ਸਰਕਾਰੀ ਹਸਪਤਾਲ ਦੀ ਜਾਨਲੇਵਾ ਲਾਪਰਵਾਹੀ! BP ਦੀ ਮਰੀਜ਼ ਨੂੰ ਚੜ੍ਹਾਈ ‘ਐਕਸਪਾਇਰਡ’ ਗਲੂਕੋਜ਼ ਦੀ ਬੋਤਲ, ਸਰੀਰ ‘ਚ ਫੈਲੀ ਸੋਜ
ਬਨਾਸਕਾਂਠਾ (ਗੁਜਰਾਤ), 14 ਜੁਲਾਈ 2026- ਗੁਜਰਾਤ ਦੀਆਂ ਸਰਕਾਰੀ ਸਿਹਤ ਸੇਵਾਵਾਂ ਅਤੇ ਡਾਕਟਰਾਂ ਦੀ ਮੁਸਤੈਦੀ ‘ਤੇ ਇੱਕ ਵਾਰ ਫਿਰ ਵੱਡਾ ਸਵਾਲੀਆ ਨਿਸ਼ਾਨ ਖੜ੍ਹਾ ਹੋ ਗਿਆ ਹੈ। ਸੂਬੇ ਦੇ ਬਨਾਸਕਾਂਠਾ ਜ਼ਿਲ੍ਹੇ ਅਧੀਨ ਪੈਂਦੇ ਦਾਤਾ (Danta) ਦੇ ਇੱਕ ਸਰਕਾਰੀ ਹਸਪਤਾਲ ਵਿੱਚ ਡਿਊਟੀ ‘ਤੇ ਤਾਇਨਾਤ ਸਟਾਫ਼ ਦੀ ਇੱਕ ਬੇਹੱਦ ਗੰਭੀਰ ਅਤੇ ਜਾਨਲੇਵਾ ਲਾਪਰਵਾਹੀ ਸਾਹਮਣੇ ਆਈ ਹੈ।
ਇੱਥੇ ਇਲਾਜ ਲਈ ਆਈ ਬਲੱਡ ਪ੍ਰੈਸ਼ਰ (ਬੀ.ਪੀ.) ਦੀ ਇੱਕ ਮਹਿਲਾ ਮਰੀਜ਼ ਨੂੰ ਐਕਸਪਾਇਰ (ਮਿਆਦ ਪੁੱਗ ਚੁੱਕੀ) ਹੋ ਚੁੱਕੀ ਗਲੂਕੋਜ਼ ਦੀ ਬੋਤਲ ਚੜ੍ਹਾ ਦਿੱਤੀ ਗਈ। ਇਸ ਭਿਆਨਕ ਲਾਪਰਵਾਹੀ ਕਾਰਨ ਮਹਿਲਾ ਦੇ ਸਰੀਰ ਵਿੱਚ ਤੇਜ਼ੀ ਨਾਲ ਰਿਐਕਸ਼ਨ ਹੋ ਗਿਆ ਅਤੇ ਉਸ ਦੇ ਅੰਗਾਂ ਵਿੱਚ ਭਾਰੀ ਸੋਜ ਆ ਗਈ, ਜਿਸ ਨਾਲ ਮਰੀਜ਼ ਦੀ ਹਾਲਤ ਹੋਰ ਜ਼ਿਆਦਾ ਵਿਗੜ ਗਈ।
ਮਹਿਲਾ ਦੀ ਵਿਗੜਦੀ ਹਾਲਤ ਨੂੰ ਦੇਖ ਕੇ ਪਰਿਵਾਰਕ ਮੈਂਬਰਾਂ ਵਿੱਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। ਮਾਮਲਾ ਭਖਦਾ ਦੇਖ ਕੇ ਹਸਪਤਾਲ ਪ੍ਰਸ਼ਾਸਨ ਨੇ ਆਪਣੀ ਇਸ ਵੱਡੀ ਅਤੇ ਜਾਨਲੇਵਾ ਚੂਕ ਨੂੰ ਸਵੀਕਾਰ ਕਰ ਲਿਆ ਹੈ। ਪ੍ਰਸ਼ਾਸਨ ਵੱਲੋਂ ਪੀੜਤ ਪਰਿਵਾਰ ਨੂੰ ਵਿਸ਼ਵਾਸ ਦਿਵਾਇਆ ਗਿਆ ਹੈ ਕਿ ਡਿਊਟੀ ‘ਤੇ ਮੌਜੂਦ ਦੋਸ਼ੀ ਸਟਾਫ਼ ਮੈਂਬਰਾਂ ਦੀ ਨਿਸ਼ਾਨਦੇਹੀ ਕਰਕੇ ਉਨ੍ਹਾਂ ਖ਼ਿਲਾਫ਼ ਸਖ਼ਤ ਤੋਂ ਸਖ਼ਤ ਵਿਭਾਗੀ ਕਾਰਵਾਈ ਕੀਤੀ ਜਾਵੇਗੀ।