Roadways bus stolen from inside the bus stand! ਕਰ ਲਓ ਘਿਓ ਨੂੰ ਭਾਂਡਾ! ਬੱਸ ਸਟੈਂਡ ਦੇ ਅੰਦਰੋਂ ਰੋਡਵੇਜ਼ ਦੀ ਬੱਸ ਚੋਰੀ
ਚਰਖੀ ਦਾਦਰੀ, 5 ਜੁਲਾਈ 2026- ਚੋਰਾਂ ਦੇ ਹੌਸਲੇ ਇਸ ਕਦਰ ਬੁਲੰਦ ਹੋ ਚੁੱਕੇ ਹਨ ਕਿ ਹੁਣ ਉਹ ਆਮ ਵਾਹਨਾਂ ਨੂੰ ਛੱਡ ਕੇ ਸਰਕਾਰੀ ਜਾਇਦਾਦਾਂ ਨੂੰ ਵੀ ਨਿਸ਼ਾਨਾ ਬਣਾਉਣ ਲੱਗੇ ਹਨ। ਅਜਿਹਾ ਹੀ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਹਰਿਆਣਾ ਦੇ ਚਰਖੀ ਦਾਦਰੀ ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਚੋਰਾਂ ਨੇ ਸਿੱਧਾ ਬੱਸ ਸਟੈਂਡ ਕੰਪਲੈਕਸ ਦੇ ਅੰਦਰੋਂ ਹੀ ਹਰਿਆਣਾ ਰੋਡਵੇਜ਼ ਦੀ ਬੱਸ ‘ਤੇ ਹੱਥ ਸਾਫ਼ ਕਰ ਦਿੱਤਾ। ਇਸ ਸੁਰੱਖਿਆ ਚੂਕ ਤੋਂ ਬਾਅਦ ਰੋਡਵੇਜ਼ ਵਿਭਾਗ ਅਤੇ ਪੁਲਿਸ ਪ੍ਰਸ਼ਾਸਨ ਵਿੱਚ ਹੜਕੰਪ ਮਚ ਗਿਆ ਹੈ। ਸਵੇਰੇ ਜਦੋਂ ਡਰਾਈਵਰ ਬੱਸ ਸਟੈਂਡ ਪਹੁੰਚਿਆ ਤਾਂ ਬੱਸ ਨੂੰ ਗਾਇਬ ਦੇਖ ਕੇ ਉਸ ਦੇ ਹੋਸ਼ ਉੱਡ ਗਏ।
ਮਿਲੀ ਜਾਣਕਾਰੀ ਅਨੁਸਾਰ ਚੋਰੀ ਹੋਈ ਬੱਸ ਭਿਵਾਨੀ ਡਿਪੂ ਦੇ ਲੋਹਾਰੂ ਸਬ-ਡਿਪੂ ਦੀ ਸੀ, ਜਿਸ ਦਾ ਨੰਬਰ HR55GV-3683 ਹੈ। ਬੱਸ ਦੇ ਚਾਲਕ ਮਹਿੰਦਰ ਸਿੰਘ ਬੀਤੀ ਦੇਰ ਸ਼ਾਮ ਆਪਣੀ ਡਿਊਟੀ ਖ਼ਤਮ ਕਰਨ ਤੋਂ ਬਾਅਦ ਬੱਸ ਨੂੰ ਨਾਈਟ ਸਟੇਅ ਲਈ ਚਰਖੀ ਦਾਦਰੀ ਬੱਸ ਸਟੈਂਡ ‘ਤੇ ਖੜ੍ਹੀ ਕਰਕੇ ਗਏ ਸਨ। ਘਟਨਾ ਦਾ ਖੁਲਾਸਾ ਸਵੇਰੇ ਉਦੋਂ ਹੋਇਆ ਜਦੋਂ ਬੱਸ ਚਾਲਕ ਮਹਿੰਦਰ ਸਿੰਘ ਆਪਣੀ ਨਿਰਧਾਰਤ ਡਿਊਟੀ ਲਈ ਸਵੇਰੇ-ਸਵੇਰੇ ਬੱਸ ਸਟੈਂਡ ਪਹੁੰਚੇ।
ਉੱਥੇ ਬੱਸ ਨੂੰ ਨਾ ਪਾ ਕੇ ਉਨ੍ਹਾਂ ਦੇ ਹੋਸ਼ ਉੱਡ ਗਏ। ਉਨ੍ਹਾਂ ਨੇ ਤੁਰੰਤ ਇਸ ਦੀ ਸੂਚਨਾ ਰੋਡਵੇਜ਼ ਅਧਿਕਾਰੀਆਂ ਅਤੇ ਸਥਾਨਕ ਪੁਲਿਸ ਨੂੰ ਦਿੱਤੀ। ਬੱਸ ਸਟੈਂਡ ਵਰਗੀ ਸੁਰੱਖਿਅਤ ਮੰਨੀ ਜਾਣ ਵਾਲੀ ਜਨਤਕ ਥਾਂ ਤੋਂ ਸਰਕਾਰੀ ਬੱਸ ਗਾਇਬ ਹੋਣ ਦੀ ਖ਼ਬਰ ਫੈਲਦਿਆਂ ਹੀ ਵਿਭਾਗ ਵਿੱਚ ਖਲਬਲੀ ਮਚ ਗਈ।
ਫਾਸਟੈਗ (FASTag) ਰਾਹੀਂ 535 ਕਿਲੋਮੀਟਰ ਦੂਰ ਮਿਲੀ ਲੋਕੇਸ਼ਨ
ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਪੁਲਿਸ ਅਤੇ ਰੋਡਵੇਜ਼ ਵਿਭਾਗ ਨੇ ਤੁਰੰਤ ਬੱਸ ਸਟੈਂਡ ਕੰਪਲੈਕਸ ਅਤੇ ਉਸ ਦੇ ਆਸ-ਪਾਸ ਲੱਗੇ ਸੀਸੀਟੀਵੀ (CCTV) ਕੈਮਰਿਆਂ ਦੀ ਫੁਟੇਜ ਖੰਗਾਲਣੀ ਸ਼ੁਰੂ ਕੀਤੀ। ਇਸ ਤੋਂ ਬਾਅਦ ਫਾਸਟੈਗ ਰਾਹੀਂ ਬੱਸ ਦੀ ਲੋਕੇਸ਼ਨ 535 ਕਿਲੋਮੀਟਰ ਦੂਰ ਰਾਜਸਥਾਨ ਦੇ ਚਿੱਤੌੜਗੜ੍ਹ ਤੋਂ ਮਿਲੀ, ਜਿਸ ਤੋਂ ਬਾਅਦ ਰਾਜਸਥਾਨ ਪੁਲਿਸ ਦੀ ਮਦਦ ਨਾਲ ਬੱਸ ਨੂੰ ਚਿੱਤੌੜਗੜ੍ਹ ਤੋਂ ਬਰਾਮਦ ਕੀਤੇ ਜਾਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ।
ਰੋਡਵੇਜ਼ ਡਿਪੂ ਦੇ ਸਟੇਸ਼ਨ ਸੁਪਰਵਾਈਜ਼ਰ (SM) ਸਤੀਸ਼ ਦੂਹਨ ਨੇ ਦੱਸਿਆ ਕਿ ਜਾਂਚ ਦੌਰਾਨ ਜਦੋਂ ਸੀਸੀਟੀਵੀ ਕੈਮਰੇ ਖੰਗਾਲੇ ਗਏ ਤਾਂ ਪਤਾ ਲੱਗਿਆ ਕਿ ਇਸ ਵਾਰਦਾਤ ਨੂੰ ਰਾਤ ਨੂੰ ਕਰੀਬ 8:53 ਵਜੇ ਹੀ ਅੰਜਾਮ ਦੇ ਦਿੱਤਾ ਗਿਆ ਸੀ। ਕੋਈ ਅਣਪਛਾਤਾ ਵਿਅਕਤੀ ਬੱਸ ਨੂੰ ਬੱਸ ਅੱਡੇ ਤੋਂ ਲੈ ਕੇ ਬਾਹਰ ਨਿਕਲਿਆ ਹੈ। ਬੱਸ ਚਾਲਕ ਮਹਿੰਦਰ ਸਿੰਘ ਵੱਲੋਂ ਇਸ ਸਬੰਧੀ ਬੱਸ ਅੱਡਾ ਪੁਲਿਸ ਚੌਕੀ ਵਿੱਚ ਲਿਖਤੀ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਗਈ ਹੈ। ਦੂਜੇ ਪਾਸੇ ਰੋਡਵੇਜ਼ ਵਿਭਾਗ ਵੱਲੋਂ ਇਸ ਵੱਡੀ ਲਾਪਰਵਾਹੀ ਅਤੇ ਚੋਰੀ ਦੀ ਘਟਨਾ ਨੂੰ ਲੈ ਕੇ ਵਿਭਾਗੀ ਪੱਧਰ ‘ਤੇ ਵੀ ਲੋੜੀਂਦੀ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾ ਰਹੀ ਹੈ।