ਮੁੰਬਈ, 26 ਨਵੰਬਰ: ਦੇਸ਼ ਕਲਿੱਕ ਬਿਊਰੋ :
ਕਾਮੇਡੀਅਨ ਕੁਨਾਲ ਕਾਮਰਾ ਇੱਕ ਵਾਰ ਫਿਰ ਵਿਵਾਦਾਂ ਵਿੱਚ ਘਿਰ ਗਏ ਹਨ। ਟੀ-ਸ਼ਰਟ ਪਹਿਨੇ ਉਨ੍ਹਾਂ ਦੀ ਇੱਕ ਫੋਟੋ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਹੈ। ਟੀ-ਸ਼ਰਟ ‘ਤੇ ਇੱਕ ਕੁੱਤੇ ਦੀ ਫੋਟੋ ਹੈ ਅਤੇ ਨਾਲ ਹੀ “RSS” ਅੱਖਰ ਲਿਖੇ ਹੋਏ ਹਨ ਹੈ। ਹਾਲਾਂਕਿ, ਪੂਰਾ “R” ਸਾਫ਼ ਦਿਖਾਈ ਨਹੀਂ ਦੇ ਰਿਹਾ ਹੈ, ਜਿਸ ਕਾਰਨ ਬਹੁਤ ਸਾਰੇ ਲੋਕ ਇਸਨੂੰ “PSS” ਸਮਝਦੇ ਹਨ।
ਕਾਮਰਾ ਨੇ ਇਹ ਫੋਟੋ ਸੋਮਵਾਰ, 24 ਨਵੰਬਰ ਨੂੰ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤੀ ਸੀ। ਜੋ ਕਿ ਹੁਣ ਵਾਇਰਲ ਹੋ ਰਹੀ ਹੈ। ਕਾਮਰਾ ਨੇ ਪੋਸਟ ਵਿੱਚ ਲਿਖਿਆ, “ਇਹ ਫੋਟੋ ਕਿਸੇ ਕਾਮੇਡੀ ਕਲੱਬ ਦੀ ਨਹੀਂ ਹੈ।” ਮਾਰਚ ਦੇ ਸ਼ੁਰੂ ਵਿੱਚ, ਕਾਮਰਾ ਨੇ ਇੱਕ ਕਾਮੇਡੀ ਕਲੱਬ ਵਿੱਚ ਮਹਾਰਾਸ਼ਟਰ ਦੇ ਉਪ ਮੁੱਖ ਮੰਤਰੀ ਬਾਰੇ ਇੱਕ ਪੈਰੋਡੀ ਗੀਤ ਗਾਇਆ ਸੀ। ਇਸ ਤੋਂ ਬਾਅਦ, ਸ਼ਿਵ ਸੈਨਾ ਦੁਆਰਾ ਕਲੱਬ ਦੀ ਭੰਨਤੋੜ ਕੀਤੀ ਗਈ ਸੀ।
ਭਾਜਪਾ ਅਤੇ ਸ਼ਿਵ ਸੈਨਾ ਦੇ ਆਗੂਆਂ ਨੇ ਟੀ-ਸ਼ਰਟ ‘ਤੇ ਲਿਖੇ ਟੈਕਸਟ ਅਤੇ ਡਿਜ਼ਾਈਨ ‘ਤੇ ਸਖ਼ਤ ਇਤਰਾਜ਼ ਜਤਾਇਆ ਹੈ। ਦੋਵਾਂ ਪਾਰਟੀਆਂ ਦਾ ਦੋਸ਼ ਹੈ ਕਿ ਕਾਮਰਾ ਨੇ ਟੀ-ਸ਼ਰਟ ਰਾਹੀਂ ਆਰਐਸਐਸ ਦਾ ਮਜ਼ਾਕ ਉਡਾਉਣ ਦੀ ਕੋਸ਼ਿਸ਼ ਕੀਤੀ। ਪੁਲਿਸ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜੇਕਰ ਲੋੜ ਪਈ ਤਾਂ ਕਾਰਵਾਈ ਕੀਤੀ ਜਾਵੇਗੀ।
ਸ਼ਿਵ ਸੈਨਾ (ਸ਼ਿੰਦੇ ਧੜੇ) ਦੇ ਮੰਤਰੀ ਸੰਜੇ ਸ਼ਿਰਸਾਤ ਨੇ ਕਿਹਾ ਕਿ ਆਰਐਸਐਸ ਨੂੰ ਇਸ ਦਾ ਸਖ਼ਤ ਜਵਾਬ ਦੇਣਾ ਚਾਹੀਦਾ ਹੈ। ਕਾਮਰਾ ਪਹਿਲਾਂ ਵੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਮਹਾਰਾਸ਼ਟਰ ਦੇ ਉਪ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਵਿਰੁੱਧ ਕਈ ਵਾਰ ਤਿੱਖੀਆਂ ਟਿੱਪਣੀਆਂ ਕਰ ਚੁੱਕੇ ਹਨ।