ਡਬਲਿਨ, 6 ਅਗਸਤ, ਦੇਸ਼ ਕਲਿਕ ਬਿਊਰੋ :
ਆਇਰਲੈਂਡ ਦੀ ਰਾਜਧਾਨੀ ਡਬਲਿਨ ਤੋਂ ਇਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ 23 ਸਾਲਾਂ ਤੋਂ ਰਹਿ ਰਿਹਾ ਇੱਕ ਪੰਜਾਬੀ ਮੂਲ ਦਾ ਟੈਕਸੀ ਡਰਾਈਵਰ ਨਸਲੀ ਹਮਲੇ ਦਾ ਸ਼ਿਕਾਰ ਹੋ ਗਿਆ। ਹਮਲਾਵਰਾਂ ਨੇ ਉਸਨੂੰ ਮਾਰਦੇ ਸਮੇਂ ਚੀਕ ਕੇ ਕਿਹਾ, “ਆਪਣੇ ਦੇਸ਼ ਵਾਪਸ ਜਾਓ”।
ਪੁਲਿਸ ਨੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੀੜਤ ਦਾ ਨਾਮ ਲਖਵੀਰ ਸਿੰਘ (ਉਮਰ 40 ਸਾਲ) ਹੈ। ਉਸ ਨੇ ਸਥਾਨਕ ਮੀਡੀਆ ਨੂੰ ਦੱਸਿਆ ਕਿ ਰਾਤ ਨੂੰ ਉਸ ਨੇ 20 ਸਾਲ ਦੇ ਦੋ ਨੌਜਵਾਨਾਂ ਨੂੰ ਟੈਕਸੀ ਵਿਚ ਬਿਠਾਇਆ ਅਤੇ ਉਨ੍ਹਾਂ ਨੂੰ ਡਬਲਿਨ ਦੇ ਬਾਲੀਮੋਨ ਇਲਾਕੇ ਦੇ ਪੋਪਿਨਟਰੀ ਛੱਡਣ ਗਿਆ।
ਪਰ, ਮੰਜ਼ਿਲ ’ਤੇ ਪਹੁੰਚਣ ਦੇ ਤੁਰੰਤ ਬਾਅਦ ਦੋਵਾਂ ਨੌਜਵਾਨਾਂ ਨੇ ਕਾਰ ਦਾ ਦਰਵਾਜ਼ਾ ਖੋਲ੍ਹਿਆ ਅਤੇ ਬੋਤਲ ਨਾਲ ਲਖਵੀਰ ਦੇ ਸਿਰ ’ਤੇ ਦੋ ਵਾਰ ਵਾਰ ਕੀਤਾ। ਹਮਲੇ ਤੋਂ ਬਾਅਦ ਉਹ ਭੱਜਦੇ ਹੋਏ ਚੀਕ ਰਹੇ ਸਨ – “ਆਪਣੇ ਦੇਸ਼ ਵਾਪਸ ਜਾਓ।”
ਲਖਵੀਰ ਸਿੰਘ ਨੇ ਦੱਸਿਆ ਕਿ ਮੈਂ ਪਿਛਲੇ 10 ਸਾਲਾਂ ਵਿਚ ਕਦੇ ਵੀ ਅਜਿਹਾ ਨਹੀਂ ਦੇਖਿਆ। ਮੈਂ ਹੁਣ ਬਹੁਤ ਡਰਿਆ ਹੋਇਆ ਹਾਂ। ਇਸ ਕਰਕੇ ਟੈਕਸੀ ਚਲਾਉਣਾ ਬੰਦ ਕਰ ਦਿੱਤਾ ਹੈ। ਸੜਕ ’ਤੇ ਵਾਪਸ ਜਾਣਾ ਮੇਰੇ ਲਈ ਬਹੁਤ ਮੁਸ਼ਕਲ ਹੋਵੇਗਾ। ਮੇਰੇ ਬੱਚੇ ਵੀ ਇਸ ਘਟਨਾ ਤੋਂ ਬਾਅਦ ਡਰੇ ਹੋਏ ਹਨ।
