- ਕੈਨੇਡਾ ਇਮੀਗ੍ਰੇਸ਼ਨ ਦੇ ਨਾਮ ’ਤੇ ਅਰਜ਼ੀ ਦੇਣ ਵਾਲੇ ਪੰਜਾਬੀਆਂ ਨਾਲ ਠੱਗੀ, AI ਰਾਹੀਂ ਅਧਿਕਾਰੀ ਬਣ ਕੇ ਕਰ ਰਹੇ ਧੋਖਾਧੜੀ
ਨਵੀਂ ਦਿੱਲੀ: 6 ਅਕਤੂਬਰ (ਦੇਸ਼ ਕਲਿੱਕ ਬਿਊਰੋ): ਕੈਨੇਡਾ ਵਿੱਚ ਇਮੀਗ੍ਰੇਸ਼ਨ ਦੇ ਨਾਮ ’ਤੇ ਹੋ ਰਹੀਆਂ ਧੋਖਾਧੜੀਆਂ ਦੇ ਮਾਮਲਿਆਂ ਵਿਚਾਲੇ ਇਮੀਗ੍ਰੇਸ਼ਨ, ਰਿਫਿਊਜੀਜ਼ ਐਂਡ ਸਿਟੀਜ਼ਨਸ਼ਿਪ ਕੈਨੇਡਾ (IRCC) ਨੇ ਨਵੇਂ ਇਮੀਗ੍ਰੈਂਟਾਂ ਅਤੇ ਅਰਜ਼ੀਦਾਤਿਆਂ ਨੂੰ ਸਾਵਧਾਨ ਰਹਿਣ ਦੀ ਚਿਤਾਵਨੀ ਦਿੱਤੀ ਹੈ। ਵਿਭਾਗ ਮੁਤਾਬਕ ਹੁਣ ਠੱਗ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਦੀ ਮਦਦ ਨਾਲ ਸਰਕਾਰੀ ਅਧਿਕਾਰੀਆਂ ਵਰਗੀਆਂ ਨਕਲੀ ਵੀਡੀਓ, ਆਵਾਜ਼ਾਂ ਅਤੇ ਹੋਰ ਸਮੱਗਰੀ ਤਿਆਰ ਕਰ ਰਹੇ ਹਨ। ਇਹ ਚਿਤਾਵਨੀ ਪੰਜਾਬ ਵਿੱਚ ਸਾਹਮਣੇ ਆਈਆਂ ਕੁਝ ਸ਼ਿਕਾਇਤਾਂ ਤੋਂ ਬਾਅਦ ਵੀ ਮਹੱਤਵਪੂਰਨ ਹੈ, ਜਿਨ੍ਹਾਂ ਵਿੱਚ ਕਥਿਤ ਤੌਰ ’ਤੇ ਠੱਗਾਂ ਨੇ ਖੁਦ ਨੂੰ ਇਮੀਗ੍ਰੇਸ਼ਨ ਅਧਿਕਾਰੀ ਦੱਸ ਕੇ ਲੋਕਾਂ ਨੂੰ ਕੈਨੇਡਾ ਵਿੱਚ ਪੱਕੀ ਨੌਕਰੀ ਦਿਵਾਉਣ ਦਾ ਭਰੋਸਾ ਦਿੱਤਾ ਅਤੇ ਇਸ ਦੇ ਬਦਲੇ ਪੈਸਿਆਂ ਦੀ ਮੰਗ ਕੀਤੀ।
IRCC ਨੇ ਕਿਹਾ ਕਿ ਠੱਗ AI ਤਕਨਾਲੋਜੀ ਰਾਹੀਂ ਅਜਿਹੀ ਹਕੀਕਤ ਦੇ ਨੇੜੇ ਲੱਗਣ ਵਾਲੀ ਸਮੱਗਰੀ ਤਿਆਰ ਕਰ ਰਹੇ ਹਨ, ਜਿਸ ਨਾਲ ਲੋਕਾਂ ਨੂੰ ਗੁੰਮਰਾਹ ਕੀਤਾ ਜਾ ਸਕੇ। ਵਿਭਾਗ ਨੇ ਅਰਜ਼ੀਦਾਤਿਆਂ ਨੂੰ ਸਲਾਹ ਦਿੱਤੀ ਹੈ ਕਿ ਇਮੀਗ੍ਰੇਸ਼ਨ ਨਾਲ ਸਬੰਧਤ ਜਾਣਕਾਰੀ ਸਿਰਫ਼ ਸਰਕਾਰੀ ਅਤੇ ਅਧਿਕਾਰਤ ਚੈਨਲਾਂ ਰਾਹੀਂ ਹੀ ਤਸਦੀਕ ਕਰਨ।
ਇਹ ਠੱਗੀਆਂ ਕਿਵੇਂ ਕੀਤੀਆਂ ਜਾ ਰਹੀਆਂ ਹਨ?
IRCC ਮੁਤਾਬਕ ਆਮ ਧੋਖਾਧੜੀਆਂ ਵਿੱਚ ਕੈਨੇਡਾ ਸਰਕਾਰ ਦੇ ਅਧਿਕਾਰੀ ਬਣ ਕੇ ਸੰਪਰਕ ਕਰਨਾ, ਫਰਜ਼ੀ ਈਮੇਲ ਜਾਂ ਟੈਕਸਟ ਮੈਸੇਜ ਭੇਜਣਾ, ਕੰਪਿਊਟਰ ਵਾਇਰਸ ਦੇ ਨਾਮ ’ਤੇ ਠੱਗੀ, ਨਕਲੀ ਇਨਾਮ ਜਾਂ ਮੁਕਾਬਲੇ ਅਤੇ ਟੈਕਸ ਨਾਲ ਸਬੰਧਤ ਧੋਖਾਧੜੀ ਸ਼ਾਮਲ ਹਨ।
ਵਿਭਾਗ ਨੇ ਸਪੱਸ਼ਟ ਕੀਤਾ ਕਿ ਕੋਈ ਵੀ ਵਿਅਕਤੀ ਜਾਂ ਨੁਮਾਇੰਦਾ ਨੌਕਰੀ, ਵੀਜ਼ਾ, ਪੱਕੀ ਰਿਹਾਇਸ਼ (PR) ਜਾਂ ਇਮੀਗ੍ਰੇਸ਼ਨ ਨਾਲ ਸਬੰਧਤ ਕਿਸੇ ਹੋਰ ਨਤੀਜੇ ਦੀ ਗਾਰੰਟੀ ਨਹੀਂ ਦੇ ਸਕਦਾ। ਵੀਜ਼ਾ ਜਾਰੀ ਕਰਨ ਦਾ ਫੈਸਲਾ ਸਿਰਫ਼ ਕੈਨੇਡਾ ਦੇ ਇਮੀਗ੍ਰੇਸ਼ਨ ਅਧਿਕਾਰੀਆਂ ਵੱਲੋਂ ਕੀਤਾ ਜਾਂਦਾ ਹੈ।IRCC ਨੇ ਇਹ ਵੀ ਦੱਸਿਆ ਕਿ ਇਮੀਗ੍ਰੇਸ਼ਨ ਪ੍ਰੋਸੈਸਿੰਗ ਫੀਸਾਂ ਦੁਨੀਆ ਭਰ ਵਿੱਚ ਨਿਰਧਾਰਤ ਹਨ ਅਤੇ ਸਰਕਾਰੀ ਭੁਗਤਾਨ ਅਧਿਕਾਰਤ ਆਨਲਾਈਨ ਚੈਨਲਾਂ ਰਾਹੀਂ ਹੀ ਕੀਤੇ ਜਾਣੇ ਚਾਹੀਦੇ ਹਨ।
IRCC ਅਧਿਕਾਰੀ ਕਦੇ ਨਹੀਂ ਮੰਗਦੇ ਨਿੱਜੀ ਖਾਤੇ ’ਚ ਪੈਸੇ
ਵਿਭਾਗ ਮੁਤਾਬਕ ਇਸਦੇ ਕਰਮਚਾਰੀ ਕਦੇ ਵੀ ਕਿਸੇ ਅਰਜ਼ੀਦਾਤਾ ਨੂੰ ਨਿੱਜੀ ਬੈਂਕ ਖਾਤੇ ਵਿੱਚ ਪੈਸੇ ਜਮ੍ਹਾਂ ਕਰਵਾਉਣ, ਨਿੱਜੀ ਮਨੀ-ਟ੍ਰਾਂਸਫਰ ਸੇਵਾ ਰਾਹੀਂ ਰਕਮ ਭੇਜਣ ਜਾਂ ਵਾਧੂ ਪੈਸੇ ਦੇ ਕੇ ਇਮੀਗ੍ਰੇਸ਼ਨ ਮਨਜ਼ੂਰੀ ਲੈਣ ਲਈ ਨਹੀਂ ਕਹਿੰਦੇ। ਇਸੇ ਤਰ੍ਹਾਂ ਫੀਸ ਨਾ ਦੇਣ ’ਤੇ ਗ੍ਰਿਫ਼ਤਾਰੀ ਜਾਂ ਡਿਪੋਰਟੇਸ਼ਨ ਦੀ ਧਮਕੀ ਦੇਣਾ ਵੀ ਅਧਿਕਾਰਤ ਪ੍ਰਕਿਰਿਆ ਨਹੀਂ ਹੈ।
IRCC ਨੇ ਇਹ ਵੀ ਕਿਹਾ ਕਿ ਉਸਦੇ ਅਧਿਕਾਰੀ ਅਰਜ਼ੀਦਾਤਿਆਂ ਨਾਲ ਸੰਪਰਕ ਕਰਨ ਲਈ Gmail, Hotmail ਜਾਂ Yahoo Mail ਵਰਗੀਆਂ ਮੁਫ਼ਤ ਈਮੇਲ ਸੇਵਾਵਾਂ ਦੀ ਵਰਤੋਂ ਨਹੀਂ ਕਰਦੇ। ਵਿਭਾਗ ਨੇ ਨਵੇਂ ਇਮੀਗ੍ਰੈਂਟਾਂ ਅਤੇ ਅਰਜ਼ੀਦਾਤਿਆਂ ਨੂੰ ਕਿਸੇ ਵੀ ਸ਼ੱਕੀ ਸੰਪਰਕ ਜਾਂ ਪੇਸ਼ਕਸ਼ ਦੀ ਅਧਿਕਾਰਤ ਸਰਕਾਰੀ ਚੈਨਲ ਰਾਹੀਂ ਜਾਂਚ ਕਰਨ ਦੀ ਅਪੀਲ ਕੀਤੀ ਹੈ।
