ਵੱਡੀ ਖ਼ਬਰ: FBI ਵੱਲੋਂ ਭਗਵਾਨਪੁਰੀਆ ਗੈਂਗ ਦਾ ਨਿਤਿਸ਼ ਕੌਸ਼ਲ ਗ੍ਰਿਫ਼ਤਾਰ; ‘ਮੋਸਟ ਵਾਂਟੇਡ’ ਸੂਚੀ ‘ਚ ਸ਼ਾਮਲ ਹੋਣ ਦੇ ਕੁਝ ਦਿਨਾਂ ਬਾਅਦ ਹੀ ਸ਼ਿਕੰਜਾ
ਵਾਸ਼ਿੰਗਟਨ/ਵਰਮੋਂਟ 17 ਜੁਲਾਈ, 2026- ਅਮਰੀਕਾ ਦੀ ਕੇਂਦਰੀ ਜਾਂਚ ਏਜੰਸੀ ਐਫ਼.ਬੀ.ਆਈ. (FBI) ਨੇ ਅੰਤਰਰਾਸ਼ਟਰੀ ਸੰਗਠਿਤ ਅਪਰਾਧ ਖ਼ਿਲਾਫ਼ ਚਲਾਈ ਵੱਡੀ ਮੁਹਿੰਮ ਤਹਿਤ ਭਾਰਤੀ ਮੂਲ ਦੇ ਨਾਗਰਿਕ ਨਿਤਿਸ਼ ਕੌਸ਼ਲ ਨੂੰ ਵਰਮੋਂਟ (Vermont) ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਹ ਕਾਰਵਾਈ ਨਿਤਿਸ਼ ਕੌਸ਼ਲ ਨੂੰ FBI ਦੀ ‘ਮੋਸਟ ਵਾਂਟੇਡ’ (ਸਭ ਤੋਂ ਵੱਧ ਲੋੜੀਂਦੇ ਅਪਰਾਧੀਆਂ ਦੀ) ਸੂਚੀ ਵਿੱਚ ਸ਼ਾਮਲ ਕੀਤੇ ਜਾਣ ਦੇ ਕੁਝ ਦਿਨਾਂ ਬਾਅਦ ਹੀ ਅਮਲ ਵਿੱਚ ਆਈ ਹੈ।
FBI ਮੁਤਾਬਕ ਨਿਤਿਸ਼ ਕੌਸ਼ਲ ਦੀ ਗ੍ਰਿਫ਼ਤਾਰੀ ਉਸ ਵੇਲੇ ਹੋਈ ਜਦੋਂ ਸੁਰੱਖਿਆ ਪ੍ਰਸ਼ਾਸਨ ‘ਭਗਵਾਨਪੁਰੀਆ ਸੰਗਠਿਤ ਅਪਰਾਧ ਸਮੂਹ’ (Bhagwanpuria Organized Crime Group) ‘ਤੇ ਸ਼ਿਕੰਜਾ ਕੱਸ ਰਿਹਾ ਸੀ। ਦੋਸ਼ ਹੈ ਕਿ ਕੌਸ਼ਲ ਅਮਰੀਕਾ ਵਿੱਚ ਇਸ ਗੈਂਗ ਦੇ ਇਸ਼ਾਰੇ ‘ਤੇ ਕਤਲ, ਅਗਵਾ ਅਤੇ ਨਸ਼ਾ ਤਸਕਰੀ ਵਰਗੀਆਂ ਹਿੰਸਕ ਵਾਰਦਾਤਾਂ ਨੂੰ ਅੰਜਾਮ ਦਿੰਦਾ ਸੀ।
ਏਜੰਸੀ ਨੇ ਇਸ ਹਫ਼ਤੇ ਦੇ ਸ਼ੁਰੂ ਵਿੱਚ ਦੱਸਿਆ ਸੀ ਕਿ ਨਿਤਿਸ਼ ਕੌਸ਼ਲ ਇੱਕ ਅਜਿਹੇ ਅੰਤਰਰਾਸ਼ਟਰੀ ਅਪਰਾਧਿਕ ਨੈੱਟਵਰਕ ਦਾ ਹਿੱਸਾ ਹੈ ਜੋ ਕਈ ਦੇਸ਼ਾਂ ਵਿੱਚ ਫੈਲਿਆ ਹੋਇਆ ਹੈ। ਉਹ ਕਤਲ ਅਤੇ ਅਗਵਾ (Kidnapping), ਨਸ਼ਾ ਤਸਕਰੀ (Drug Trafficking), ਜਬਰਨ ਵਸੂਲੀ (Extortion) ਅਤੇ ਹਥਿਆਰਾਂ ਦੀ ਤਸਕਰੀ, ਮਨੀ ਲਾਂਡਰਿੰਗ (Money Laundering) ਅਤੇ ਮਨੁੱਖੀ ਸਮਗਲਿੰਗ (Human Smuggling) ਮਾਮਲਿਆਂ ਵਿੱਚ ਲੋੜੀਂਦਾ ਸੀ।
ਏਜੰਸੀ ਨੇ ਕੌਸ਼ਲ ਨੂੰ ਬੇਹੱਦ ਖ਼ਤਰਨਾਕ, ਹਥਿਆਰਬੰਦ ਅਤੇ ਹਿਰਾਸਤ ਵਿੱਚੋਂ ਫ਼ਰਾਰ ਹੋਣ ਦੀ ਫ਼ਿਤਰਤ ਰੱਖਣ ਵਾਲਾ ਅਪਰਾਧੀ ਦੱਸਿਆ ਸੀ। ਲਾਸ ਏਂਜਲਸ ਵਿੱਚ ਕੈਲੀਫੋਰਨੀਆ ਦੀ ਕੇਂਦਰੀ ਜ਼ਿਲ੍ਹਾ ਅਦਾਲਤ ਨੇ 25 ਜੂਨ ਨੂੰ ਉਸ ਖ਼ਿਲਾਫ਼ ਰੈਕੇਟੀਅਰਿੰਗ ਸਾਜ਼ਿਸ਼ (Racketeering Conspiracy) ਦੇ ਦੋਸ਼ਾਂ ਤਹਿਤ ਫੈਡਰਲ ਵਾਰੰਟ ਜਾਰੀ ਕੀਤਾ ਸੀ।
ਨਿਤਿਸ਼ ਦੀ ਇਹ ਗ੍ਰਿਫ਼ਤਾਰੀ ‘ਆਪ੍ਰੇਸ਼ਨ ਹਾਰਡ ਬਾਲ’ ਦਾ ਹਿੱਸਾ ਹੈ। ਇਹ ਭਗਵਾਨਪੁਰੀਆ ਗੈਂਗ ਨੂੰ ਨਿਸ਼ਾਨਾ ਬਣਾਉਣ ਲਈ ਚਲਾਈ ਗਈ ਇੱਕ ਤਾਲਮੇਲ ਵਾਲੀ ਅੰਤਰਰਾਸ਼ਟਰੀ ਮੁਹਿੰਮ ਹੈ। ਇਸ ਆਪ੍ਰੇਸ਼ਨ ਤਹਿਤ ਅਮਰੀਕਾ, ਕੈਨੇਡਾ ਅਤੇ ਯੂਰਪ ਭਰ ਵਿੱਚ ਵੱਡੇ ਪੱਧਰ ‘ਤੇ ਛਾਪੇਮਾਰੀ ਕੀਤੀ ਗਈ ਹੈ, ਜੋ ਇਹ ਦਰਸਾਉਂਦੀ ਹੈ ਕਿ ਭਾਰਤ ਨਾਲ ਜੁੜੇ ਅੰਤਰਰਾਸ਼ਟਰੀ ਗੈਂਗਸਟਰਾਂ ਦੇ ਨੈੱਟਵਰਕ ਨੂੰ ਤੋੜਨ ਲਈ ਵਿਦੇਸ਼ੀ ਏਜੰਸੀਆਂ ਹੁਣ ਸਖ਼ਤ ਰੁਖ਼ ਅਖਤਿਆਰ ਕਰ ਚੁੱਕੀਆਂ ਹਨ।