ਚੰਡੀਗੜ੍ਹ, 28 ਜਨਵਰੀ: ਦੇਸ਼ ਕਲਿੱਕ ਬਿਊਰੋ:
ਚੰਡੀਗੜ੍ਹ ਦੇ ਕਈ ਸਰਕਾਰੀ ਅਤੇ ਨਿੱਜੀ ਸਕੂਲਾਂ ਨੂੰ ਬੁੱਧਵਾਰ ਸਵੇਰੇ ਧਮਕੀ ਭਰੇ ਈਮੇਲ ਮਿਲੇ। ਜਿਸ ‘ਚ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਗਈ। ਇਸ ਬਾਰੇ ਪਤਾ ਲੱਗਣ ‘ਤੇ ਸਕੂਲ ਪ੍ਰਬੰਧਕ ਘਬਰਾ ਗਏ। ਪ੍ਰਬੰਧਕਾਂ ਨੇ ਪੁਲਿਸ ਨੂੰ ਸੂਚਿਤ ਕੀਤਾ, ਅਤੇ ਬਾਅਦ ਵਿੱਚ ਸਾਰੇ ਸਕੂਲ ਬੰਦ ਕਰ ਦਿੱਤੇ ਗਏ। ਸੂਚਨਾ ਮਿਲਦੇ ਹੀ ਬੰਬ ਖੋਜ ਟੀਮਾਂ ਅਤੇ ਪੁਲਿਸ ਦੀਆਂ ਗੱਡੀਆਂ ਸਕੂਲਾਂ ਵਿੱਚ ਪਹੁੰਚੀਆਂ, ਬੱਚਿਆਂ ਨੂੰ ਸਕੂਲਾਂ ‘ਚੋਂ ਬਾਹਰ ਸੁਰੱਖਿਅਤ ਕੱਢ ਕੇ ਇਮਾਰਤਾਂ ਦੀ ਤਲਾਸ਼ੀ ਸ਼ੁਰੂ ਕਰ ਦਿੱਤੀ ਗਈ।
ਧਮਕੀਆਂ ਮਿਲਣ ਵਾਲੇ ਸਕੂਲਾਂ ਵਿੱਚ ਸੈਕਟਰ 16, 19, 22 ਅਤੇ 47 ਦੇ ਸਰਕਾਰੀ ਸਕੂਲ, ਸੈਕਟਰ 49 ਵਿੱਚ ਰਿਆਨ ਸਕੂਲ, ਸੈਕਟਰ 45 ਵਿੱਚ ਸੇਂਟ ਸਟੀਫਨ ਸਕੂਲ, ਸੈਕਟਰ 27 ਵਿੱਚ ਭਵਨ ਵਿਦਿਆਲਾ, ਸੈਕਟਰ 46 ਵਿੱਚ ਆਸ਼ਿਆਨਾ, ਸੈਕਟਰ 33 ਵਿੱਚ ਟੈਂਡਰ ਹਾਰਟ, ਸੈਕਟਰ 32 ਵਿੱਚ ਐਸਡੀ, ਸੈਕਟਰ 44 ਵਿੱਚ ਸੇਂਟ ਜ਼ੇਵੀਅਰ, ਸੈਕਟਰ 38 ਵਿੱਚ ਵਿਵੇਕ ਅਤੇ ਸੈਕਟਰ 7 ਵਿੱਚ ਕੇਬੀ ਡੀਏਵੀ ਸਕੂਲ ਸ਼ਾਮਲ ਹਨ।
ਦੱਸਿਆ ਜਾ ਰਿਹਾ ਹੈ ਕਿ ਧਮਕੀ ਭਰੇ ਈਮੇਲ ਸਵੇਰੇ 5:21 ਵਜੇ ਆਏ ਸੀ। ਇਹ ਵੀ ਦੱਸਿਆ ਜਾ ਰਿਹਾ ਹੈ ਕਿ ਪੁਲਿਸ ਕੰਟਰੋਲ ਰੂਮ ਸਕੂਲਾਂ ਤੋਂ ਧਮਕੀ ਭਰੇ ਈਮੇਲਾਂ ਬਾਰੇ ਲਗਾਤਾਰ ਪੁੱਛਗਿੱਛ ਕਰ ਰਿਹਾ ਹੈ। ਹੁਣ ਤੱਕ, 15 ਸਕੂਲਾਂ ਨੇ ਧਮਕੀਆਂ ਮਿਲਣ ਦੀ ਰਿਪੋਰਟ ਦਿੱਤੀ ਹੈ। ਪੁਲਿਸ ਨੂੰ ਲਗਭਗ ਹਰ ਮਿੰਟ ਵਿੱਚ ਇੱਕ ਕਾਲ ਆ ਰਹੀ ਹੈ।
ਦੱਸ ਦਈਏ ਕਿ ਚੰਡੀਗੜ੍ਹ ਵਿੱਚ ਬੰਬ ਦੀਆਂ ਧਮਕੀਆਂ ਵਾਰ-ਵਾਰ ਰਿਪੋਰਟ ਕੀਤੀਆਂ ਜਾ ਰਹੀਆਂ ਹਨ। ਇਸ ਤੋਂ ਪਹਿਲਾਂ, ਹਾਈ ਕੋਰਟ ਨੂੰ ਦੋ ਵਾਰ, ਜ਼ਿਲ੍ਹਾ ਅਦਾਲਤ ਨੂੰ ਦੋ ਵਾਰ, ਹੋਟਲ ਲਲਿਤ, ਹੋਟਲ ਹਯਾਤ ਅਤੇ ਸੈਕਟਰ 10 ਮਿਊਜ਼ੀਅਮ ਨੂੰ ਵੀ ਧਮਕੀਆਂ ਮਿਲੀਆਂ ਹਨ। ਪੁਲਿਸ ਕਿਸੇ ਵੀ ਮਾਮਲੇ ਦਾ ਪਤਾ ਨਹੀਂ ਲਗਾ ਸਕੀ ਹੈ।