ਭਾਜਪਾ ਦੀ ਨਵੀਂ ਟੀਮ ਦਾ ਅੱਜ ਹੋ ਸਕਦੈ ਐਲਾਨ, ਨਿਤਿਨ ਨਵੀਨ ਨੇ ਤਿਆਰੀ ਕੀਤੀ ਮੁਕੰਮਲ
ਨਵੀਂ ਦਿੱਲੀ, 17 ਅਗਸਤ 2026-
ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੇ ਸੰਗਠਨ ਵਿੱਚ ਵੱਡੇ ਬਦਲਾਅ ਦੀਆਂ ਚਰਚਾਵਾਂ ਤੇਜ਼ ਹੋ ਗਈਆਂ ਹਨ। ਸੂਤਰਾਂ ਮੁਤਾਬਕ ਪਾਰਟੀ ਦੇ ਕੌਮੀ ਪ੍ਰਧਾਨ ਨਿਤਿਨ ਨਵੀਨ ਨੇ ਆਪਣੀ ਨਵੀਂ ਟੀਮ ਨੂੰ ਅੰਤਿਮ ਰੂਪ ਦੇ ਦਿੱਤਾ ਹੈ ਅਤੇ ਅੱਜ ਇਸ ਦਾ ਅਧਿਕਾਰਤ ਐਲਾਨ ਹੋਣ ਦੀ ਸੰਭਾਵਨਾ ਹੈ। ਜਨਵਰੀ ਵਿੱਚ ਕੌਮੀ ਪ੍ਰਧਾਨ ਦੀ ਜ਼ਿੰਮੇਵਾਰੀ ਸੰਭਾਲਣ ਤੋਂ ਬਾਅਦ ਨਿਤਿਨ ਨਵੀਨ ਦੀ ਟੀਮ ਦਾ ਗਠਨ ਲੰਬਿਤ ਚੱਲ ਰਿਹਾ ਸੀ।
ਨਵੀਂ ਟੀਮ ਵਿੱਚ ਵੱਧ ਤੋਂ ਵੱਧ 13 ਕੌਮੀ ਮੀਤ ਪ੍ਰਧਾਨ, 9 ਕੌਮੀ ਜਨਰਲ ਸਕੱਤਰ, ਜਿਨ੍ਹਾਂ ਵਿੱਚ ਇੱਕ ਸੰਗਠਨ ਮਹਾਮੰਤਰੀ ਵੀ ਸ਼ਾਮਲ ਹੋਵੇਗਾ, ਅਤੇ 15 ਸਕੱਤਰ ਨਿਯੁਕਤ ਕੀਤੇ ਜਾ ਸਕਦੇ ਹਨ। ਇਸ ਤੋਂ ਇਲਾਵਾ ਇੱਕ ਕੌਮੀ ਖ਼ਜ਼ਾਨਚੀ ਦੀ ਨਿਯੁਕਤੀ ਵੀ ਕੀਤੀ ਜਾਣੀ ਹੈ।
ਭਾਜਪਾ ਦੇ ਸੰਵਿਧਾਨ ਵਿੱਚ ਕੀਤੇ ਗਏ ਸੋਧ ਮੁਤਾਬਕ ਕੌਮੀ ਅਹੁਦਿਆਂ ਵਿੱਚ 33 ਫ਼ੀਸਦੀ ਹਿੱਸਾ ਮਹਿਲਾਵਾਂ ਲਈ ਰਾਖਵਾਂ ਹੈ। ਇਸ ਤਹਿਤ 38 ਕੌਮੀ ਅਹੁਦੇਦਾਰਾਂ ਵਿੱਚ ਘੱਟੋ-ਘੱਟ 13 ਮਹਿਲਾਵਾਂ ਹੋਣੀਆਂ ਲਾਜ਼ਮੀ ਹਨ। ਇਸੇ ਤਰ੍ਹਾਂ ਅਨੁਸੂਚਿਤ ਜਾਤੀ ਅਤੇ ਅਨੁਸੂਚਿਤ ਜਨਜਾਤੀ ਵਰਗਾਂ ਵਿੱਚੋਂ ਘੱਟੋ-ਘੱਟ ਤਿੰਨ-ਤਿੰਨ ਅਹੁਦੇਦਾਰ ਸ਼ਾਮਲ ਕੀਤੇ ਜਾਣੇ ਹਨ।
ਨਵੀਂ ਕੌਮੀ ਟੀਮ ਦੇ ਨਾਲ ਪਾਰਟੀ ਦੀ ਸਭ ਤੋਂ ਉੱਚੀ ਫ਼ੈਸਲਾ ਲੈਣ ਵਾਲੀ ਸੰਸਥਾ ਪਾਰਲੀਮੈਂਟਰੀ ਬੋਰਡ ਦਾ ਵੀ ਪੁਨਰਗਠਨ ਹੋਵੇਗਾ। ਖੇਤਰੀ ਅਤੇ ਸਮਾਜਿਕ ਸੰਤੁਲਨ ਨੂੰ ਧਿਆਨ ਵਿੱਚ ਰੱਖਦਿਆਂ ਕੇਂਦਰੀ ਚੋਣ ਕਮੇਟੀ ਵਿੱਚ ਵੀ ਬਦਲਾਅ ਕੀਤੇ ਜਾਣ ਦੀ ਸੰਭਾਵਨਾ ਹੈ।