ਪੰਜਾਬ ਵਿੱਚ ਭਾਵੇ ਹਾਈਕੋਰਟ ਵੱਲੋਂ ਸੜਕਾਂ ਦੇ ਆਲੇ ਦੁਆਲੇ, ਬੱਸ ਅੱਡਿਆਂ, ਚੌਂਕਾਂ, ਸਰਕਾਰੀ ਅਦਾਰਿਆਂ ਅਤੇ ਹੋਰ ਕਈ ਵਰਜਿਤ ਸਥਾਨਾਂ 'ਤੇ ਫਲੈਕਸ ਬੋਰਡ ਲਾਉਣ 'ਤੇ ਪਾਬੰਦੀ ਹੈ, ਕਿਉ ਜੋ ਆਉਣ ਜਾਣ ਵਾਲੇ ਵਾਹਨ ਚਾਲਕ ਇਨ੍ਹਾਂ ਫਲੈਕਸ ਬੋਰਡਾਂ ਦੀ ਚਕਾਚੌਂਧ ਵੇਖਦਿਆਂ ਗੱਡੀ ਚਲਾਉਣ ਸਮੇਂ ਸੰਤੁਲਨ ਗੁਆ ਬੈਠਦੇ ਹਨ, ਜਿਸ ਕਾਰਨ ਵਾਹਨ ਹਾਦਸਿਆਂ ਦਾ ਸ਼ਿਕਾਰ ਹੋ ਜਾਂਦੇ ਹਨ।ਇਸ ਸਬੰਧੀ ਭਾਵੇਂ ਨਗਰ ਕੌਂਸਲ ਮੋਰਿੰਡਾ ਵੱਲੋਂ ਵੀ ਕਈ ਵਾਰ ਬੋਰਡ ਉਤਾਰੇ ਜਾ ਚੁੱਕੇ ਹਨ, ਪ੍ਰੰਤੂ ਫਿਰ ਵੀ ਕੁਝ ਅਸਰ ਰਸੂਖ ਵਾਲੇ ਵਿਅਕਤੀ, ਧਾਰਮਿਕ ਜਥੇਬੰਦੀਆਂ ਦੇ ਅਹੁਦੇਦਾਰ ਸੜਕਾਂ ਦੇ ਨਾਲ, ਚੌਂਕਾਂ ਵਿਚ ਲਗਾਤਾਰ ਬੋਰਡ ਲਗਾ ਕੇ ਨਿਯਮਾਂ ਦੀਆਂ ਧੱਜੀਆਂ ਉਡਾ ਰਹੇ ਹਨ।
ਇਸਦੀ ਜਾਣਕਾਰੀ ਦਿੰਦਿਆਂ ਮਿਲਕ ਪਲਾਂਟ ਮੋਹਾਲੀ ਦੇ ਸਾਬਕਾ ਚੇਅਰਮੈਨ ਪਰਮਿੰਦਰ ਸਿੰਘ ਚਲਾਕੀ, ਸਾਬਕਾ ਕੌਂਸਲਰ ਜਗਪਾਲ ਸਿੰਘ ਜੌਲੀ, ਅਕਾਲੀ ਦਲ ਦੀ ਜਨਰਲ ਕੌਂਸਲ ਦੇ ਮੈਂਬਰ ਜੁਗਰਾਜ ਸਿੰਘ ਮਾਨਖੇੜੀ,ਰਣਧੀਰ ਸਿੰਘ ਚੱਕਲ ਜਿਲਾ ਪ੍ਰਧਾਨ ,ਲੱਖੀ ਸ਼ਾਹ, ਬਹਾਦਰ ਸਿੰਘ ਢੰਗਰਾਲੀ, ਹਰਬੰਸ ਸਿੰਘ ਦਤਾਰਪੁਰ, ਸੁਖਦੀਪ ਸਿੰਘ ਭੰਗੂ, ਅਤੇ ਮੋਨੂੰ ਖਾਨ ਨੇ ਕਿਹਾ ਕਿ ਮਾਣਯੋਗ ਹਾਈਕੋਰਟ ਵਲੋਂ ਜਾਰੀ ਆਦੇਸ਼ਾਂ ਉਪਰੰਤ ਪੰਜਾਬ ਸਰਕਾਰ ਵੱਲੋ ਸੂਬੇ ਦੀਆਂ ਸਾਰੀਆਂ ਨਗਰ ਕੌਂਸਲਾਂ ਨੂੰ ਸਪੱਸ਼ਟ ਹਦਾਇਤਾਂ ਦਿੱਤੀਆਂ ਗਈਆਂ ਹਨ, ਕਿ ਮੁੱਖ ਮਾਰਗਾਂ ਦੇ ਆਸੇ-ਪਾਸੇ ਲੱਗੇ ਖੰਭਿਆਂ ਜਾਂ ਹੋਰ ਸਰਕਾਰੀ ਥਾਵਾਂ ਤੇ ਜੋ ਇਸ਼ਤਿਹਾਰਬਾਜੀ ਵਾਲੇ ਫਲੈਕਸ ਬੋਰਡ ਅਤੇ ਹੋਰਡਿੰਗ ਆਦਿ ਬਿਲਕੁਲ ਨਹੀਂ ਲੱਗਣੇ ਚਾਹੀਦੇ। ਪ੍ਰੰਤੂ ਸਥਾਨਕ ਨਗਰ ਕੌਂਸਲ ਵਲੋਂ ਮਾਣਯੋਗ ਹਾਈਕੋਰਟ ਤੇ ਪੰਜਾਬ ਸਰਕਾਰ ਦੀਆਂ ਹਦਾਇਤਾਂ ਨੂੰ ਅਣਗੌਲਿਆਂ ਕੀਤਾ ਜਾ ਰਿਹਾ ਹੈ। ਸ੍ਰੀ ਚਲਾਕੀ ਨੇ ਕਿਹਾ ਕਿ ਦੇਸ਼ ਭਰ ਵਿੱਚ ਲੋਕ ਸਭਾ ਚੋਣਾਂ ਦੀ ਪ੍ਰਕਿਰਿਆ ਚੱਲਣ ਕਾਰਨ ਕਾਨੂੰਨ ਦੀ ਰਾਖੀ ਕਰਨ ਲਈ ਸਾਰੇ ਅਧਿਕਾਰ ਅਤੇ ਤਾਕਤਾਂ ਦੇਸ਼ ਦੇ ਚੋਣ ਕਮਿਸ਼ਨਰ ਕੋਲ ਹਨ। ਪ੍ਰੰਤੂ ਫਿਰ ਵੀ ਸ਼ਹਿਰ ਦੀਆਂ ਵੱਖ-ਵੱਖ ਸੜਕਾਂ ਉੱਪਰ ਇਹ ਫਲੈਕਸ ਬੋਰਡ ਤੇ ਹੋਰਡਿੰਗਸ ਬਹੁਤ ਥਾਵਾਂ ਤੇ ਲੱਗੇ ਹੋਏ ਹਨ। ਇਸੇ ਤਰਾਂ ਦੇ ਫਲੈਕਸ ਬੋਰਡ ਮੋਰਿੰਡਾ ਦੇ ਕਾਈਨੌਰ ਚੌਂਕ, ਮਹਾਰਾਣਾ ਪ੍ਰਤਾਪ ਚੌਂਕ, ਵੇਰਕਾ ਚੌਂਕ ਅਤੇ ਸ੍ਰੀ ਚਮਕੌਰ ਸਾਹਿਬ ਚੌਕ ਵਿੱਚ ਹਮੇਸ਼ਾ ਹੀ ਲੱਗੇ ਰਹਿੰਦੇ ਹਨ। ਜਿਸ ਕਾਰਨ ਇਨਾਂ ਚੌਂਕਾਂ ਵਿਚ ਜਿੱਥੇ ਆਵਾਜਾਈ ਪ੍ਰਭਾਵਿਤ ਹੁੰਦੀ ਹੈ ਉੱਥੇ ਹੀ ਵਾਹਨਾਂ ਚਾਲਕਾਂ ਦਾ ਧਿਆਨ ਭਟਕਦਾ ਹੈ , ਤੇ ਹਾਦਸੇ ਵਾਪਰ ਜਾਂਦੇ ਹਨ, ਜਿਨਾਂ ਵਿੱਚ ਕਈ ਵਾਰੀ ਕੀਮਤੀ ਜਿੰਦਗੀਆਂ ਦਾ ਵੀ ਨੁਕਸਾਨ ਹੋ ਚੁੱਕਾ ਹੈ। ਉਪਰੋਕਤ ਆਗੂਆਂ ਨੇ ਡਿਪਟੀ ਕਮਿਸ਼ਨਰ ਰੂਪਨਗਰ ਤੋਂ ਮੰਗ ਕੀਤੀ ਹੈ ਕਿ ਸੜਕਾਂ ’ਤੇ ਲੱਗੇ ਇਹਨਾਂ ਫਲੈਕਸ ਬੋਰਡਾਂ ਨੂੰ ਛੇਤੀ ਤੋਂ ਛੇਤੀ ਉਤਾਰਿਆ ਜਾਵੇ ਤਾਂ ਜੋ ਕਿਸੇ ਵੱਡੇ ਹਾਦਸੇ ਤੋ ਬਚਿਆ ਜਾ ਸਕੇ ।
ਉੱਧਰ ਜਦੋ ਇਨਾਂ ਫਲੈਕਸ ਬੋਰਡਾਂ ਤੇ ਹੋਰਡਿੰਗ ਸਬੰਧੀ ਨਗਰ ਕੌਂਸਲ ਮੋਰਿੰਡਾ ਦੇ ਕਾਰਜਸਾਧਕ ਅਫਸਰ ਸ੍ਰੀ ਰਜਨੀਸ਼ ਸੂਦ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨਾਂ ਦੱਸਿਆ ਕਿ ਨਗਰ ਕੌਂਸਲ ਨੂੰ ਸਾਲ 2023-24 ਦੌਰਾਨ ਫਲੈਕਸ ਬੋਰਡਾਂ ਤੇ ਹੋਰਡਿੰਗ ਰਾਂਹੀ ਇਸ਼ਤਿਹਾਰਬਾਜੀ ਤੋਂ 183000-/ ਰੁਪਏ ਦੀ ਆਮਦਨ ਹੋਈ ਹੈ । ਉਨਾਂ ਦੱਸਿਆ ਕਿ ਚੋਣ ਕਮਿਸ਼ਨ ਦੀਆਂ ਹਦਾਇਤਾਂ ਅਨੁਸਾਰ ਬਹੁਤੇ ਬੋਰਡ ਉਤਾਰ ਦਿੱਤੇ ਗਏ ਹਨ ਅਤੇ ਜੇਕਰ ਫਿਰ ਵੀ ਕੌਂਸਲ ਕੋਲ ਪੈਸੇ ਜਮਾਂ ਕਰਾਉਣ ਵਾਲੀ ਪਾਰਟੀ ਦਾ ਬੋਰਡ ਲੱਗਾ ਹੋਇਆ ਹੈ ਤਾਂ ਉਸ ਨੂੰ ਵੀ ਜਲਦੀ ਉਤਾਰ ਦਿੱਤਾ ਜਾਵੇਗਾ।