- WPL 2027 ਦੀ ਨਿਲਾਮੀ ’ਚ 25 ਖਿਡਾਰਨਾਂ ਵਿਕੀਆਂ, ਆਸਟ੍ਰੇਲੀਆ ਦੀ ਸੋਫੀ ਮੋਲਿਨਿਊਕਸ ਸਭ ਤੋਂ ਮਹਿੰਗੀ ਖਿਡਾਰਨ
ਚੰਡੀਗੜ੍ਹ, 28 ਅਕਤੂਬਰ (ਦੇਸ਼ ਕਲਿੱਕ ਬਿਊਰੋ): ਮਹਿਲਾ ਪ੍ਰੀਮੀਅਰ ਲੀਗ (WPL) ਦੇ ਪੰਜਵੇਂ ਸੀਜ਼ਨ ਲਈ ਕੋਚੀ ਵਿੱਚ ਹੋਈ ਮਿੰਨੀ ਨਿਲਾਮੀ ਦੌਰਾਨ ਕੁੱਲ 25 ਖਿਡਾਰਨਾਂ ਨੂੰ ਖਰੀਦਿਆ ਗਿਆ। ਇਨ੍ਹਾਂ ਵਿੱਚ 18 ਭਾਰਤੀ ਅਤੇ 7 ਵਿਦੇਸ਼ੀ ਖਿਡਾਰਨਾਂ ਸ਼ਾਮਲ ਹਨ। ਆਸਟ੍ਰੇਲੀਆ ਦੀ ਸੋਫੀ ਮੋਲਿਨਿਊਕਸ ਨਿਲਾਮੀ ਦੀ ਸਭ ਤੋਂ ਮਹਿੰਗੀ ਖਿਡਾਰਨ ਰਹੀ। ਉਸ ਨੂੰ ਯੂਪੀ ਵਾਰੀਅਰਜ਼ ਨੇ 1.10 ਕਰੋੜ ਰੁਪਏ ਵਿੱਚ ਖਰੀਦਿਆ। ਭਾਰਤੀ ਆਲਰਾਊਂਡਰ ਸਨੇਹ ਰਾਣਾ ਵੀ 30 ਲੱਖ ਰੁਪਏ ਵਿੱਚ ਯੂਪੀ ਦੀ ਟੀਮ ਨਾਲ ਜੁੜ ਗਈ।
ਕਿਰਨ ਨਵਗਿਰੇ ਤੇ ਜੀ ਕਮਲਿਨੀ ’ਤੇ ਵੀ ਲੱਗੀ ਬੋਲੀ
ਭਾਰਤੀ ਖਿਡਾਰਨ ਕਿਰਨ ਨਵਗਿਰੇ ਨੂੰ ਦਿੱਲੀ ਕੈਪੀਟਲਜ਼ ਨੇ 75 ਲੱਖ ਰੁਪਏ ਵਿੱਚ ਖਰੀਦਿਆ, ਜਦਕਿ ਜੀ ਕਮਲਿਨੀ ਨੂੰ ਗੁਜਰਾਤ ਜਾਇੰਟਸ ਨੇ 40 ਲੱਖ ਰੁਪਏ ਵਿੱਚ ਆਪਣੀ ਟੀਮ ਵਿੱਚ ਸ਼ਾਮਲ ਕੀਤਾ। ਦੂਜੇ ਪਾਸੇ, ਸ੍ਰੀਲੰਕਾ ਦੀ ਕਪਤਾਨ ਚਮਾਰੀ ਅਟਾਪੱਟੂ ਨੂੰ ਕੋਈ ਖਰੀਦਦਾਰ ਨਹੀਂ ਮਿਲਿਆ ਅਤੇ ਉਹ ਅਨਸੋਲਡ ਰਹੀ।
16 ਸਾਲਾ ਇਰਾ ਜਾਧਵ ਵੀ ਨਹੀਂ ਵਿਕੀ
ਭਾਰਤ ਦੀ 16 ਸਾਲਾ ਬੱਲੇਬਾਜ਼ ਇਰਾ ਜਾਧਵ ਨੂੰ ਵੀ WPL 2027 ਦੀ ਮਿੰਨੀ ਨਿਲਾਮੀ ਵਿੱਚ ਕਿਸੇ ਫ੍ਰੈਂਚਾਈਜ਼ੀ ਨੇ ਨਹੀਂ ਖਰੀਦਿਆ। ਉਸ ਦੀ ਬੇਸ ਪ੍ਰਾਈਸ 10 ਲੱਖ ਰੁਪਏ ਸੀ, ਪਰ ਉਸ ’ਤੇ ਕਿਸੇ ਟੀਮ ਨੇ ਬੋਲੀ ਨਹੀਂ ਲਗਾਈ।
