ਦਰਜਣਾਂ ਜਨਤਕ ਜਮਹੂਰੀ ਜਥੇਬੰਦੀਆਂ ਦੇ ਅਨੇਕਾਂ ਆਗੂਆਂ ਨੇ ਕੀਤੀ ਸ਼ਮੂਲੀਅਤ
ਸ਼ਰਧਾਂਜਲੀ/ਭੋਗ ਸਮਾਗਮ 3 ਮਈ ਨੂੰ ਜੋਧਪੁਰ ਵਿਖੇ
ਦਲਜੀਤ ਕੌਰ
ਬਰਨਾਲਾ, 26 ਅਪ੍ਰੈਲ, 2024: ਬਿਜਲੀ ਬੋਰਡ ਹੁਣ ਪਾਵਰਕੌਮ ਵਿੱਚ ਤਿੰਨ ਦਹਾਕੇ ਲੰਬਾ ਅਰਸਾ ਡਿਊਟੀ ਨਿਭਾਉਂਦਿਆਂ ਬਾਅਦ ਜੂਨੀਅਰ ਇੰਜੀਨੀਅਰ ਵਜੋਂ ਸੇਵਾਮੁਕਤ ਹੋਏ ਰਣਜੀਤ ਸਿੰਘ ਜੋਧਪੁਰ ਜਿਹੇ ਆਗੂ ਸਾਥੀ ਨੂੰ ਕੈਂਸਰ ਰੂਪੀ ਨਾਮੁਰਾਦ ਬਿਮਾਰੀ ਨੇ ਬੇਵਕਤੀ ਖੋਹ ਲਿਆ। ਹਜ਼ਾਰਾਂ ਨਮ ਅੱਖਾਂ ਨੇ 'ਸਾਥੀ ਰਣਜੀਤ ਸਿੰਘ ਜੋਧਪੁਰ ਨੂੰ ਲਾਲ-ਸਲਾਮ, ਰਣਜੀਤ ਜੋਧਪੁਰ ਅਮਰ ਰਹੇ' ਆਦਿ ਨਾਹਰਿਆਂ ਨਾਲ ਅੰਤਿਮ ਵਿਦਾਇਗੀ ਦਿੱਤੀ। ਯਾਦ ਰਹੇ ਕਿ ਸਾਥੀ ਰਣਜੀਤ ਸਿੰਘ ਜੋਧਪੁਰ ਆਪਣੀਂ ਡਿਊਟੀ ਦੇ ਨਾਲ-ਨਾਲ ਸਮਾਜਿਕ ਫਰਜ਼ਾਂ ਪ੍ਰਤੀ ਵੀ ਸੁਚੇਤ ਸੀ। ਸਾਥੀ ਰਣਜੀਤ ਸਿੰਘ ਜੋਧਪੁਰ ਨੇ ਬਾਬਾ ਦੁਰਗਾ ਦਾਸ ਯਾਦਗਾਰ ਸਪੋਰਟਸ ਕਲੱਬ ਚੀਮਾ-ਜੋਧਪੁਰ ਦੇ ਲੰਬਾ ਸਮਾਂ ਖਜ਼ਾਨਚੀ, ਬਿਜਲੀ ਕਾਮਿਆਂ ਦੀ ਸਿਰਮੌਰ ਜਥੇਬੰਦੀ ਟੈਕਨੀਕਲ ਸਰਵਿਸਿਜ਼ ਯੂਨੀਅਨ, ਪਾਵਰਕੌਮ ਪੈਨਸ਼ਨਰਜ਼ ਐਸੋਸੀਏਸ਼ਨ, ਜਮਹੂਰੀ ਅਧਿਕਾਰ ਸਭਾ ਵਿੱਚ ਜੀਅ ਜਾਨ ਲਾਕੇ ਕੰਮ ਕੀਤਾ। ਹੁਣ ਪਾਵਰਕੌਮ ਪੈਨਸ਼ਨਰਜ਼ ਐਸੋਸੀਏਸ਼ਨ ਦੇ ਸ਼ਹਿਰੀ ਮੰਡਲ ਬਰਨਾਲਾ ਦੈ ਪ੍ਰਧਾਨ ਵਜੋਂ ਵਡੇਰੀ ਜ਼ਿੰਮੇਵਾਰੀ ਨਿਭਾ ਰਹੇ ਹਨ। ਦੋ ਸਾਲ ਤੋਂ ਵੀ ਵੱਧ ਸਮੇਂ ਤੋਂ ਪੇਟ ਦੀਆਂ ਅੰਤੜੀਆਂ ਦੇ ਕੈਂਸਰ ਦਾ ਸ਼ਿਕਾਰ ਹੋ ਗਿਆ। ਪੀਜੀਆਈ ਤੱਕ ਇਲਾਜ਼ ਕਰਵਾਕੇ ਥੋੜਾ ਜਿਹਾ ਵੀ ਠੀਕ ਹੋਣ ਉਪਰੰਤ ਮੁੜ ਪਾਵਰਕੌਮ ਪੈਨਸ਼ਨਰਜ਼ ਐਸੋਸੀਏਸ਼ਨ ਦੇ ਜਥੇਬੰਦਕ ਕਾਰਜਾਂ ਲਈ ਸਮਰਪਿਤ ਹੋ ਜਾਂਦਾ। ਹੁਣ ਦਿੱਲੀ ਕੈਂਸਰ ਹਸਪਤਾਲ ਬਠਿੰਡਾ ਵਿਖੇ ਚੱਲ ਰਹੇ ਇਲਾਜ ਦੌਰਾਨ ਸਾਥੀ ਰਣਜੀਤ ਸਿੰਘ ਜੋਧਪੁਰ ਬੇਵਕਤੀ ਵਿਛੋੜਾ ਦੇ ਗਏ।
ਸਾਥੀ ਰਣਜੀਤ ਸਿੰਘ ਜੋਧਪੁਰ ਦੇ ਅੰਤਿਮ ਸੰਸਕਾਰ ਸਮੇਂ ਇਨਕਲਾਬੀ ਕੇਂਦਰ, ਪੰਜਾਬ ਦੇ ਪ੍ਰਧਾਨ ਸਾਥੀ ਨਰਾਇਣ ਦੱਤ, ਜਸਪਾਲ ਸਿੰਘ ਚੀਮਾ, ਗੁਲਵੰਤ ਸਿੰਘ ਬਰਨਾਲਾ, ਪਾਵਰਕੌਮ ਪੈਨਸ਼ਨਰਜ਼ ਦੇ ਆਗੂਆਂ ਸਿੰਦਰ ਧੌਲਾ,ਪਿਆਰਾ ਲਾਲ, ਜੱਗਾ ਸਿੰਘ, ਜਰਨੈਲ ਸਿੰਘ, ਜਗਰਾਜ ਸਿੰਘ, ਜੀਤ ਸਿੰਘ, ਗੌਰੀ ਸ਼ੰਕਰ,ਮੇਲਾ ਸਿੰਘ, ਅਬਜਿੰਦਰ ਸਿੰਘ,ਬਹਾਦਰ ਸਿੰਘ, ਹਰਨੇਕ ਸਿੰਘ, ਸੁਖਵੰਤ ਸਿੰਘ ਚੂੰਘਾਂ, ਜਮਹੂਰੀ ਅਧਿਕਾਰ ਸਭਾ ਦੇ ਆਗੂਆਂ ਸੋਹਣ ਸਿੰਘ ਮਾਝੀ, ਸੁਖਵਿੰਦਰ ਸਿੰਘ ਠੀਕਰੀਵਾਲਾ, ਜਗਜੀਤ ਸਿੰਘ ਢਿੱਲਵਾਂ, ਪਰਮਜੀਤ ਕੌਰ ਜੋਧਪੁਰ, ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਡਕੌਂਦਾ-ਧਨੇਰ ਦੇ ਆਗੂਆਂ ਹਰਮੰਡਲ ਸਿੰਘ ਜੋਧਪੁਰ, ਬਲਵਿੰਦਰ ਸਿੰਘ ਜੋਧਪੁਰ, ਸਿਕੰਦਰ ਸਿੰਘ ਮੌੜ, ਬਾਬਾ ਦੁਰਗਾ ਦਾਸ ਯਾਦਗਾਰ ਕਲੱਬ ਚੀਮਾ-ਜੋਧਪੁਰ ਦੇ ਆਗੂਆਂ ਰੂਪ ਸਿੰਘ ਜਾਗਲ, ਮਲਕੀਤ ਸਿੰਘ, ਸੁਰੇਸ਼ ਗੋਗੀ ਤੋਂ ਇਲਾਵਾ ਇਲਾਕੇ ਭਰ ਦੀਆਂ ਸਮਾਜ ਸੇਵੀ, ਪੰਚਾਇਤਾਂ ਦੇ ਨੁਮਾਇੰਦਿਆਂ ਨੇ ਸ਼ਾਮਿਲ ਹੋਕੇ ਪ੍ਰੀਵਾਰ ਲਈ ਅਸਹਿ ਤੇ ਅਕਹਿ ਘਾਟਾ ਕਰਾਰ ਦਿੱਤਾ। ਆਗੂਆਂ ਕਿਹਾ ਕਿ ਸਾਥੀ ਰਣਜੀਤ ਸਿੰਘ ਜੋਧਪੁਰ ਦੀ ਬੇਵਕਤੀ ਮੌਤ ਨਾਲ ਪ੍ਰੀਵਾਰ ਸਮੇਤ ਜਨਤਕ ਜਮਹੂਰੀ ਜਥੇਬੰਦੀਆਂ ਨੂੰ ਵੱਡਾ ਘਾਟਾ ਪਿਆ ਹੈ। ਸਾਥੀ ਰਣਜੀਤ ਸਿੰਘ ਜੋਧਪੁਰ ਜੋਧਪੁਰ ਨਮਿੱਤ ਸ਼ਰਧਾਂਜਲੀ/ਭੋਗ ਸਮਾਗਮ 3 ਮਈ ਨੂੰ ਬਾਅਦ ਦੁਪਹਿਰ 12.30 ਵਜੇ ਤੋਂ 1.30 ਵਜੇ ਤੱਕ ਜੋਧਪੁਰ ਵਿਖੇ ਹੋਵੇਗਾ।