ਫਿਰੋਜ਼ਪੁਰ, 16 ਨਵੰਬਰ: ਦੇਸ਼ ਕਲਿੱਕ ਬਿਊਰੋ :
ਫਿਰੋਜ਼ਪੁਰ ਤੋਂ ਅਮਰੀਕਾ ‘ਚ ਭੇਜੇ ਜਾਣ ਵਾਲੇ ਪਾਰਸਲ ਵਿੱਚੋਂ ਅਫੀਮ ਮਿਲਣ ਦੀ ਖਬਰ ਸਾਹਮਣੇ ਆਈ ਹੈ। ਇਹ ਅਫੀਮ ਫਿਰੋਜ਼ਪੁਰ ਤੋਂ ਕੈਲੀਫੋਰਨੀਆ (ਅਮਰੀਕਾ) ਭੇਜੀ ਜਾ ਰਹੀ ਸੀ, ਜੋ ਕਿ ਇੱਕ ਪਾਰਸਲ ਵਿੱਚੋਂ ਬਰਾਮਦ ਕੀਤੀ ਗਈ। ਇਹ ਬਰਾਮਦਗੀ ਲੁਧਿਆਣਾ ਵਿੱਚ ਡਾਇਰੈਕਟੋਰੇਟ ਆਫ਼ ਰੈਵੇਨਿਊ ਇੰਟੈਲੀਜੈਂਸ (ਡੀਆਰਆਈ) ਜ਼ੋਨਲ ਯੂਨਿਟ ਵੱਲੋਂ ਕੀਤੀ ਗਈ ਹੈ। ਡੀਆਰਆਈ ਨੇ 10.3 ਲੱਖ ਰੁਪਏ ਦੀ 735 ਗ੍ਰਾਮ ਅਫੀਮ ਜ਼ਬਤ ਕੀਤੀ ਹੈ।
ਡੀਆਰਆਈ ਅਧਿਕਾਰੀਆਂ ਨੂੰ ਖਾਸ ਖੁਫੀਆ ਜਾਣਕਾਰੀ ਮਿਲੀ ਕਿ ਇੱਕ ਪਾਰਸਲ ‘ਚ ਐਨਡੀਪੀਐਸ ਐਕਟ 1985 ਦੀ ਉਲੰਘਣਾ ਕਰਕੇ ਨਸ਼ੀਲੇ ਪਦਾਰਥ ਲੁਕਾ ਕੇ ਭੇਜੇ ਜਾ ਰਹੇ ਸੀ। ਇਸ ਜਾਣਕਾਰੀ ਦੇ ਆਧਾਰ ‘ਤੇ, ਡੀਆਰਆਈ ਦੀ ਇੱਕ ਟੀਮ ਨੇ ਡੀਐਚਐਲ ਐਕਸਪ੍ਰੈਸ ਢਾਂਧਾਰੀ ਕਲਾਂ ਵਿਖੇ ਇੱਕ ਪਾਰਸਲ ਨੂੰ ਰੋਕਿਆ। ਪਾਰਸਲ ਦੀ ਪੂਰੀ ਜਾਂਚ ਕਰਨ ‘ਤੇ, ਅਧਿਕਾਰੀਆਂ ਨੂੰ ਅਫੀਮ ਵਾਲੇ ਚਾਰ ਪੈਕੇਟ ਮਿਲੇ। ਹਰੇਕ ਪੈਕੇਟ ਨੂੰ ਕਾਰਬਨ ਪੇਪਰ ਵਿੱਚ ਲਪੇਟਿਆ ਗਿਆ ਸੀ ਅਤੇ ਪਾਰਦਰਸ਼ੀ ਟੇਪ ਨਾਲ ਸੀਲ ਕੀਤਾ ਗਿਆ ਸੀ। ਇਹ ਪੈਕੇਟ ਇੱਕ ਰਜਾਈ ਵਿੱਚ ਲੁਕੇ ਹੋਏ ਸਨ। ਪੈਕੇਟਾਂ ਨੂੰ ਲੁਕਾਉਣ ਲਈ ਇੱਕ ਛੋਟਾ ਜਿਹਾ ਛੇਕ ਕੀਤਾ ਗਿਆ ਸੀ। ਡੀਆਰਆਈ ਨੇ ਐਨਡੀਪੀਐਸ ਐਕਟ, 1985 ਦੀਆਂ ਧਾਰਾਵਾਂ ਤਹਿਤ ਅਫੀਮ ਜ਼ਬਤ ਕੀਤੀ ਹੈ ਅਤੇ ਹੋਰ ਜਾਂਚ ਜਾਰੀ ਹੈ।