ਪਟਨਾ, 28 ਅਪ੍ਰੈਲ, ਦੇਸ਼ ਕਲਿਕ ਬਿਊਰੋ :
ਬਿਹਾਰ ‘ਚ ਗੋਪਾਲਗੰਜ ਤੋਂ ਸੁਪੌਲ ਜਾ ਰਹੀਆਂ ਸੁਰੱਖਿਆ ਬਲਾਂ ਦੀਆਂ ਤਿੰਨ ਬੱਸਾਂ ਹਾਦਸੇ ਦਾ ਸ਼ਿਕਾਰ ਹੋ ਗਈਆਂ। ਇਸ ਹਾਦਸੇ ਵਿੱਚ ਬੱਸ ਡਰਾਈਵਰ ਅਤੇ ਦੋ ਕਾਂਸਟੇਬਲਾਂ ਦੀ ਮੌਤ ਹੋ ਗਈ। 12 ਤੋਂ ਵੱਧ ਜਵਾਨ ਗੰਭੀਰ ਜ਼ਖ਼ਮੀ ਹੋ ਗਏ। ਇਹ ਘਟਨਾ ਜ਼ਿਲ੍ਹੇ ਦੇ ਸਿੱਧਵਾਲੀਆ ਥਾਣਾ ਖੇਤਰ ਦੇ ਬਰਹਿਮਾ ਮੋੜ ਨੇੜੇ ਐਨਐਚ-27 ਨੇੜੇ ਵਾਪਰੀ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਸਿਹਤ ਵਿਭਾਗ ਨੇ ਪੰਜ ਐਂਬੂਲੈਂਸਾਂ ਅਤੇ ਡਾਕਟਰਾਂ ਦੀ ਟੀਮ ਨੂੰ ਮੌਕੇ 'ਤੇ ਭੇਜਿਆ।ਹਾਦਸੇ ਤੋਂ ਬਾਅਦ ਸਦਰ ਹਸਪਤਾਲ ਨੂੰ ਅਲਰਟ ਕਰ ਦਿੱਤਾ ਗਿਆ ਅਤੇ ਜ਼ਖਮੀਆਂ ਨੂੰ ਐਂਬੂਲੈਂਸ ਰਾਹੀਂ ਇਲਾਜ ਲਈ ਹਸਪਤਾਲ ਲਿਆਂਦਾ ਜਾ ਰਿਹਾ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਚੋਣ ਡਿਊਟੀ ਲਈ ਪੁਲਿਸ ਲਾਈਨ ਤੋਂ ਤਿੰਨ ਬੱਸਾਂ ਵਿੱਚ 242 ਪੁਰਸ਼ ਅਤੇ ਮਹਿਲਾ ਜ਼ਿਲ੍ਹਾ ਫੋਰਸ ਦੇ ਮੁਲਾਜ਼ਮ ਸੁਪੌਲ ਜਾ ਰਹੇ ਸਨ। ਜਦੋਂ ਇਹ ਹਾਦਸਾ ਵਾਪਰਿਆ ਤਾਂ ਸਿੱਧਵਲੀਆ ਥਾਣਾ ਬਰਹਿਮਾ ਵਿਖੇ ਪੁੱਜੇ ਸਨ। ਰਸਤੇ ਵਿੱਚ ਬਰਹਿਮਾ ਮੋੜ ਨੇੜੇ ਬੱਸ ਰੋਕ ਕੇ ਨਾਸ਼ਤਾ ਕਰ ਰਹੇ ਸਨ ਕਿ ਪਿੱਛੋਂ ਆ ਰਹੇ ਇੱਕ ਤੇਜ਼ ਰਫ਼ਤਾਰ ਕੰਟੇਨਰ ਨੇ ਉਨ੍ਹਾਂ ਨੂੰ ਟੱਕਰ ਮਾਰ ਦਿੱਤੀ। ਇਸ ਹਾਦਸੇ ਵਿੱਚ ਅਸ਼ੋਕ ਓਰਾਉਂ, ਦਿਗਵਿਜੇ ਕੁਮਾਰ ਅਤੇ ਪਵਨ ਮਹਤੋ ਦੀ ਮੌਤ ਹੋ ਗਈ।ਦਰਜਨ ਤੋਂ ਵੱਧ ਪੁਲੀਸ ਮੁਲਾਜ਼ਮ ਗੰਭੀਰ ਜ਼ਖ਼ਮੀ ਹਨ।