Big Breaking: ਭਾਰਤ ‘ਚ ਐਥੇਨੌਲ ਉਤਪਾਦਨ ਲਈ ਚੀਨੀ ਦੀ ਵਰਤੋਂ ’ਤੇ ਲੱਗੀ ਪਾਬੰਦੀ
ਤੇਲ ਕੰਪਨੀਆਂ ਨੇ 1,100 ਕਰੋੜ ਲੀਟਰ ਲਈ ਮੰਗੀਆਂ ਬੋਲੀਆਂ
ਨਵੀਂ ਦਿੱਲੀ 17 ਅਕਤੂਬਰ 2026
ਕੇਂਦਰ ਸਰਕਾਰ ਨੇ ਸਾਲ 2026-27 ਦੌਰਾਨ ਐਥੇਨੌਲ ਦੇ ਉਤਪਾਦਨ ਲਈ ਚੀਨੀ ਦੀ ਵਰਤੋਂ ’ਤੇ ਪਾਬੰਦੀ ਲਗਾਉਣ ਦਾ ਹੁਕਮ ਜਾਰੀ ਕੀਤਾ ਹੈ। ਇਸ ਫੈਸਲੇ ਤੋਂ ਬਾਅਦ ਤੇਲ ਮਾਰਕੀਟਿੰਗ ਕੰਪਨੀਆਂ ਨੇ ਆਪਣੇ ਨਵੇਂ ਟੈਂਡਰਾਂ ਵਿੱਚ ਗੰਨੇ ਦੇ ਰਸ, ਚੀਨੀ ਦੇ ਸ਼ਰਬਤ ਅਤੇ ਬੀ-ਹੈਵੀ ਗੁੜ (ਮੋਲਾਸਿਸ) ਤੋਂ ਤਿਆਰ ਕੀਤੇ ਜਾਣ ਵਾਲੇ ਐਥੇਨੌਲ ਨੂੰ ਸ਼ਾਮਲ ਨਹੀਂ ਕੀਤਾ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ, ਇੰਡੀਅਨ ਆਇਲ ਕਾਰਪੋਰੇਸ਼ਨ (ਆਈਓਸੀ), ਭਾਰਤ ਪੈਟਰੋਲੀਅਮ (ਬੀਪੀਸੀਐਲ) ਅਤੇ ਹਿੰਦੁਸਤਾਨ ਪੈਟਰੋਲੀਅਮ (ਐਚਪੀਸੀਐਲ) ਨੇ ਨਵੰਬਰ 2026 ਤੋਂ ਸ਼ੁਰੂ ਹੋਣ ਵਾਲੇ ਸਪਲਾਈ ਸਾਲ ਲਈ ਐਥੇਨੌਲ ਦੀ ਖਰੀਦ ਵਾਸਤੇ ਬੋਲੀਆਂ ਮੰਗੀਆਂ ਹਨ। ਤਿੰਨਾਂ ਕੰਪਨੀਆਂ ਵੱਲੋਂ ਕੁੱਲ 1,100 ਕਰੋੜ ਲੀਟਰ ਐਥੇਨੌਲ ਦੀ ਖਰੀਦ ਲਈ ਟੈਂਡਰ ਜਾਰੀ ਕੀਤੇ ਗਏ ਹਨ।
ਇਸ ਨੀਤੀਗਤ ਫੈਸਲੇ ਦਾ ਖੰਡ ਮਿੱਲਾਂ ਅਤੇ ਐਥੇਨੌਲ ਉਤਪਾਦਕਾਂ ’ਤੇ ਅਸਰ ਪੈਣ ਦੀ ਸੰਭਾਵਨਾ ਹੈ, ਖ਼ਾਸ ਕਰਕੇ ਉਨ੍ਹਾਂ ਇਕਾਈਆਂ ’ਤੇ ਜਿਹੜੀਆਂ ਗੰਨੇ ਦੇ ਰਸ, ਚੀਨੀ ਦੇ ਸ਼ਰਬਤ ਅਤੇ ਬੀ-ਹੈਵੀ ਮੋਲਾਸਿਸ ਨੂੰ ਕੱਚੇ ਮਾਲ ਵਜੋਂ ਵਰਤਦੀਆਂ ਹਨ।
ਐਥੇਨੌਲ ਦੀ ਖਰੀਦ ਲਈ ਜਾਰੀ ਕੀਤੇ ਗਏ ਨਵੇਂ ਟੈਂਡਰਾਂ ਦੀਆਂ ਸ਼ਰਤਾਂ ਅਨੁਸਾਰ, ਉਤਪਾਦਕਾਂ ਨੂੰ ਮਨਜ਼ੂਰਸ਼ੁਦਾ ਹੋਰ ਸਰੋਤਾਂ ਤੋਂ ਐਥੇਨੌਲ ਦੀ ਸਪਲਾਈ ਕਰਨੀ ਪਵੇਗੀ। ਹਾਲਾਂਕਿ, ਇਸ ਫੈਸਲੇ ਦੇ ਖੰਡ ਉਦਯੋਗ, ਕਿਸਾਨਾਂ ਅਤੇ ਐਥੇਨੌਲ ਉਤਪਾਦਨ ਖੇਤਰ ’ਤੇ ਪੈਣ ਵਾਲੇ ਅਸਲ ਪ੍ਰਭਾਵ ਦੀ ਤਸਵੀਰ ਆਉਣ ਵਾਲੇ ਸਮੇਂ ਵਿੱਚ ਹੋਰ ਸਪੱਸ਼ਟ ਹੋਵੇਗੀ।
