- ਨੇਤਨਯਾਹੂ ਨੇ ਸੋਸ਼ਲ ਮੀਡੀਆ ’ਤੇ AI ਨਾਲ ਬਣਾਈ ਇਜ਼ਰਾਈਲ ’ਤੇ ਪਰਮਾਣੂ ਬੰਬ ਡਿੱਗਣ ਦੀ ਤਸਵੀਰ ਕੀਤੀ ਪੋਸਟ
ਨਵੀਂ ਦਿੱਲੀ, , 25 ਅਕਤੂਬਰ (ਦੇਸ਼ ਕਲਿੱਕ ਬਿਊਰੋ): ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਐਤਵਾਰ ਨੂੰ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਨਾਲ ਬਣਾਈ ਗਈ ਇਜ਼ਰਾਈਲ ’ਤੇ ਪਰਮਾਣੂ ਬੰਬ ਡਿੱਗਣ ਦੀ ਤਸਵੀਰ ਸੋਸ਼ਲ ਮੀਡੀਆ ’ਤੇ ਸਾਂਝੀ ਕੀਤੀ। ਉਨ੍ਹਾਂ ਨੇ ਈਰਾਨ ਵੱਲੋਂ ਪਰਮਾਣੂ ਹਥਿਆਰ ਹਾਸਲ ਕਰਨ ਦੀ ਸੰਭਾਵਨਾ ਨੂੰ ਇਜ਼ਰਾਈਲ ਲਈ ਵੱਡਾ ਖ਼ਤਰਾ ਦੱਸਿਆ।
ਨੇਤਨਯਾਹੂ ਨੇ ਇਹ ਤਸਵੀਰ ਇਜ਼ਰਾਈਲੀ ਲੇਖਕ ਅਤੇ ਸਿਆਸੀ ਟਿੱਪਣੀਕਾਰ ਯੁਵਾਲ ਬਲੂਮਬਰਗ ਦੇ ਬਿਆਨ ਨਾਲ ਸਾਂਝੀ ਕੀਤੀ। ਬਿਆਨ ਵਿੱਚ ਕਿਹਾ ਗਿਆ ਕਿ ਇਜ਼ਰਾਈਲ ਦੀ ਹੋਂਦ ਨੂੰ ਖ਼ਤਰਾ ਹੈ ਅਤੇ ਜੇਕਰ ਈਰਾਨ ਨੇ ਪਰਮਾਣੂ ਹਥਿਆਰ ਹਾਸਲ ਕਰ ਲਏ ਤਾਂ ਬਾਕੀ ਸਾਰੇ ਮੁੱਦੇ ਮਾਮੂਲੀ ਹੋ ਜਾਣਗੇ। ਦੂਜੇ ਪਾਸੇ, ਵਿਰੋਧੀ ਆਗੂ ਯਾਇਰ ਗੋਲਾਨ ਨੇ ਦੋਸ਼ ਲਾਇਆ ਕਿ ਨੇਤਨਯਾਹੂ ਲੋਕਾਂ ਵਿੱਚ ਡਰ ਫੈਲਾ ਰਹੇ ਹਨ। ਇਹ ਪੋਸਟ ਇਜ਼ਰਾਈਲ ਵਿੱਚ 27 ਅਕਤੂਬਰ ਨੂੰ ਹੋਣ ਵਾਲੀਆਂ ਚੋਣਾਂ ਤੋਂ ਦੋ ਦਿਨ ਪਹਿਲਾਂ ਸਾਹਮਣੇ ਆਈ।
ਟਰੰਪ ਦੇ ਕਾਰਜਕਾਲ ਦੇ ਬਾਕੀ ਦੋ ਸਾਲਾਂ ਦਾ ਹਵਾਲਾ
ਪੋਸਟ ਵਿੱਚ ਕਿਹਾ ਗਿਆ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਮੌਜੂਦਾ ਕਾਰਜਕਾਲ ਦੌਰਾਨ ਇਜ਼ਰਾਈਲ ਕੋਲ ਈਰਾਨ ਦੇ ਖ਼ਤਰੇ ਨਾਲ ਨਜਿੱਠਣ ਲਈ ਸਿਰਫ਼ ਦੋ ਸਾਲ ਬਾਕੀ ਹਨ। ਪੋਸਟ ਵਿੱਚ ਇਜ਼ਰਾਈਲ ਦੀ ਘਰੇਲੂ ਸਿਆਸਤ ਵਿੱਚ ਚੱਲ ਰਹੇ ਵਿਵਾਦਾਂ ਨੂੰ ਦੇਸ਼ ਦੀਆਂ ਸੁਰੱਖਿਆ ਚੁਣੌਤੀਆਂ ਤੋਂ ਧਿਆਨ ਹਟਾਉਣ ਵਾਲਾ ਦੱਸਿਆ ਗਿਆ।
ਨੇਤਨਯਾਹੂ ਨੇ ਚੁੱਕਿਆ ਪਰਮਾਣੂ ਹਮਲੇ ਦਾ ਸਵਾਲ
ਪੋਸਟ ਵਿੱਚ ਸਵਾਲ ਉਠਾਇਆ ਗਿਆ ਕਿ ਜੇਕਰ ਇਜ਼ਰਾਈਲ ’ਤੇ ਦੋ ਪਰਮਾਣੂ ਬੰਬ ਡਿੱਗ ਜਾਣ ਤਾਂ ਘਰੇਲੂ ਸਿਆਸੀ ਵਿਵਾਦਾਂ ਦੀ ਕੀ ਅਹਿਮੀਅਤ ਰਹਿ ਜਾਵੇਗੀ। ਇਸ ਵਿੱਚ ਕਤਰ ਨਾਲ ਜੁੜੇ ਮੁੱਦਿਆਂ, ਕੱਟੜ ਧਾਰਮਿਕ ਯਹੂਦੀ ਭਾਈਚਾਰੇ, ਫ਼ੌਜ ਵਿੱਚ ਲਾਜ਼ਮੀ ਭਰਤੀ ਅਤੇ ਸੁਰੱਖਿਆ ਚੇਤਾਵਨੀਆਂ ਦਾ ਵੀ ਜ਼ਿਕਰ ਕੀਤਾ ਗਿਆ।
ਨੇਤਨਯਾਹੂ ਦੀ ਸਰਕਾਰ ਨੂੰ ਕਈ ਮੁੱਦਿਆਂ ’ਤੇ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਨ੍ਹਾਂ ਵਿੱਚ 7 ਅਕਤੂਬਰ 2023 ਦੇ ਹਮਾਸ ਹਮਲੇ ਨੂੰ ਰੋਕਣ ਵਿੱਚ ਨਾਕਾਮੀ ਦੀ ਜਾਂਚ ਨਾ ਹੋਣਾ, ਕੁਝ ਯਹੂਦੀ ਭਾਈਚਾਰਿਆਂ ਨੂੰ ਫ਼ੌਜੀ ਭਰਤੀ ਤੋਂ ਛੋਟ, ਸੁਪਰੀਮ ਕੋਰਟ ਦੀਆਂ ਸ਼ਕਤੀਆਂ ਘਟਾਉਣ ਦੀਆਂ ਕੋਸ਼ਿਸ਼ਾਂ ਅਤੇ ਜੰਗ ਖ਼ਤਮ ਕਰਕੇ ਦੇਸ਼ ਦੀ ਸੁਰੱਖਿਆ ਯਕੀਨੀ ਬਣਾਉਣ ਵਰਗੇ ਮੁੱਦੇ ਸ਼ਾਮਲ ਹਨ।
ਨੇਤਨਯਾਹੂ ਚੋਣ ਪ੍ਰਚਾਰ ਦੌਰਾਨ ਈਰਾਨ ਦੇ ਖ਼ਤਰੇ ਨੂੰ ਲਗਾਤਾਰ ਪ੍ਰਮੁੱਖ ਮੁੱਦਾ ਬਣਾਉਂਦੇ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਈਰਾਨ ਨੂੰ ਪਰਮਾਣੂ ਹਥਿਆਰ ਹਾਸਲ ਕਰਨ ਤੋਂ ਰੋਕਣਾ ਇਜ਼ਰਾਈਲ ਦੀ ਸਭ ਤੋਂ ਵੱਡੀ ਤਰਜੀਹ ਹੋਣੀ ਚਾਹੀਦੀ ਹੈ।
