ਵੱਡੀ ਖ਼ਬਰ: ਟ੍ਰੇਨਾਂ ‘ਚ ਤੇਜ਼ ਆਵਾਜ਼ ‘ਚ ਗੀਤ ਸੁਣਨ ਅਤੇ ਵੀਡੀਓ ਦੇਖਣ ਤੇ ਰੇਲਵੇ ਨੇ ਲਈ ਪਾਬੰਦੀ! ਕਈ ਯਾਤਰੀਆਂ ਵਿਰੁੱਧ ਕਾਰਵਾਈ ਸ਼ੁਰੂ
ਲਖਨਊ, 3 ਅਗਸਤ 2026
ਟ੍ਰੇਨਾਂ ਵਿੱਚ ਰੀਲਾਂ, ਵੀਡੀਓਜ਼, ਫ਼ਿਲਮਾਂ ਦੇਖਣ ਅਤੇ ਗਾਣੇ ਸੁਣਨ ਦੇ ਵਧਦੇ ਚਲਨ ਦੇ ਵਿਚਕਾਰ ਯਾਤਰੀਆਂ ਨੂੰ ਸ਼ਾਂਤ ਅਤੇ ਆਰਾਮਦਾਇਕ ਸਫ਼ਰ ਮੁਹੱਈਆ ਕਰਵਾਉਣ ਲਈ ਉੱਤਰ-ਪੂਰਬੀ ਰੇਲਵੇ ਦੇ ਲਖਨਊ ਮੰਡਲ ਨੇ ਨਿਯਮਾਂ ਨੂੰ ਸਖ਼ਤੀ ਨਾਲ ਲਾਗੂ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਸਹਿ-ਯਾਤਰੀਆਂ ਦੀਆਂ ਵਧਦੀਆਂ ਸ਼ਿਕਾਇਤਾਂ ਨੂੰ ਦੇਖਦੇ ਹੋਏ ਰੇਲਵੇ ਸੁਰੱਖਿਆ ਬਲ (ਆਰ.ਪੀ.ਐੱਫ.) ਨੇ ਅਜਿਹੇ ਅਨੁਸ਼ਾਸਨਹੀਣ ਯਾਤਰੀਆਂ ਵਿਰੁੱਧ ਮੁਹਿੰਮ ਤੇਜ਼ ਕਰ ਦਿੱਤੀ ਹੈ।
ਸੀਨੀਅਰ ਮੰਡਲ ਸੁਰੱਖਿਆ ਕਮਿਸ਼ਨਰ ਦੇ ਨਿਰਦੇਸ਼ਾਂ ਹੇਠ ਆਰ.ਪੀ.ਐੱਫ. ਨੇ ਜਨਵਰੀ ਤੋਂ ਜੁਲਾਈ 2026 ਤੱਕ ਦੇ ਸੱਤ ਮਹੀਨਿਆਂ ਵਿੱਚ ਮੋਬਾਈਲ ਜਾਂ ਲੈਪਟਾਪ ‘ਤੇ ਤੇਜ਼ ਆਵਾਜ਼ ਵਿੱਚ ਵੀਡੀਓ ਚਲਾਉਣ, ਰੌਲਾ ਪਾਉਣ ਅਤੇ ਯਾਤਰਾ ਵਿੱਚ ਵਿਘਨ ਪਾਉਣ ਵਾਲੇ 97 ਯਾਤਰੀਆਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਹੈ। ਜੂਨ ਮਹੀਨੇ ਵਿੱਚ ਬਿਹਾਰ ਸੰਪਰਕ ਕ੍ਰਾਂਤੀ ਅਤੇ ਗੋਰਖਧਾਮ ਐਕਸਪ੍ਰੈਸ ਵਰਗੀਆਂ ਟ੍ਰੇਨਾਂ ਵਿੱਚ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ‘ਤੇ ਜੁਰਮਾਨਾ ਲਗਾਇਆ ਗਿਆ।
ਰੇਲਵੇ ਪ੍ਰਸ਼ਾਸਨ ਨੇ ਸਪੱਸ਼ਟ ਕੀਤਾ ਹੈ ਕਿ ਸਫ਼ਰ ਦੌਰਾਨ ਤੇਜ਼ ਆਵਾਜ਼ ਵਿੱਚ ਗੱਲਬਾਤ ਕਰਨਾ ਜਾਂ ਬਿਨਾਂ ਈਅਰਫੋਨ ਤੋਂ ਵੀਡੀਓ-ਗਾਨੇ ਚਲਾਉਣਾ ਰੇਲਵੇ ਐਕਟ ਅਧੀਨ ਅਪਰਾਧ ਹੈ। ਇਸ ਉਲੰਘਣਾ ਲਈ ਇੱਕ ਹਜ਼ਾਰ ਰੁਪਏ ਤੱਕ ਦਾ ਜੁਰਮਾਨਾ, ਜੇਲ੍ਹ ਜਾਂ ਦੋਵੇਂ ਸਜ਼ਾਵਾਂ ਹੋ ਸਕਦੀਆਂ ਹਨ। ਯਾਤਰੀਆਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਦੂਜਿਆਂ ਦੀ ਸੁਵਿਧਾ ਲਈ ਈਅਰਫੋਨ ਦੀ ਵਰਤੋਂ ਕਰਨ ਅਤੇ ਧੀਮੀ ਆਵਾਜ਼ ਵਿੱਚ ਗੱਲ ਕਰਨ।
ਇਸ ਤੋਂ ਇਲਾਵਾ ਸਟੇਸ਼ਨ ਕੰਪਲੈਕਸ, ਟ੍ਰੇਨ ਅੰਦਰ ਜਾਂ ਪਟੜੀਆਂ ‘ਤੇ ਕੂੜਾ ਸੁੱਟਣਾ, ਥੁੱਕਣਾ ਅਤੇ ਪਾਨ-ਗੁਟਖਾ ਖਾ ਕੇ ਗੰਦਗੀ ਫੈਲਾਉਣਾ ਵੀ ਦੰਡਯੋਗ ਅਪਰਾਧ ਹੈ। ਦੂਜੇ ਪਾਸੇ, ਵਾਰਾਣਸੀ ਮੰਡਲ ਨੇ ਡਿਊਟੀ ਦੌਰਾਨ ਰੇਲ ਕਰਮਚਾਰੀਆਂ ਦੁਆਰਾ ਟ੍ਰੇਨ, ਸਟੇਸ਼ਨ ਜਾਂ ਕੰਟਰੋਲ ਰੂਮ ਦੀਆਂ ਵੀਡੀਓਜ਼ ਤੇ ਰੀਲਾਂ ਬਣਾ ਕੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ‘ਤੇ ਸਾਂਝੀਆਂ ਕਰਨ ‘ਤੇ ਵੀ ਪੂਰਨ ਰੋਕ ਲਗਾ ਦਿੱਤੀ ਹੈ।