- PRTC ਦੀ ਬੱਸ ਹੀ ਚੋਰੀ ਕਰ ਕੇ ਲੈ ਗਏ ਚੋਰ
ਲੁਧਿਆਣਾ, 6 ਸਤੰਬਰ (ਦੇਸ਼ ਕਲਿੱਕ ਬਿਊਰੋ): ਲੁਧਿਆਣਾ ਵਿੱਚ ਚੋਰਾਂ ਨੇ ਅਜਿਹੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਹੈ, ਜੋ ਕਿਸੇ ਫ਼ਿਲਮੀ ਸੀਨ ਤੋਂ ਘੱਟ ਨਹੀਂ। ਲੁਧਿਆਣਾ ਬੱਸ ਸਟੈਂਡ ਡਿਪੋ ਦੇ ਸਾਹਮਣੇ ਬਣੀ ਪਾਰਕਿੰਗ ਵਿੱਚੋਂ ਚੋਰ PRTC ਦੀ ਇੱਕ ਟਾਪ ਮਾਡਲ ਬੱਸ ਹੀ ਚੋਰੀ ਕਰਕੇ ਲੈ ਗਏ। ਅਗਲੇ ਦਿਨ ਇਹ ਬੱਸ ਸ਼ਹਿਰ ਤੋਂ ਕਰੀਬ 21 ਕਿਲੋਮੀਟਰ ਦੂਰ ਇੱਟਾਂ ਦੇ ਸਹਾਰੇ ਖੜ੍ਹੀ ਮਿਲੀ। ਚੋਰ ਬੱਸ ਦੇ ਟਾਇਰ, ਬੈਟਰੀਆਂ ਅਤੇ ਹੋਰ ਕੀਮਤੀ ਸਮਾਨ ਕੱਢ ਕੇ ਲੈ ਗਏ। ਪੂਰੀ ਵਾਰਦਾਤ CCTV ਕੈਮਰਿਆਂ ਵਿੱਚ ਕੈਦ ਹੋ ਗਈ ਹੈ।
2 ਘੰਟੇ ਤੱਕ ਪਾਰਕਿੰਗ ਦੀ ਕੀਤੀ ਰੇਕੀ
ਬੱਸ ਦੇ ਡਰਾਈਵਰ ਮੁਤਾਬਕ CCTV ਫੁਟੇਜ ਵਿੱਚ ਸਾਫ਼ ਦਿਖਾਈ ਦੇ ਰਿਹਾ ਹੈ ਕਿ 28 ਅਗਸਤ ਦੀ ਰਾਤ ਕਰੀਬ 12:30 ਵਜੇ ਇੱਕ ਬੋਲੇਰੋ ਪਿਕਅੱਪ ਪਾਰਕਿੰਗ ਦੇ ਨੇੜੇ ਆ ਕੇ ਰੁਕਦੀ ਹੈ। ਇਸ ਵਿੱਚ 7 ਤੋਂ 8 ਲੋਕ ਸਵਾਰ ਸਨ। ਚੋਰ ਕਰੀਬ 2 ਘੰਟਿਆਂ ਤੱਕ ਉੱਥੇ ਬੈਠੇ ਰਹੇ ਅਤੇ ਪਾਰਕਿੰਗ ਦੀ ਰੇਕੀ ਕਰਦੇ ਰਹੇ। ਰਾਤ ਕਰੀਬ 2:20 ਵਜੇ ਜਦੋਂ ਸੜਕਾਂ ’ਤੇ ਪੂਰੀ ਤਰ੍ਹਾਂ ਸਨਾਟਾ ਛਾ ਗਿਆ ਤਾਂ ਉਹ ਬੱਸ ਨੂੰ ਪਾਰਕਿੰਗ ਵਿੱਚੋਂ ਬਾਹਰ ਕੱਢ ਕੇ ਲੈ ਗਏ। ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਗੇਟ ’ਤੇ ਨਾ ਕੋਈ ਐਂਟਰੀ ਹੋਈ ਅਤੇ ਨਾ ਹੀ ਕਿਸੇ ਨੇ ਉਨ੍ਹਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ।
ਆਟੋ ਤੇ ਸਕੂਟੀ ਨੇ ਬੱਸ ਨੂੰ ਕੀਤਾ ਐਸਕੋਰਟ
ਅੱਗੇ ਜਗਰਾਉਂ ਪੁਲ ਦੇ ਨੇੜੇ ਇੱਕ ਆਟੋ ਅਤੇ ਸਕੂਟੀ ਵੀ ਬੱਸ ਨੂੰ ਐਸਕੋਰਟ ਕਰਨ ਲਈ ਪਹੁੰਚ ਗਏ। CCTV ਵਿੱਚ ਦਿਖਾਈ ਦਿੰਦਾ ਹੈ ਕਿ ਸਕੂਟੀ ਪਿੱਛੇ ਕਰਕੇ ਬੱਸ ਦੇ ਅੱਗੇ-ਅੱਗੇ ਚੱਲਣ ਲੱਗਦੀ ਹੈ। ਇਸ ਤੋਂ ਬਾਅਦ ਬੱਸ ਸੜਕਾਂ ਤੋਂ ਗਾਇਬ ਹੋ ਜਾਂਦੀ ਹੈ। ਜਿਸ ਬੱਸ ਨੂੰ ਚੋਰਾਂ ਨੇ ਨਿਸ਼ਾਨਾ ਬਣਾਇਆ, ਉਹ BS-VI (Phase 2-6) ਟਾਪ ਮਾਡਲ ਬੱਸ ਸੀ। ਇਸ ਵਿੱਚ ਆਧੁਨਿਕ ਸਿਸਟਮ ਲੱਗੇ ਹੋਏ ਹਨ ਅਤੇ ਆਮ ਤੌਰ ’ਤੇ ਬਿਨਾਂ ਚਾਬੀ ਇਸ ਨੂੰ ਸਟਾਰਟ ਕਰਨਾ ਆਸਾਨ ਨਹੀਂ ਹੁੰਦਾ।
ਤਾਰਾਂ ਤੋੜ ਕੇ ਡਾਇਰੈਕਟ ਸਟਾਰਟ ਕੀਤੀ ਬੱਸ
ਬੱਸ ਡਰਾਈਵਰ ਮੁਤਾਬਕ ਚੋਰਾਂ ਨੇ ਸਟਾਰਟਿੰਗ ਸਵਿੱਚ ਦੀਆਂ ਤਾਰਾਂ ਤੋੜ ਕੇ ਬੱਸ ਨੂੰ ਡਾਇਰੈਕਟ ਸਟਾਰਟ ਕੀਤਾ। ਇਸ ਕਾਰਨ ਸ਼ੱਕ ਜਤਾਇਆ ਜਾ ਰਿਹਾ ਹੈ ਕਿ ਵਾਰਦਾਤ ਨੂੰ ਅੰਜਾਮ ਦੇਣ ਵਾਲਿਆਂ ਵਿੱਚ ਕੋਈ ਅਜਿਹਾ ਵਿਅਕਤੀ ਸ਼ਾਮਲ ਹੋ ਸਕਦਾ ਹੈ, ਜਿਸ ਨੂੰ ਬੱਸ ਦੇ ਸਿਸਟਮ ਅਤੇ ਵਾਇਰਿੰਗ ਦੀ ਤਕਨੀਕੀ ਜਾਣਕਾਰੀ ਸੀ। ਇਸ ਤੋਂ ਇਲਾਵਾ ਪਾਰਕਿੰਗ ਦੀ ਸੁਰੱਖਿਆ ਅਤੇ ਪ੍ਰਬੰਧ ਨਾਲ ਜੁੜੇ ਕਿਸੇ ਵਿਅਕਤੀ ਦੀ ਭੂਮਿਕਾ ਦੀ ਵੀ ਜਾਂਚ ਕੀਤੀ ਜਾਣੀ ਜ਼ਰੂਰੀ ਹੈ।
ਇੱਟਾਂ ਦੇ ਸਹਾਰੇ ਖੜ੍ਹੀ ਮਿਲੀ ਬੱਸ
ਅਗਲੀ ਸਵੇਰ ਕਰੀਬ 7:30 ਵਜੇ ਜਦੋਂ ਬੱਸ ਦਾ ਡਰਾਈਵਰ ਡਿਊਟੀ ’ਤੇ ਪਹੁੰਚਿਆ ਤਾਂ ਬੱਸ ਨੂੰ ਪਾਰਕਿੰਗ ਵਿੱਚੋਂ ਗਾਇਬ ਦੇਖ ਕੇ ਹੈਰਾਨ ਰਹਿ ਗਿਆ। ਇਸ ਤੋਂ ਬਾਅਦ ਬੱਸ ਦੀ ਭਾਲ ਸ਼ੁਰੂ ਕੀਤੀ ਗਈ। ਕੁਝ ਘੰਟਿਆਂ ਦੀ ਕੋਸ਼ਿਸ਼ ਤੋਂ ਬਾਅਦ ਪਤਾ ਲੱਗਾ ਕਿ ਚੌਕੀਮਾਨ ਟੋਲ ਪਲਾਜ਼ਾ ਤੋਂ ਕਰੀਬ 2 ਕਿਲੋਮੀਟਰ ਪਿੱਛੇ ਢੱਟ ਪਿੰਡ ਦੇ ਨੇੜੇ ਬੱਸ ਖੜ੍ਹੀ ਹੈ। ਮੌਕੇ ’ਤੇ ਪਹੁੰਚਣ ’ਤੇ ਬੱਸ ਇੱਟਾਂ ਦੇ ਸਹਾਰੇ ਖੜ੍ਹੀ ਮਿਲੀ। ਚੋਰ ਬੱਸ ਦੇ ਟਾਇਰ, ਦੋਵੇਂ ਬੈਟਰੀਆਂ ਅਤੇ ਸਟਾਰਟਿੰਗ ਦੀਆਂ ਤਾਰਾਂ ਕੱਢ ਕੇ ਲੈ ਗਏ ਸਨ। ਸਬੂਤ ਮਿਟਾਉਣ ਲਈ ਉਨ੍ਹਾਂ ਨੇ ਬੱਸ ਦੇ ਅੰਦਰ ਲੱਗੇ CCTV ਕੈਮਰੇ ਵੀ ਤੋੜ ਦਿੱਤੇ ਅਤੇ ਆਪਣੇ ਨਾਲ ਲੈ ਗਏ। ਇਸ ਵਾਰਦਾਤ ਵਿੱਚ ਮਾਲਕ ਨੂੰ ਸਿੱਧੇ ਤੌਰ ’ਤੇ ਕਰੀਬ 7 ਤੋਂ 8 ਲੱਖ ਰੁਪਏ ਦਾ ਨੁਕਸਾਨ ਹੋਇਆ ਹੈ।
PRTC ਸਟਾਫ਼ ਥਾਣਾ ਨੰਬਰ 5 ਦੇ ਲਗਾ ਰਿਹਾ ਚੱਕਰ
ਵਾਰਦਾਤ ਤੋਂ ਬਾਅਦ PRTC ਸਟਾਫ਼ ਥਾਣਾ ਨੰਬਰ 5 ਦੇ ਚੱਕਰ ਲਗਾ ਰਿਹਾ ਹੈ। ਸਟਾਫ਼ ਵੱਲੋਂ SHO ਨਾਲ ਵੀ ਮੁਲਾਕਾਤ ਕੀਤੀ ਗਈ। ਪੁਲਿਸ ਦਾ ਕਹਿਣਾ ਹੈ ਕਿ CCTV ਫੁਟੇਜ ਦੇ ਆਧਾਰ ’ਤੇ ਉਸ ਬੋਲੇਰੋ ਪਿਕਅੱਪ ਦਾ ਨੰਬਰ ਪਤਾ ਲਗਾ ਲਿਆ ਗਿਆ ਹੈ, ਜਿਸ ਵਿੱਚ ਚੋਰ ਆਏ ਸਨ। ਹਾਲਾਂਕਿ ਹੁਣ ਤੱਕ ਕਿਸੇ ਵੀ ਮੁਲਜ਼ਮ ਦੀ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ। ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ CCTV ਫੁਟੇਜ ਦੇ ਆਧਾਰ ’ਤੇ ਚੋਰਾਂ ਦੀ ਪਛਾਣ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
