- ਪਠਾਨਕੋਟ ’ਚ ਪਿਸਤੌਲ ਦੀ ਨੋਕ ’ਤੇ XUV ਲੁੱਟਣ ਵਾਲੇ ਮੁਲਜ਼ਮ ਗ੍ਰਿਫ਼ਤਾਰ
ਪਠਾਨਕੋਟ: 21 ਨਵੰਬਰ (ਦੇਸ਼ ਕਲਿੱਕ ਬਿਊਰੋ): ਪਠਾਨਕੋਟ ਦੇ ਡਾਊਨਟਾਊਨ ਇਲਾਕੇ ਵਿੱਚ ਪਿਸਤੌਲ ਦਿਖਾ ਕੇ ਮਹਿੰਦਰਾ XUV-500 ਲੁੱਟਣ ਦੇ ਮਾਮਲੇ ਨੂੰ ਪੁਲਿਸ ਨੇ ਸੁਲਝਾਉਂਦਿਆਂ ਚਾਰ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਸ ਕਾਰਵਾਈ ਦੌਰਾਨ ਲੁੱਟੀ ਗਈ ਗੱਡੀ ਵੀ ਬਰਾਮਦ ਕਰ ਲਈ ਗਈ ਹੈ। ਮਾਮਲੇ ਦਾ ਮੁੱਖ ਮੁਲਜ਼ਮ ਸੁਰਜੀਤ ਸਿੰਘ ਉਰਫ਼ ਸ਼ੀਨਾ ਗੁਜਰਾਤ ਦੇ ਵਡੋਦਰਾ ਤੋਂ ਕਾਬੂ ਕੀਤਾ ਗਿਆ ਹੈ। ਇਸ ਕਾਰਵਾਈ ਵਿੱਚ ਗੁਜਰਾਤ ਪੁਲਿਸ ਨੇ ਵੀ ਪੰਜਾਬ ਪੁਲਿਸ ਦੀ ਮਦਦ ਕੀਤੀ। ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਸੁਰਜੀਤ ਸਿੰਘ ਉਰਫ਼ ਸ਼ੀਨਾ ਅਤੇ ਪੁਨੀਤ ਸ਼ਰਮਾ ਉਰਫ਼ ਕਾਕਾ ਵਾਸੀ ਅੰਮ੍ਰਿਤਸਰ, ਜਦਕਿ ਪਵਨ ਉਰਫ਼ ਪਾਣੀ ਅਤੇ ਰਾਹੁਲ ਭੱਟੀ ਉਰਫ਼ ਬੌਬੀ ਵਾਸੀ ਗੁਰਦਾਸਪੁਰ ਵਜੋਂ ਹੋਈ ਹੈ।
ਆਈਜੀ ਬਾਰਡਰ ਰੇਂਜ ਜੀਪੀਐੱਸ ਭੁੱਲਰ ਨੇ ਦੱਸਿਆ ਕਿ ਪਠਾਨਕੋਟ ਦੇ ਐੱਸਐੱਸਪੀ ਮਨਪ੍ਰੀਤ ਸਿੰਘ ਅਤੇ ਐੱਸਪੀ (ਡੀ) ਵਿਸ਼ਾਲਜੀਤ ਦੀ ਅਗਵਾਈ ਹੇਠ ਪੁਲਿਸ ਟੀਮ ਨੇ ਜਾਂਚ ਕਰਦਿਆਂ ਮੁਲਜ਼ਮਾਂ ਤੱਕ ਪਹੁੰਚ ਬਣਾਈ। ਪੁਲਿਸ ਹੁਣ ਮੁਲਜ਼ਮਾਂ ਤੋਂ ਪੁੱਛਗਿੱਛ ਕਰਕੇ ਲੁੱਟ ਦੀ ਵਾਰਦਾਤ ਦੇ ਕਾਰਨਾਂ ਅਤੇ ਉਨ੍ਹਾਂ ਦੀਆਂ ਹੋਰ ਅਪਰਾਧਿਕ ਗਤੀਵਿਧੀਆਂ ਬਾਰੇ ਜਾਣਕਾਰੀ ਇਕੱਠੀ ਕਰੇਗੀ।
ਵਡੋਦਰਾ ਤੋਂ ਫੜਿਆ ਗਿਆ ਮੁੱਖ ਮੁਲਜ਼ਮ
ਪੁਲਿਸ ਅਨੁਸਾਰ ਵਾਰਦਾਤ ਤੋਂ ਬਾਅਦ ਸੁਰਜੀਤ ਸਿੰਘ ਉਰਫ਼ ਸ਼ੀਨਾ ਫਰਾਰ ਹੋ ਗਿਆ ਸੀ। ਉਸ ਦੀ ਭਾਲ ਦੌਰਾਨ ਉਸ ਦੇ ਗੁਜਰਾਤ ਵਿੱਚ ਲੁਕੇ ਹੋਣ ਦੀ ਸੂਚਨਾ ਮਿਲੀ, ਜਿਸ ਤੋਂ ਬਾਅਦ ਵਡੋਦਰਾ ਵਿੱਚ ਛਾਪਾ ਮਾਰ ਕੇ ਉਸ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਸੁਰਜੀਤ ਅੰਮ੍ਰਿਤਸਰ ਦੇ ਮੁਸਤਫਾਬਾਦ ਦਾ ਰਹਿਣ ਵਾਲਾ ਹੈ। ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਹੈ ਕਿ ਉਸ ਖ਼ਿਲਾਫ਼ ਸਾਲ 2013 ਵਿੱਚ ਅੰਮ੍ਰਿਤਸਰ ਦੇ ਥਾਣਾ ਸਦਰ ਵਿੱਚ ਕਤਲ ਦੀ ਕੋਸ਼ਿਸ਼ ਅਤੇ ਆਰਮਜ਼ ਐਕਟ ਤਹਿਤ ਕੇਸ ਦਰਜ ਹੋਏ ਸਨ। ਆਈਜੀ ਭੁੱਲਰ ਮੁਤਾਬਕ ਮੁੱਖ ਮੁਲਜ਼ਮ ਨੂੰ ਗੁਜਰਾਤ ਤੋਂ ਪੰਜਾਬ ਲਿਆਂਦਾ ਜਾ ਰਿਹਾ ਹੈ। ਇੱਥੇ ਅਦਾਲਤ ਵਿੱਚ ਪੇਸ਼ ਕਰਕੇ ਉਸ ਦਾ ਪੁਲਿਸ ਰਿਮਾਂਡ ਹਾਸਲ ਕੀਤਾ ਜਾਵੇਗਾ।
ਡਰਾਈਵਰ ਦੀ ਛਾਤੀ ’ਤੇ ਪਿਸਤੌਲ ਰੱਖ ਕੇ ਖੋਹੀ ਸੀ ਕਾਰ
ਇਹ ਘਟਨਾ 15 ਨਵੰਬਰ ਨੂੰ ਪਠਾਨਕੋਟ ਦੇ ਡਾਊਨਟਾਊਨ ਇਲਾਕੇ ਵਿੱਚ ਵਾਪਰੀ ਸੀ। ਐੱਫਆਈਆਰ ਮੁਤਾਬਕ ਬਮਿਆਲ ਦੇ ਮਹਾਵੀਰ ਮੁਹੱਲੇ ਦੇ ਰਹਿਣ ਵਾਲੇ ਪ੍ਰਵੀਨ ਸਿੰਘ ਨੇ ਪੁਲਿਸ ਨੂੰ ਦੱਸਿਆ ਸੀ ਕਿ ਉਹ ਪ੍ਰਤਾਪ ਵਰਲਡ ਸਕੂਲ ਦੀ ਬੱਸ ਚਲਾਉਂਦਾ ਹੈ। ਘਟਨਾ ਵਾਲੀ ਰਾਤ ਉਹ ਆਪਣੇ ਜਾਣਕਾਰ ਸਨੀ ਵਰਮਾ ਦੇ ਪਰਿਵਾਰ ਨੂੰ XUV-500 ਵਿੱਚ ਲੈ ਕੇ ਡਾਊਨਟਾਊਨ ਪੁਲ ਨੰਬਰ-5 ਨੇੜੇ ਪਹੁੰਚਿਆ ਸੀ। ਪਰਿਵਾਰ ਦੇ ਘੁੰਮਣ ਜਾਣ ਤੋਂ ਬਾਅਦ ਪ੍ਰਵੀਨ ਨੇ ਹਾਈਵੇਅ ਕਿਨਾਰੇ ਗੱਡੀ ਖੜ੍ਹੀ ਕਰ ਲਈ ਅਤੇ ਅੰਦਰ ਹੀ ਬੈਠਾ ਰਿਹਾ। ਇਸੇ ਦੌਰਾਨ ਕਾਲਾ ਪਰਨਾ ਬੰਨ੍ਹਿਆ ਇੱਕ ਨੌਜਵਾਨ ਉੱਥੇ ਆਇਆ ਅਤੇ ਉਸ ਦੀ ਛਾਤੀ ’ਤੇ ਪਿਸਤੌਲ ਤਾਣ ਦਿੱਤੀ। ਮੁਲਜ਼ਮ ਨੇ ਥੱਪੜ ਮਾਰਦਿਆਂ ਗੱਡੀ ਵਿੱਚੋਂ ਤੁਰੰਤ ਉਤਰਨ ਲਈ ਕਿਹਾ ਅਤੇ ਗੋਲੀ ਮਾਰਨ ਦੀ ਧਮਕੀ ਦਿੱਤੀ। ਡਰਾਈਵਰ ਦੇ ਹੇਠਾਂ ਉਤਰਦਿਆਂ ਹੀ ਮੁਲਜ਼ਮ ਚਿੱਟੇ ਰੰਗ ਦੀ XUV-500 ਲੈ ਕੇ ਮਾਧੋਪੁਰ ਅਤੇ ਕਠੂਆ-ਜੰਮੂ ਵੱਲ ਫਰਾਰ ਹੋ ਗਿਆ।
ਅੱਤਵਾਦੀ ਹਮਲਿਆਂ ਦੇ ਪੁਰਾਣੇ ਮਾਮਲਿਆਂ ਕਾਰਨ ਵਧੀ ਸੀ ਚੌਕਸੀ
ਗੱਡੀ ਲੁੱਟੇ ਜਾਣ ਤੋਂ ਬਾਅਦ ਪੰਜਾਬ ਅਤੇ ਜੰਮੂ-ਕਸ਼ਮੀਰ ਵਿੱਚ ਸੁਰੱਖਿਆ ਏਜੰਸੀਆਂ ਨੂੰ ਚੌਕਸ ਕੀਤਾ ਗਿਆ ਸੀ। ਇਸ ਦਾ ਇੱਕ ਕਾਰਨ ਪੰਜਾਬ ਵਿੱਚ ਪਹਿਲਾਂ ਲੁੱਟੇ ਹੋਏ ਵਾਹਨਾਂ ਦੀ ਵਰਤੋਂ ਕਰਕੇ ਕੀਤੇ ਗਏ ਦੋ ਅੱਤਵਾਦੀ ਹਮਲੇ ਵੀ ਸਨ। ਸਾਲ 2015 ਵਿੱਚ ਦੀਨਾਨਗਰ ਪੁਲਿਸ ਥਾਣੇ ’ਤੇ ਹਮਲੇ ਤੋਂ ਪਹਿਲਾਂ ਅੱਤਵਾਦੀਆਂ ਨੇ ਕਾਰ ਖੋਹੀ ਸੀ, ਜਦਕਿ ਜਨਵਰੀ 2016 ਵਿੱਚ ਪਠਾਨਕੋਟ ਏਅਰਬੇਸ ਹਮਲੇ ਤੋਂ ਪਹਿਲਾਂ ਟੈਕਸੀ ਡਰਾਈਵਰ ਦੀ ਹੱਤਿਆ ਕਰਕੇ ਇਨੋਵਾ ਅਤੇ ਪੁਲਿਸ ਅਧਿਕਾਰੀ ਦੀ ਐੱਸਯੂਵੀ ਖੋਹੀ ਗਈ ਸੀ। ਇਸ ਮਾਮਲੇ ਵਿੱਚ ਜੰਮੂ ਪੁਲਿਸ ਦੇ ਕੰਟਰੋਲ ਰੂਮ ਵੱਲੋਂ ਵੀ ਅਲਰਟ ਜਾਰੀ ਕੀਤਾ ਗਿਆ ਸੀ। ਸ਼ੁਰੂਆਤੀ ਸੂਚਨਾ ਵਿੱਚ ਡਰਾਈਵਰ ਨੂੰ ਗੱਡੀ ਸਮੇਤ ਅਗਵਾ ਕੀਤੇ ਜਾਣ ਦਾ ਖ਼ਦਸ਼ਾ ਜਤਾਇਆ ਗਿਆ ਸੀ, ਪਰ ਬਾਅਦ ਵਿੱਚ ਐੱਫਆਈਆਰ ਵਿੱਚ ਦਰਜ ਬਿਆਨ ਤੋਂ ਸਪੱਸ਼ਟ ਹੋਇਆ ਕਿ ਡਰਾਈਵਰ ਨੂੰ ਅਗਵਾ ਨਹੀਂ ਕੀਤਾ ਗਿਆ ਸੀ, ਸਗੋਂ ਪਿਸਤੌਲ ਦੀ ਨੋਕ ’ਤੇ ਗੱਡੀ ਵਿੱਚੋਂ ਉਤਾਰ ਕੇ ਵਾਹਨ ਲੁੱਟਿਆ ਗਿਆ ਸੀ। ਗੱਡੀ ਦੇ ਮਾਲਕ ਦਾ ਪਰਿਵਾਰ ਵੀ ਸੁਰੱਖਿਅਤ ਸੀ।





