ਬਿਹਾਰ ਨੂੰ ਵੀ ਵੱਡੀ ਰਾਹਤ ਮਿਲੀ ਹੈ। ਖਗੜੀਆ-ਪੂਰਨੀਆ ਖੰਡ ‘ਤੇ NH-31 ਅਤੇ NH-231 ਨੂੰ 143.5 ਕਿਲੋਮੀਟਰ ਲੰਬਾਈ ਵਿੱਚ 4-ਲੇਨ ਹਾਈਵੇਅ ਵਿੱਚ ਅਪਗ੍ਰੇਡ ਕੀਤਾ ਜਾਵੇਗਾ। 3,936 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲਾ ਇਹ ਪ੍ਰੋਜੈਕਟ BOT ਮੋਡ ‘ਤੇ ਹੋਵੇਗਾ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪ੍ਰਧਾਨਗੀ ਹੇਠ ਬੁੱਧਵਾਰ ਨੂੰ ਹੋਈ ਕੇਂਦਰੀ ਕੈਬਨਿਟ ਦੀ ਬੈਠਕ ‘ਚ ਕਈ ਅਹਿਮ ਫ਼ੈਸਲੇ ਲਏ ਗਏ। ਸਰਕਾਰ ਨੇ ਦਿੱਲੀ-NCR ਖੇਤਰ ਵਿੱਚ ਪ੍ਰਦੂਸ਼ਣ ਕੰਟਰੋਲ ਲਈ ਪੁਰਾਣੇ ਵਾਹਨਾਂ ਨੂੰ ਪੜਾਅਵਾਰ (ਫੇਜ਼ ਵਾਈਜ਼) ਤਰੀਕੇ ਨਾਲ ਹਟਾਉਣ ਦੀ ਯੋਜਨਾ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਦੇ ਨਾਲ ਹੀ ਬਿਹਾਰ, ਉੜੀਸਾ, ਮੱਧ ਪ੍ਰਦੇਸ਼ ਅਤੇ ਤੇਲੰਗਾਨਾ ਵਿੱਚ ਰਾਸ਼ਟਰੀ ਰਾਜਮਾਰਗਾਂ (ਨੈਸ਼ਨਲ ਹਾਈਵੇਅ) ਦੇ ਵਿਸਥਾਰ ਅਤੇ ਅਪਗ੍ਰੇਡੇਸ਼ਨ ਦੇ ਪ੍ਰਸਤਾਵ ਪਾਸ ਕੀਤੇ ਗਏ ਹਨ। ਇਹਨਾਂ ਫ਼ੈਸਲਿਆਂ ਨਾਲ ਟ੍ਰਾਂਸਪੋਰਟ ਵਿਵਸਥਾ ਬਿਹਤਰ ਹੋਣ ਦੇ ਨਾਲ-ਨਾਲ ਆਰਥਿਕ ਵਿਕਾਸ ਨੂੰ ਵੀ ਨਵੀਂ ਰਫ਼ਤਾਰ ਮਿਲਣ ਦੀ ਉਮੀਦ ਹੈ।
ਕੇਂਦਰੀ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਦੱਸਿਆ ਕਿ ਦਿੱਲੀ-NCR ਲਈ ਕੈਬਨਿਟ ਨੇ 9,585 ਕਰੋੜ ਰੁਪਏ ਦੀ ਯੋਜਨਾ ਨੂੰ ਹਰੀ ਝੰਡੀ ਦਿੱਤੀ ਹੈ, ਜੋ ਦੋ ਸਾਲਾਂ ਤੱਕ ਚੱਲੇਗੀ। BS-IV ਜਾਂ ਉਸ ਤੋਂ ਪੁਰਾਣੇ ਟਰੱਕਾਂ ਅਤੇ ਬੱਸਾਂ ਨੂੰ ਹਟਾ ਕੇ ਉਨ੍ਹਾਂ ਦੀ ਥਾਂ BS-VI ਮਾਪਦੰਡਾਂ ਵਾਲੇ ਵਾਹਨਾਂ ਜਾਂ ਇਲੈਕਟ੍ਰਿਕ ਵਾਹਨਾਂ ਨੂੰ ਲਿਆਉਣ ‘ਤੇ ਜ਼ੋਰ ਦਿੱਤਾ ਜਾਵੇਗਾ। ਇਸ ਯੋਜਨਾ ਦਾ ਲਾਭ ਕਰੀਬ 2.07 ਲੱਖ ਵਾਹਨ ਮਾਲਕਾਂ ਨੂੰ ਮਿਲੇਗਾ। ਸਰਕਾਰ ਵਿਆਜ ਸਬਸਿਡੀ, ਫਿਊਲ ਵਾਊਚਰ, ਟੈਕਸ ਛੋਟ ਅਤੇ ਆਟੋ ਕੰਪਨੀਆਂ ਦੇ ਡਿਸਕਾਊਂਟ ਦੇ ਰੂਪ ਵਿੱਚ ਆਕਰਸ਼ਕ ਉਤਸ਼ਾਹ (ਇਨਸੈਂਟਿਵ) ਦੇਵੇਗੀ।
ਇਸੇ ਬੈਠਕ ‘ਚ ਬਿਹਾਰ ਨੂੰ ਵੀ ਵੱਡੀ ਰਾਹਤ ਮਿਲੀ ਹੈ। ਖਗੜੀਆ-ਪੂਰਨੀਆ ਖੰਡ ‘ਤੇ NH-31 ਅਤੇ NH-231 ਨੂੰ 143.5 ਕਿਲੋਮੀਟਰ ਲੰਬਾਈ ਵਿੱਚ 4-ਲੇਨ ਹਾਈਵੇਅ ਵਿੱਚ ਅਪਗ੍ਰੇਡ ਕੀਤਾ ਜਾਵੇਗਾ। 3,936 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲਾ ਇਹ ਪ੍ਰੋਜੈਕਟ BOT ਮੋਡ ‘ਤੇ ਹੋਵੇਗਾ। ਇਸ ਨਾਲ ਖਗੜੀਆ, ਭਾਗਲਪੁਰ, ਕਟਿਹਾਰ ਅਤੇ ਪੂਰਨੀਆ ਜ਼ਿਲ੍ਹਿਆਂ ਵਿੱਚ ਟ੍ਰੈਫਿਕ ਜਾਮ ਘੱਟ ਹੋਵੇਗਾ, ਸੜਕ ਹਾਦਸਿਆਂ ਵਿੱਚ ਕਮੀ ਆਵੇਗੀ ਅਤੇ ਖੇਤਰੀ ਆਰਥਿਕ ਗਤੀਵਿਧੀਆਂ ਵਧਣਗੀਆਂ।
ਮੱਧ ਪ੍ਰਦੇਸ਼ ਵਿੱਚ NH-347B ਦੇ ਦੋ ਹਿੱਸਿਆਂ ਦਾ ਵਿਕਾਸ ਕੀਤਾ ਜਾਵੇਗਾ। ਹਿਵਰਖੇੜੀ-ਰੋਸ਼ਨੀ-ਆਸ਼ਾਪੁਰ-ਰੁਧੀ ਸੈਕਸ਼ਨ ਨੂੰ 2-ਲੇਨ ਵਿੱਚ ਬਦਲਿਆ ਜਾਵੇਗਾ, ਜਦੋਂ ਕਿ ਦੇਸ਼ਗਾਓਂ-ਜੁਲਵਾਨੀਆ ਖੰਡ ਨੂੰ 4-ਲੇਨ ਬਣਾਇਆ ਜਾਵੇਗਾ। ਇਸ ਨਾਲ ਸਥਾਨਕ ਕਨੈਕਟੀਵਿਟੀ ਮਜ਼ਬੂਤ ਹੋਵੇਗੀ ਅਤੇ ਕਿਸਾਨਾਂ ਤੇ ਵਪਾਰੀਆਂ ਨੂੰ ਫ਼ਾਇਦਾ ਹੋਵੇਗਾ।
ਉੜੀਸਾ ਵਿੱਚ ਰਾਮੇਸ਼ਵਰ ਤੋਂ ਪਾਰਾਦੀਪ ਤੱਕ 163 ਕਿਲੋਮੀਟਰ ਲੰਬਾ ਨਵਾਂ ਕੋਸਟਲ (ਤੱਟਵਰਤੀ) ਹਾਈਵੇਅ ਬਣੇਗਾ। 8,300 ਕਰੋੜ ਰੁਪਏ ਦੀ ਲਾਗਤ ਵਾਲੇ ਇਸ ਪ੍ਰੋਜੈਕਟ ਨਾਲ ਸਫ਼ਰ ਦੇ ਸਮੇਂ ਵਿੱਚ ਕਰੀਬ ਢਾਈ ਘੰਟੇ ਦੀ ਬੱਚਤ ਹੋਵੇਗੀ। ਇਹ ‘ਪੀਐਮ ਗਤੀਸ਼ਕਤੀ’ ਦੇ ਤਹਿਤ 9 ਆਰਥਿਕ ਨੋਡਸ ਅਤੇ 5 ਲੌਜਿਸਟਿਕ ਨੋਡਸ ਨੂੰ ਜੋੜੇਗਾ, ਜਿਸ ਨਾਲ ਪੋਰਟ (ਬੰਦਰਗਾਹ) ਅਧਾਰਤ ਉਦਯੋਗਾਂ ਨੂੰ ਹੁਲਾਰਾ ਮਿਲੇਗਾ।
ਤੇਲੰਗਾਨਾ ਵਿੱਚ ਵੀ NH-63 ਅਤੇ NH-563 ਦੇ ਕਰੀਬ 191 ਕਿਲੋਮੀਟਰ ਲੰਬੇ ਹਿੱਸਿਆਂ ਨੂੰ 4-ਲੇਨ ਵਿੱਚ ਵਿਕਸਤ ਕੀਤਾ ਜਾਵੇਗਾ। 7,597 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲੇ ਇਹਨਾਂ ਪ੍ਰੋਜੈਕਟਾਂ ਨਾਲ ਸਫ਼ਰ ਦਾ ਸਮਾਂ ਕ੍ਰਮਵਾਰ ਲਗਭਗ 90 ਮਿੰਟ ਅਤੇ 45 ਮਿੰਟ ਘੱਟ ਹੋ ਜਾਵੇਗਾ।