- ਮੱਧ ਪ੍ਰਦੇਸ਼ ਦੇ ਰਤਲਾਮ ਨੇੜੇ ਲੂਣੀ-ਵਿਕਰਮਗੜ੍ਹ ਵਿਚਕਾਰ ਵਾਪਰਿਆ ਭਿਆਨਕ ਹਾਦਸਾ
- ਟ੍ਰੇਨ ਦਾ ਥਰਡ AC (B1 ਕੋਚ) ਅਤੇ ਐੱਸ.ਐੱਲ.ਆਰ. (SLR) ਕੋਚ ਸੜ ਕੇ ਪੂਰੀ ਤਰ੍ਹਾਂ ਸੁਆਹ
- ਗਾਰਡ ਅਤੇ RPF ਸਟਾਫ਼ ਦੀ ਮੁਸਤੈਦੀ ਨਾਲ ਟ੍ਰੇਨ ‘ਚੋਂ ਸੁਰੱਖਿਅਤ ਬਾਹਰ ਕੱਢੇ ਗਏ 68 ਯਾਤਰੀ
ਰਤਲਾਮ/ਨਵੀਂ ਦਿੱਲੀ, 17 ਮਈ 2026: ਤ੍ਰਿਵੇਂਦਰਮ ਤੋਂ ਹਜ਼ਰਤ ਨਿਜ਼ਾਮੂਦੀਨ (ਦਿੱਲੀ) ਜਾ ਰਹੀ ਰਾਜਧਾਨੀ ਐਕਸਪ੍ਰੈੱਸ (12431) ਦੇ ਦੋ ਕੋਚਾਂ ਵਿੱਚ ਐਤਵਾਰ ਸਵੇਰੇ ਭਿਆਨਕ ਅੱਗ ਲੱਗਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਇਹ ਹਾਦਸਾ ਮੱਧ ਪ੍ਰਦੇਸ਼ ਦੇ ਰਤਲਾਮ ਤੋਂ ਲਗਭਗ 110 ਕਿਲੋਮੀਟਰ ਦੂਰ ਲੂਣੀ-ਵਿਕਰਮਗੜ੍ਹ ਰੇਲਵੇ ਸਟੇਸ਼ਨਾਂ ਦੇ ਵਿਚਕਾਰ ਵਾਪਰਿਆ। ਅੱਗ ਲੱਗਣ ਕਾਰਨ ਟ੍ਰੇਨ ਦੇ ਮੁਸਾਫ਼ਰਾਂ ਵਿੱਚ ਭਗਦੜ ਅਤੇ ਹਫੜਾ ਦਫੜੀ ਦਾ ਮਾਹੌਲ ਬਣ ਗਿਆ। ਇਸ ਹਾਦਸੇ ਕਾਰਨ ਮੁੱਖ ਦਿੱਲੀ-ਮੁੰਬਈ ਰੇਲ ਮਾਰਗ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਇਆ ਹੈ।
ਜਾਣਕਾਰੀ ਅਨੁਸਾਰ, ਦਿੱਲੀ ਵੱਲ ਜਾ ਰਹੀ ਇਸ ਸੁਪਰਫਾਸਟ ਟ੍ਰੇਨ ਦੇ ਬੀ-1 (B1) ਕੋਚ ਵਿੱਚ ਐਤਵਾਰ ਸਵੇਰੇ ਤੜਕੇ ਲਗਭਗ 5:30 ਵਜੇ ਅਚਾਨਕ ਅੱਗ ਸੁਲਗ ਗਈ। ਅੱਗ ਇੰਨੀ ਭਿਆਨਕ ਸੀ ਕਿ ਦੇਖਦੇ ਹੀ ਦੇਖਦੇ ਇਸ ਨੇ ਟ੍ਰੇਨ ਦੇ ਥਰਡ AC ਕੋਚ (B1) ਅਤੇ ਉਸ ਦੇ ਨਾਲ ਲੱਗਦੇ ਐੱਸ.ਐੱਲ.ਆਰ. (SLR) ਕੋਚ ਨੂੰ ਪੂਰੀ ਤਰ੍ਹਾਂ ਆਪਣੀ ਲਪੇਟ ਵਿੱਚ ਲੈ ਲਿਆ ਅਤੇ ਦੋਵੇਂ ਕੋਚ ਸੜ ਕੇ ਖ਼ਾਕ ਹੋ ਗਏ। ਅਸਮਾਨ ਵਿੱਚ ਉੱਠਦੀਆਂ ਅੱਗ ਦੀਆਂ ਉੱਚੀਆਂ ਲਪਟਾਂ ਅਤੇ ਧੂੰਏਂ ਨੂੰ ਦੇਖ ਕੇ ਆਸ-ਪਾਸ ਦੇ ਪੂਰੇ ਇਲਾਕੇ ਵਿੱਚ ਹੜਕੰਪ ਮਚ ਗਿਆ।
ਜਿਸ ਸਮੇਂ ਅੱਗ ਲੱਗੀ, ਉਸ ਵੇਲੇ ਕੋਚ ਨੰਬਰ B1 ਵਿੱਚ 68 ਯਾਤਰੀ ਸਵਾਰ ਸਨ। ਕੁਝ ਹੀ ਸੈਕੰਡਾਂ ਵਿੱਚ ਅੱਗ ਪੂਰੇ ਕੋਚ ਵਿੱਚ ਫੈਲ ਗਈ। ਟ੍ਰੇਨ ਦੇ ਗਾਰਡ ਨੇ ਮੁਸਤੈਦੀ ਦਿਖਾਉਂਦੇ ਹੋਏ ਤੁਰੰਤ ਇਸ ਦੀ ਸੂਚਨਾ ਲੋਕੋ ਪਾਇਲਟ (ਡਰਾਈਵਰ) ਨੂੰ ਦਿੱਤੀ, ਜਿਸ ਤੋਂ ਬਾਅਦ ਟ੍ਰੇਨ ਨੂੰ ਐਮਰਜੈਂਸੀ ਬ੍ਰੇਕ ਲਗਾ ਕੇ ਤੁਰੰਤ ਰੋਕਿਆ ਗਿਆ।
ਟ੍ਰੇਨ ਰੁਕਦੇ ਹੀ ਮੌਜੂਦ ਆਰ.ਪੀ.ਐੱਫ. (RPF) ਸਟਾਫ਼ ਅਤੇ ਹੋਰ ਰੇਲ ਕਰਮਚਾਰੀਆਂ ਨੇ ਤੁਰੰਤ ਮੋਰਚਾ ਸੰਭਾਲਿਆ ਅਤੇ ਮੁਸਾਫ਼ਰਾਂ ਨੂੰ ਬਾਹਰ ਕੱਢਣ (De-boarding) ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ। ਮਹਿਜ਼ 15 ਮਿੰਟਾਂ ਦੇ ਅੰਦਰ-ਅੰਦਰ ਪੂਰੇ ਕੋਚ ਨੂੰ ਸੁਰੱਖਿਅਤ ਖ਼ਾਲੀ ਕਰਵਾ ਲਿਆ ਗਿਆ, ਜਿਸ ਕਾਰਨ ਇੱਕ ਵੱਡਾ ਜਾਨੀ ਨੁਕਸਾਨ ਹੋਣੋਂ ਬਚ ਗਿਆ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਕੋਟਾ ਰੇਲ ਮੰਡਲ ਤੋਂ ਰਾਹਤ ਅਤੇ ਬਚਾਅ ਟੀਮਾਂ ਫ਼ਾਇਰ ਬ੍ਰਿਗੇਡ ਸਮੇਤ ਮੌਕੇ ਲਈ ਰਵਾਨਾ ਹੋਈਆਂ। ਰੇਲ ਮਾਰਗ ਪ੍ਰਭਾਵਿਤ ਹੋਣ ਕਾਰਨ ਇਸ ਰੂਟ ‘ਤੇ ਚੱਲਣ ਵਾਲੀਆਂ ਕਈ ਹੋਰ ਟ੍ਰੇਨਾਂ ਨੂੰ ਵੱਖ-ਵੱਖ ਸਟੇਸ਼ਨਾਂ ‘ਤੇ ਹੀ ਰੋਕਣਾ ਪਿਆ ਹੈ। ਰੇਲਵੇ ਪ੍ਰਸ਼ਾਸਨ ਵੱਲੋਂ ਅੱਗ ਲੱਗਣ ਦੇ ਅਸਲ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।