ਫਰਾਂਸ ਦੇ ਮਸ਼ਹੂਰ ਮਿਊਜ਼ੀਅਮ ‘ਚੋਂ ਨੈਪੋਲੀਅਨ ਦੇ ਬੇਸ਼ਕੀਮਤੀ ਗਹਿਣੇ ਚੋਰੀ

ਪੈਰਿਸ, 20 ਅਕਤੂਬਰ, ਦੇਸ਼ ਕਲਿਕ ਬਿਊਰੋ :
ਫਰਾਂਸ ਦੇ ਪੈਰਿਸ ਵਿੱਚ ਸਥਿਤ ਮਸ਼ਹੂਰ ਲੂਵਰ ਮਿਊਜ਼ੀਅਮ ਵਿੱਚ ਚੋਰੀ ਹੋਈ ਹੈ। ਸੱਭਿਆਚਾਰ ਮੰਤਰੀ ਰਸ਼ੀਦਾ ਦਾਤੀ ਨੇ ਦੱਸਿਆ ਕਿ ਚੋਰ ਗਹਿਣੇ ਲੈ ਕੇ ਫਰਾਰ ਹੋ ਗਏ। ਉਨ੍ਹਾਂ ਨੇ X ‘ਤੇ ਲਿਖਿਆ, “ਲੂਵਰ ਮਿਊਜ਼ੀਅਮ ਵਿੱਚ ਖੁੱਲ੍ਹਦਿਆਂ ਹੀ ਚੋਰੀ ਹੋਈ।” ਇਹ ਦੁਨੀਆ ਦੇ ਸਭ ਤੋਂ ਵੱਡੇ ਅਜਾਇਬ ਘਰਾਂ ਵਿੱਚੋਂ ਇੱਕ ਹੈ।
ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਪੇਸ਼ੇਵਰ ਚੋਰ ਕੰਧ ‘ਤੇ ਚੜ੍ਹ ਕੇ ਅਜਾਇਬ ਘਰ ਵਿੱਚ ਦਾਖਲ ਹੋਏ, ਡਿਸਕ ਕਟਰ ਨਾਲ ਇੱਕ ਖਿੜਕੀ ਕੱਟ ਦਿੱਤੀ, ਅਤੇ ਸਿਰਫ ਚਾਰ ਮਿੰਟਾਂ ਵਿੱਚ ਨੈਪੋਲੀਅਨ ਅਤੇ ਮਹਾਰਾਣੀ ਜੋਸਫਾਈਨ ਨਾਲ ਸਬੰਧਤ ਨੌਂ ਅਨਮੋਲ ਗਹਿਣੇ ਚੋਰੀ ਕਰ ਲਏ।
ਚੋਰੀ ਹੋਏ ਗਹਿਣਿਆਂ ਵਿੱਚ 1855 ਵਿੱਚ ਬਣਿਆ ਇਤਿਹਾਸਕ ਯੂਜੀਨੀ ਕਰਾਊਨ ਸ਼ਾਮਲ ਹੈ ਅਤੇ ਉਸ ‘ਤੇ ਹਜ਼ਾਰਾਂ ਕੀਮਤੀ ਰਤਨ ਜੜੇ ਹੋਏ ਸਨ। ਇਸ ਤਾਜ ਦੇ ਕੁਝ ਹਿੱਸੇ ਟੁੱਟੇ ਹੋਏ ਮਿਲੇ ਸਨ, ਅਤੇ ਇਹ ਮੰਨਿਆ ਜਾ ਰਿਹਾ ਹੈ ਕਿ ਇਹ ਚੋਰੀ ਦੌਰਾਨ ਟੁੱਟਿਆ ਹੋ ਸਕਦਾ ਹੈ।
ਚੋਰੀ ਤੋਂ ਬਾਅਦ ਅਜਾਇਬ ਘਰ ਨੂੰ ਪੂਰੇ ਦਿਨ ਲਈ ਬੰਦ ਕਰਨ ਦਾ ਐਲਾਨ ਕੀਤਾ। ਫਰਾਂਸ ਦੇ ਗ੍ਰਹਿ ਮੰਤਰੀ ਲੌਰੇਂਟ ਨੁਨੇਜ਼ ਨੇ ਇਸ ਘਟਨਾ ਨੂੰ ਸਭ ਤੋਂ ਵੱਡੀਆਂ ਡਕੈਤੀਆਂ ਵਿੱਚੋਂ ਇੱਕ ਦੱਸਿਆ। ਮੰਤਰਾਲੇ ਨੇ ਇੱਕ ਬਿਆਨ ਵਿੱਚ ਕਿਹਾ, “ਜਾਂਚ ਸ਼ੁਰੂ ਹੋ ਗਈ ਹੈ ਅਤੇ ਚੋਰੀ ਹੋਈਆਂ ਚੀਜ਼ਾਂ ਦੀ ਸੂਚੀ ਤਿਆਰ ਕੀਤੀ ਜਾ ਰਹੀ ਹੈ।”