਨ ਸਰਦਾਰ ਪ੍ਰਿਥੀਪਾਲ ਸਿੰਘ ਬਸਰਾ ਸਮੇਤ ਕਮੇਟੀ ਮੈਂਬਰਾਂ, ਪਤਵੰਤਿਆਂ ਨਾਲ ਭਾਵਪੂਰਤ ਮਿਲਣੀ ਕੀਤੀ। ਇਸ ਮੌਕੇ ਗੱਲਬਾਤ ਕਰਦਿਆਂ ਉਹਨਾਂ ਦਸ਼ਮੇਸ਼ ਪਿਤਾ ਦੇ ਨਾਮ ਤੇ ਨਾਮ ਰੱਖੇ ਗੁਰਦੁਆਰਾ ਸ੍ਰੀ ਦਸ਼ਮੇਸ਼ ਦਰਬਾਰ ਸਾਹਿਬ ਵਿਖੇ ਆ ਕੇ ਅਤੇ ਪਤਵੰਤਿਆਂ ਨਾਲ ਮਿਲਣ ਨੂੰ ਆਪਣਾ ਸੁਭਾਗ ਮੰਨਦਿਆਂ ਧਾਰਮਿਕ ਸਮਾਜਿਕ ਰਾਜਨੀਤਿਕ ਵਿਚਾਰਾਂ ਦੀ ਸਾਂਝ ਪਾਈ।
ਪੰਜਾਬ ਵਿੱਚ ਬਦਲਾਵ ਦੇ ਨਾਮ ਤੇ ਆਈ ਆਪ ਸਰਕਾਰ ਦੀ ਕਾਰਗੁਜ਼ਾਰੀ ਬਾਰੇ ਗੱਲ ਕਰਦਿਆਂ ਉਹਨਾਂ ਕਿਹਾ ਕਿ 75 ਸਾਲਾਂ ਤੋਂ ਖਰਾਬ ਹੋਏ ਪ੍ਰਬੰਧ ਨੂੰ 75 ਮਹੀਨੇ ਤਾਂ ਲੋੜੀਦੇ ਹੀ ਹਨ ਨਾ ਕਿ ਸਿਰਫ 75 ਹਫਤਿਆਂ ਜਾਂ 75 ਘੰਟਿਆਂ ਵਿੱਚ ਕੋਈ ਵੀ ਸਰਕਾਰ ਇਸ ਨੂੰ ਠੀਕ ਤੇ ਦਰੁਸਤ ਕਰ ਸਕਦੀ ਹੈ। ਜਦੋਂ ਉਹਨਾਂ ਨੂੰ ਕਰੋਨਾ ਸਮੇਂ ਦੌਰਾਨ ਨਿਊਜ਼ੀਲੈਂਡ ਵਿੱਚ ਹੋਰਨਾਂ ਗੁਰਦੁਆਰਿਆਂ ਦੀ ਤਰ੍ਹਾਂ ਇਸ ਗੁਰਦੁਆਰਾ ਸਾਹਿਬ ਵਿੱਚ ਤੇ ਚੇਅਰਮੈਨ ਪ੍ਰਿਥੀਪਾਲ ਸਿੰਘ ਬਸਰਾ ਵੱਲੋਂ ਆਪਣੇ ਨਿੱਜੀ ਪੱਧਰ ਤੇ ਬਾਹਰੋਂ ਆਏ ਪੀੜਤ ਲੋਕਾਂ ਵਾਸਤੇ ਕੁਇਰਨਟਾਈਨ ਲਈ ਜਗ੍ਹਾ ਮੁਹੱਈਆ ਕਰਾਉਣ ਬਾਰੇ ਦੱਸਿਆ ਗਿਆ ਤਾਂ ਸ੍ਰੀ ਗੜੀ ਨੇ ਉਹਨਾਂ ਸਮੇਤ ਇਸ ਕੰਮ ਲਈ ਅਤੇ ਸਮੁੱਚੇ ਐਨਆਰਆਈ ਵੀਰਾਂ ਦਾ ਜਿੱਥੇ ਪੰਜਾਬ ਵਿੱਚ ਬਦਲਾਅ ਦੀ ਸਰਕਾਰ ‘ਚ ਅਹਿਮ ਰੋਲ ਅਦਾ ਕਰਨ ਲਈ ਧੰਨਵਾਦ ਕੀਤਾ, ਉੱਥੇ ਨਿਊਜ਼ੀਲੈਂਡ ਵਿੱਚ ਗੁਰਦੁਆਰਾ ਸਾਹਿਬਾਨਾਂ ਦੀਆਂ ਉਸਾਰੀਆਂ ਤੇ ਸਿੱਖ ਧਰਮ ਦੇ ਫੈਲਾਅ ਬਾਰੇ ਵੀ ਸਰਾਹਨਾ ਕੀਤੀ।
ਦੋ ਪੁਸਤਕਾਂ ਦੇ ਰਚੇਤਾ ਸ੍ਰੀ ਜਸਵੀਰ ਸਿੰਘ ਗੜੀ ਚੇਅਰਮੈਨ ਘੱਟ ਗਿਣਤੀ ਕਮਿਸ਼ਨ ਪੰਜਾਬ ਨੇ ਸਾਹਿਤਿਕਤਾ ਦੀ ਗੱਲ ਕਰਦਿਆਂ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦੇ 52 ਕਵੀਆਂ ਸਾਹਿਤਕਾਰਾਂ ਨੂੰ ਸਮਰਪਿਤ ਗੁਰੂ ਕਾਸ਼ੀ ਸਾਹਿਤ ਅਕਾਦਮੀ ਦਮਦਮਾ ਸਾਹਿਬ ਪੰਜਾਬ ਦੇ ਮੈਂਬਰ ਬਣਨ ਲਈ ਆਪਣੀ ਇੱਛਾ ਜਤਾਈ ਜਿਸ ਤੇ ਅਕਾਦਮੀ ਸੰਸਥਾਪਕ ਪ੍ਰਧਾਨ ਹਰਗੋਬਿੰਦ ਸਿੰਘ ਸ਼ੇਖਪੁਰੀਆ ਨੇ ਉਹਨਾਂ ਦੀ ਇਸ ਇੱਛਾ ਜਤਾਈ ਦਾ ਖੈਰ ਮਕਦਮ ਕੀਤਾ।
ਇਸ ਮਿਲਣੀ ਮੀਟਿੰਗ ਵਿੱਚ ਚੇਅਰਮੈਨ ਪ੍ਰਿਥੀਪਾਲ ਸਿੰਘ ਬਸਰਾ, ਉਪ ਚੇਅਰਮੈਨ ਬੇਅੰਤ ਸਿੰਘ ਜਡੌਰ, ਪ੍ਰਧਾਨ ਮਨਜੀਤ ਸਿੰਘ ਬਾਠ, ਮੀਤ ਪ੍ਰਧਾਨ ਪਰਗਣ ਸਿੰਘ ਫਿਜੀ, ਖਜਾਨਚੀ ਕੁਲਵਿੰਦਰ ਸਿੰਘ ਬਾਠ, ਸਾਬਕਾ ਐਮਪੀ ਮਹੇਸ਼ ਬਿੰਦਰਾ, ਡਾ ਕੁਲਦੀਪ ਕੁਮਾਰ ਖੁੱਲਰ, ਰਵੀ ਇੰਦਰ ਸਿੰਘ ਵਿਰਕ, ਅਜੀਤ ਸਿੰਘ ਪਰਮਾਰ, ਰੇਸ਼ਮ ਸਿੰਘ, ਮੱਖਣ ਸਿੰਘ, ਹਰਿਮੰਦਰ ਸਿੰਘ ਬਰਾੜ, ਤਸਵੀਰ ਅਖਬਾਰ ਦੇ ਮੁੱਖ ਸੰਪਾਦਕ ਨਰਿੰਦਰ ਕੁਮਾਰ ਸਿੰਗਲਾ, ਰਾਜਿੰਦਰ ਪਾਲ ਸਿੰਘ ਬਾਜਵਾ, ਬਿੱਲਾ ਢਿੱਲੋਂ, ਜਗਜੀਤ ਸਿੰਘ ਜੁਨੇਜਾ, ਦਾਰਾ ਸਿੰਘ, ਸ੍ਰੀ ਗੜੀ ਦੇ ਨਾਲ ਆਏ ਉਹਨਾਂ ਦੇ ਭਰਾਤਾ ਆਸ਼ੂ ਗੜੀ ਅਤੇ ਕੁਲਵਿੰਦਰ ਸਿੰਘ ਝਮਟ ਕਿਉ ਐਸ ਐਮ, ਸ੍ਰੀ ਕੀਲਾਰੀ, ਤਿਰਲੋਚਨ ਸਿੰਘ ਅਤੇ ਅਜੀਤ ਰਾਮ, ਪੀਐਨਬੀ ਬੈਂਕ ਪੰਜਾਬ ਤੋਂ ਮੈਨੇਜਰ ਸਮੇਤ ਪਤਵੰਤੇ ਹਾਜਰ ਸਨ।