ਪੰਜਾਬ ਯੂਨੀਵਰਸਿਟੀ ਦੇ 45 ਅਧਿਆਪਕਾਂ ਦੀ ਚਿੱਠੀ ਨੇ ਖੜ੍ਹਾ ਕੀਤਾ ਨਵਾਂ ਵਿਵਾਦ!
ਚੰਡੀਗੜ੍ਹ 19 ਸਤੰਬਰ 2026
ਪੰਜਾਬ ਯੂਨੀਵਰਸਿਟੀ ਟੀਚਰਜ਼ ਐਸੋਸੀਏਸ਼ਨ (ਪੁਟਾ) ਦੇ 45 ਅਧਿਆਪਕਾਂ ਨੇ ਐਸੋਸੀਏਸ਼ਨ ਦੇ ਪ੍ਰਧਾਨ ਨੂੰ ਪੱਤਰ ਲਿਖ ਕੇ ਐਮਰਜੈਂਸੀ ਜਨਰਲ ਬਾਡੀ ਮੀਟਿੰਗ (ਜੀਬੀਐਮ) ਬੁਲਾਉਣ ਦੀ ਮੰਗ ਕੀਤੀ ਹੈ। ਇਹ ਮੰਗ ਪੁਟਾ ਦੀ ਸਾਲ 2026-27 ਲਈ ਚੋਣ ਪ੍ਰਕਿਰਿਆ ਅਤੇ ਜਾਰੀ ਕੀਤੇ ਗਏ ਚੋਣ ਕਾਰਜਕ੍ਰਮ ਨੂੰ ਲੈ ਕੇ ਕੀਤੀ ਗਈ ਹੈ।
ਪੱਤਰ ਵਿੱਚ ਅਧਿਆਪਕਾਂ ਨੇ ਕਿਹਾ ਕਿ ਪੁਟਾ ਦੇ ਸੰਵਿਧਾਨ ਅਨੁਸਾਰ ਚੋਣਾਂ ਨਿਰਧਾਰਤ ਸਮਾਂ-ਸੀਮਾ ਅੰਦਰ ਕਰਵਾਈਆਂ ਜਾਣੀਆਂ ਚਾਹੀਦੀਆਂ ਸਨ, ਪਰ ਹੁਣ ਤੱਕ ਇਹ ਪ੍ਰਕਿਰਿਆ ਤੈਅ ਸਮੇਂ ਅਨੁਸਾਰ ਨਹੀਂ ਹੋ ਸਕੀ। ਅਧਿਆਪਕਾਂ ਨੇ ਦੋਸ਼ ਲਾਇਆ ਕਿ ਹਾਲ ਹੀ ਵਿੱਚ ਜਾਰੀ ਕੀਤਾ ਗਿਆ ਚੋਣ ਕਾਰਜਕ੍ਰਮ ਜਲਦਬਾਜ਼ੀ ਅਤੇ ਇਕਪਾਸੜ ਢੰਗ ਨਾਲ ਤੈਅ ਕੀਤਾ ਗਿਆ ਹੈ।
ਉਨ੍ਹਾਂ ਦਾ ਕਹਿਣਾ ਹੈ ਕਿ ਕਾਰਜਕ੍ਰਮ ਤੈਅ ਕਰਨ ਤੋਂ ਪਹਿਲਾਂ ਐਸੋਸੀਏਸ਼ਨ ਦੇ ਮੈਂਬਰਾਂ ਨਾਲ ਲੋੜੀਂਦੀ ਵਿਚਾਰ-ਵਟਾਂਦਰੇ ਦੀ ਪ੍ਰਕਿਰਿਆ ਨਹੀਂ ਅਪਣਾਈ ਗਈ। ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਜਨਰਲ ਬਾਡੀ ਐਸੋਸੀਏਸ਼ਨ ਦਾ ਸਰਵਉੱਚ ਫ਼ੈਸਲਾ ਲੈਣ ਵਾਲਾ ਮੰਚ ਹੈ। ਇਸ ਲਈ ਐਮਰਜੈਂਸੀ ਜੀਬੀਐਮ ਬੁਲਾ ਕੇ ਚੋਣ ਕਾਰਜਕ੍ਰਮ ’ਤੇ ਵਿਸਥਾਰ ਨਾਲ ਵਿਚਾਰ ਕੀਤਾ ਜਾਵੇ ਅਤੇ ਨਿਰਪੱਖ ਤੇ ਪਾਰਦਰਸ਼ੀ ਕਾਰਜਕ੍ਰਮ ਤੈਅ ਕੀਤਾ ਜਾਵੇ। ਪੱਤਰ ’ਤੇ ਵੱਖ-ਵੱਖ ਵਿਭਾਗਾਂ ਦੇ 45 ਅਧਿਆਪਕਾਂ ਦੇ ਦਸਤਖ਼ਤ ਹਨ।
