- ਰਾਜਸਥਾਨ ਰੇਲਵੇ ਟਰੈਕ ਧਮਾਕਾ ਮਾਮਲੇ ’ਚ ਪਾਕਿਸਤਾਨੀ ISI ਦਾ ਕੁਨੈਕਸ਼ਨ ਆਇਆ ਸਾਹਮਣੇ, ਪੰਜਾਬ ਤੋਂ ਦੋ ਗ੍ਰਿਫਤਾਰੀਆਂ
ਗੁਰਦਾਸਪੁਰ, 15 ਨਵੰਬਰ (ਦੇਸ਼ ਕਲਿੱਕ ਬਿਊਰੋ): ਰਾਜਸਥਾਨ ਦੇ ਸ੍ਰੀਗੰਗਾਨਗਰ ਵਿੱਚ ਅਨੂਪਗੜ੍ਹ-ਸੂਰਤਗੜ੍ਹ ਰੇਲਵੇ ਟਰੈਕ ’ਤੇ 3 ਨਵੰਬਰ ਨੂੰ ਹੋਏ ਧਮਾਕੇ ਦੇ ਮਾਮਲੇ ਵਿੱਚ ਰਾਜਸਥਾਨ ਐਂਟੀ ਟੈਰਰਿਸਟ ਸਕੁਐਡ (ATS) ਨੇ ਵੱਡਾ ਖੁਲਾਸਾ ਕੀਤਾ ਹੈ। ਜਾਂਚ ਏਜੰਸੀ ਮੁਤਾਬਕ ਇਸ ਘਟਨਾ ਪਿੱਛੇ ਪਾਕਿਸਤਾਨੀ ਖੁਫੀਆ ਏਜੰਸੀ ISI ਦਾ ਹੱਥ ਹੋਣ ਦਾ ਸ਼ੱਕ ਹੈ। ਦੋਸ਼ ਹੈ ਕਿ ਪਾਕਿਸਤਾਨ ਵਿੱਚ ਬੈਠੇ ਹੈਂਡਲਰਾਂ ਦੇ ਇਸ਼ਾਰੇ ’ਤੇ ਰੇਲਵੇ ਪਟੜੀ ’ਤੇ IED ਟਾਈਮ ਬੰਬ ਲਗਾ ਕੇ ਪੂਰੀ ਯਾਤਰੀ ਰੇਲਗੱਡੀ ਨੂੰ ਉਡਾਉਣ ਦੀ ਯੋਜਨਾ ਬਣਾਈ ਗਈ ਸੀ।
ATS ਦੇ ADG ਦਿਨੇਸ਼ ਐਮ.ਐਨ. ਨੇ ਦੱਸਿਆ ਕਿ ‘ਆਪ੍ਰੇਸ਼ਨ ਸਿੰਦੂਰ’ ਤੋਂ ਬਾਅਦ ਪਾਕਿਸਤਾਨੀ ਖੁਫੀਆ ਏਜੰਸੀ ਅਤੇ ਅੱਤਵਾਦੀ ਨੈੱਟਵਰਕ ਨੇ ਭਾਰਤੀ ਨੌਜਵਾਨਾਂ ਅਤੇ ਲੜਕੀਆਂ ਨੂੰ ਪੈਸੇ ਤੇ ਪਿਆਰ ਦੇ ਜਾਲ ਵਿੱਚ ਫਸਾ ਕੇ ਦੇਸ਼ ਵਿਰੋਧੀ ਗਤੀਵਿਧੀਆਂ ਕਰਵਾਉਣ ਦਾ ਤਰੀਕਾ ਅਪਣਾਇਆ ਹੈ।
ਇਸ ਮਾਮਲੇ ਵਿੱਚ ਗੁਰਦਾਸਪੁਰ ਤੋਂ ਮਹਿਕਦੀਪ ਕੌਰ (19) ਅਤੇ ਉਸ ਦੇ ਸਾਥੀ ਦੇਵੇਂਦਰ ਸਿੰਘ (23) ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਦੋਵਾਂ ਨੂੰ ਐਤਵਾਰ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੋਂ ਉਨ੍ਹਾਂ ਨੂੰ 8 ਦਿਨਾਂ ਦੇ ਰਿਮਾਂਡ ’ਤੇ ਭੇਜ ਦਿੱਤਾ ਗਿਆ। ਜਾਂਚ ਮੁਤਾਬਕ ਦੋਵਾਂ ਨੂੰ ਇਸ ਕੰਮ ਲਈ 2.23 ਲੱਖ ਰੁਪਏ ਦਿੱਤੇ ਗਏ ਸਨ। ਇਸ ਵਿੱਚੋਂ ਇੱਕ ਲੱਖ ਰੁਪਏ ਨਕਦ ਅਤੇ ਬਾਕੀ ਰਕਮ ਆਨਲਾਈਨ ਭੇਜੀ ਗਈ ਸੀ।
ਜੇਲ੍ਹ ਵਿੱਚ ਬੰਦ ਪਤੀ ਰਾਹੀਂ ਮਿਲਿਆ ਪਾਕਿਸਤਾਨੀ ਤਸਕਰ ਦਾ ਨੰਬਰ
ATS ਅਧਿਕਾਰੀ ਮੁਤਾਬਕ ਮਹਿਕਦੀਪ ਦਾ ਵਿਆਹ ਕਰੀਬ ਦੋ ਸਾਲ ਪਹਿਲਾਂ ਕਰਨ ਨਾਂ ਦੇ ਨੌਜਵਾਨ ਨਾਲ ਹੋਇਆ ਸੀ। ਦੋਵਾਂ ਦਾ 24 ਦਸੰਬਰ 2024 ਨੂੰ ਤਲਾਕ ਹੋ ਗਿਆ ਸੀ। ਫਰਵਰੀ 2025 ਵਿੱਚ ਕਰਨ ਹੈਰੋਇਨ ਤਸਕਰੀ ਦੇ ਮਾਮਲੇ ਵਿੱਚ ਜੇਲ੍ਹ ਚਲਾ ਗਿਆ। ਜਦੋਂ ਮਹਿਕਦੀਪ ਉਸ ਨੂੰ ਜੇਲ੍ਹ ਵਿੱਚ ਮਿਲਣ ਗਈ ਤਾਂ ਕਰਨ ਨੇ ਉਸ ਨੂੰ ਪੈਸਿਆਂ ਦਾ ਪ੍ਰਬੰਧ ਕਰਨ ਲਈ ਪਾਕਿਸਤਾਨ ਵਿੱਚ ਬੈਠੇ ‘ਲਵਲੀ’ ਨਾਂ ਦੇ ਤਸਕਰ ਦਾ ਫੋਨ ਨੰਬਰ ਦਿੱਤਾ। ਇਸ ਤੋਂ ਬਾਅਦ ਮਹਿਕਦੀਪ ਨੇ ਲਵਲੀ ਨਾਲ ਸੰਪਰਕ ਕਰਨਾ ਸ਼ੁਰੂ ਕਰ ਦਿੱਤਾ।
ਪਿਆਰ ਦੇ ਜਾਲ ’ਚ ਫਸਾ ਕੇ ਦਿੱਤੀ ਬੰਬ ਲਗਾਉਣ ਦੀ ਸਿਖਲਾਈ
ਜਾਂਚ ਅਨੁਸਾਰ ਮਹਿਕਦੀਪ ਅਤੇ ਦੇਵੇਂਦਰ 12ਵੀਂ ਜਮਾਤ ਵਿੱਚ ਇਕੱਠੇ ਪੜ੍ਹਦੇ ਸਨ ਅਤੇ ਦੋਵਾਂ ਵਿਚਕਾਰ ਸਬੰਧ ਸਨ। ਮਹਿਕਦੀਪ ਨੇ ਦੇਵੇਂਦਰ ਨੂੰ ਵੀ ਇਸ ਮਾਮਲੇ ਵਿੱਚ ਸ਼ਾਮਲ ਕਰ ਲਿਆ। ਲਵਲੀ ਨੇ ਮਹਿਕਦੀਪ ਦੀ ਪਾਕਿਸਤਾਨ ਵਿੱਚ ਬੈਠੇ ‘ਸ਼ਾਹ’ ਨਾਂ ਦੇ ਵਿਅਕਤੀ ਨਾਲ ਜਾਣ-ਪਛਾਣ ਕਰਵਾਈ। ਸ਼ਾਹ ਨਾਲ ਗੱਲਬਾਤ ਦੌਰਾਨ ਮਹਿਕਦੀਪ ਉਸ ਦੇ ਕਰੀਬ ਆ ਗਈ। 12 ਅਕਤੂਬਰ ਨੂੰ ਸ਼ਾਹ ਨੇ ਵੀਡੀਓ ਕਾਲ ਰਾਹੀਂ ਦੋਵਾਂ ਦੀ ਗੱਲਬਾਤ ਪਾਕਿਸਤਾਨ ਵਿੱਚ ਬੈਠੇ ਆਪਣੇ ‘ਚਾਚਾ’ ਨਾਲ ਕਰਵਾਈ। ਦੋਸ਼ ਹੈ ਕਿ ਚਾਚੇ ਨੇ ਵੱਡੀ ਰਕਮ ਦੇਣ ਦਾ ਲਾਲਚ ਦੇ ਕੇ ਦੋਵਾਂ ਨੂੰ ਰੇਲਵੇ ਟਰੈਕ ’ਤੇ IED ਟਾਈਮ ਬੰਬ ਲਗਾਉਣ ਦਾ ਕੰਮ ਸੌਂਪਿਆ। ਇਸ ਤੋਂ ਬਾਅਦ ਸ਼ਾਹ ਨੇ ਵੀਡੀਓ ਕਾਲ ਰਾਹੀਂ ਹੀ ਉਨ੍ਹਾਂ ਨੂੰ ਬੰਬ ਸੈੱਟ ਕਰਨ ਅਤੇ ਧਮਾਕਾ ਕਰਨ ਦੀ ਸਿਖਲਾਈ ਦਿੱਤੀ।
ਪਹਿਲੀਆਂ ਦੋ ਕੋਸ਼ਿਸ਼ਾਂ ਰਹੀਆਂ ਨਾਕਾਮ
ATS ਦੀ ਜਾਂਚ ਮੁਤਾਬਕ ਦੋਵੇਂ ਮੁਲਜ਼ਮ ਪਹਿਲੀ ਵਾਰ 6 ਅਕਤੂਬਰ ਨੂੰ ਸ੍ਰੀਗੰਗਾਨਗਰ ਦੇ ਵਿਜੈਨਗਰ ਪਹੁੰਚੇ ਸਨ, ਪਰ ਦੱਸੀ ਗਈ ਥਾਂ ’ਤੇ ਬੰਬ ਨਾ ਮਿਲਣ ਕਾਰਨ ਵਾਪਸ ਪਰਤ ਗਏ। ਇਸ ਤੋਂ ਬਾਅਦ 12 ਅਤੇ 13 ਅਕਤੂਬਰ ਨੂੰ ਦੋਵੇਂ ਮੁੜ ਆਏ ਅਤੇ ਰਾਮਸਿੰਘਪੁਰ-ਵਿਜੈਨਗਰ ਵਿਚਕਾਰ ਰੇਲਵੇ ਪਟੜੀ ’ਤੇ ਦੋ ਟਾਈਮ ਬੰਬ ਲਗਾਏ। ਹਾਲਾਂਕਿ ਤਾਰ ਟੁੱਟਣ ਅਤੇ ਤਕਨੀਕੀ ਖ਼ਰਾਬੀ ਕਾਰਨ ਧਮਾਕੇ ਨਹੀਂ ਹੋ ਸਕੇ। ਜਦੋਂ ਪਾਕਿਸਤਾਨੀ ਹੈਂਡਲਰਾਂ ਨੂੰ ਇਸ ਬਾਰੇ ਪਤਾ ਲੱਗਾ ਤਾਂ ਉਨ੍ਹਾਂ ਨੇ ਦੋਵਾਂ ਨੂੰ ਕਥਿਤ ਤੌਰ ’ਤੇ ਫਟਕਾਰ ਲਗਾਈ।
ਤੀਜੀ ਕੋਸ਼ਿਸ਼ ’ਚ 3 ਨਵੰਬਰ ਨੂੰ ਕੀਤਾ ਧਮਾਕਾ
ਜਾਂਚ ਅਨੁਸਾਰ ਦੋਵੇਂ 30 ਅਕਤੂਬਰ ਨੂੰ ਮੁੜ ਸ੍ਰੀਗੰਗਾਨਗਰ ਪਹੁੰਚੇ ਅਤੇ ਉੱਥੋਂ ਦੇ ਐਮਆਰ ਹੋਟਲ ਵਿੱਚ ਠਹਿਰੇ। ਉਨ੍ਹਾਂ ਨੂੰ ਪੰਜਾਬ ਸਰਹੱਦ ਨੇੜੇ ਡਰੋਨ ਰਾਹੀਂ ਸੁੱਟਿਆ ਗਿਆ ਬੰਬ ਮਿਲਿਆ ਸੀ। 1 ਅਤੇ 2 ਨਵੰਬਰ ਨੂੰ ਮੌਕਾ ਨਾ ਮਿਲਣ ਤੋਂ ਬਾਅਦ 3 ਨਵੰਬਰ ਦੀ ਸ਼ਾਮ ਨੂੰ ਦੋਵਾਂ ਨੇ 50 ਜੀਬੀ ਪਿੰਡ ਨੇੜੇ ਰੇਲਵੇ ਪਟੜੀ ’ਤੇ ਟਾਈਮ ਬੰਬ ਲਗਾਇਆ ਅਤੇ ਪੰਜਾਬ ਵਾਪਸ ਚਲੇ ਗਏ। ਉਸੇ ਰਾਤ ਕਰੀਬ 9:45 ਵਜੇ ਜ਼ੋਰਦਾਰ ਧਮਾਕਾ ਹੋਇਆ। ਇਸ ਨਾਲ ਪਟੜੀ ਨੂੰ ਨੁਕਸਾਨ ਪਹੁੰਚਿਆ ਅਤੇ ਰੇਲ ਆਵਾਜਾਈ ਕਰੀਬ 10 ਘੰਟਿਆਂ ਤੱਕ ਪ੍ਰਭਾਵਿਤ ਰਹੀ। ਹਾਲਾਂਕਿ ਬੰਬ ਦੇ ਨਿਰਧਾਰਤ ਸਮੇਂ ਤੋਂ ਦੇਰੀ ਨਾਲ ਫਟਣ ਕਾਰਨ ਯਾਤਰੀ ਰੇਲਗੱਡੀ ਇਸ ਦੀ ਲਪੇਟ ਵਿੱਚ ਆਉਣ ਤੋਂ ਬਚ ਗਈ। ਰੇਲਗੱਡੀ ਦੇ ਲੰਘਣ ਤੋਂ ਕਰੀਬ ਅੱਧੇ ਘੰਟੇ ਬਾਅਦ ਧਮਾਕਾ ਹੋਇਆ ਸੀ।
ਦੋ ਵਿਦੇਸ਼ੀ ਪਿਸਤੌਲਾਂ ਅਤੇ 40 ਕਾਰਤੂਸ ਬਰਾਮਦ
ADG ਦਿਨੇਸ਼ ਐਮ.ਐਨ. ਨੇ ਦੱਸਿਆ ਕਿ ATS ਨੇ ਪੰਜ ਲੱਖ ਤੋਂ ਵੱਧ ਮੋਬਾਈਲ ਡਾਟਾ ਅਤੇ 200 ਤੋਂ ਵੱਧ CCTV ਫੁਟੇਜ ਦੀ ਜਾਂਚ ਕੀਤੀ। ਇਸ ਤੋਂ ਬਾਅਦ ਅੰਮ੍ਰਿਤਸਰ ਦੀ ਸੀਆਈ ਸੈੱਲ ਅਤੇ ਗੁਰਦਾਸਪੁਰ ਪੁਲਿਸ ਦੀ ਮਦਦ ਨਾਲ ਦੋਵਾਂ ਨੂੰ ਕਲਾਨੌਰ ਥਾਣਾ ਖੇਤਰ ਤੋਂ ਕਾਬੂ ਕੀਤਾ ਗਿਆ। ਮੁਲਜ਼ਮਾਂ ਕੋਲੋਂ 30 ਹਜ਼ਾਰ ਰੁਪਏ ਨਕਦ, ਦੋ ਵਿਦੇਸ਼ੀ ਪਿਸਤੌਲਾਂ ਅਤੇ 40 ਜ਼ਿੰਦਾ ਕਾਰਤੂਸ ਬਰਾਮਦ ਹੋਏ ਹਨ। ਅਧਿਕਾਰੀਆਂ ਮੁਤਾਬਕ ਕਾਰਤੂਸਾਂ ’ਤੇ ‘ਪਾਕਿਸਤਾਨ ਆਰਡਨੈਂਸ ਫੈਕਟਰੀ’ ਦੀ ਮੋਹਰ ਲੱਗੀ ਹੋਈ ਹੈ।
ਸਰਹੱਦੀ ਇਲਾਕਿਆਂ ਦੇ ਨੌਜਵਾਨਾਂ ਨੂੰ ਨਿਸ਼ਾਨਾ ਬਣਾਉਣ ਦਾ ਦੋਸ਼
ਬੀਕਾਨੇਰ ਦੇ ਆਈਜੀ ਓਮ ਪ੍ਰਕਾਸ਼ ਅਤੇ ਸ੍ਰੀਗੰਗਾਨਗਰ ਦੇ ਐੱਸਪੀ ਹਰੀਸ਼ੰਕਰ ਨੇ ਦੱਸਿਆ ਕਿ ਪਾਕਿਸਤਾਨ ਸਰਹੱਦ ਨਾਲ ਲੱਗਦੇ ਪੰਜਾਬ ਦੇ ਗੁਰਦਾਸਪੁਰ, ਤਰਨਤਾਰਨ ਅਤੇ ਫਾਜ਼ਿਲਕਾ ਵਰਗੇ ਜ਼ਿਲ੍ਹਿਆਂ ਦੇ ਨਾਲ-ਨਾਲ ਰਾਜਸਥਾਨ ਦੇ ਸ੍ਰੀਗੰਗਾਨਗਰ ਦੀ ਭਾਸ਼ਾ ਅਤੇ ਸੱਭਿਆਚਾਰ ਵਿੱਚ ਕਾਫ਼ੀ ਸਮਾਨਤਾ ਹੈ। ਉਨ੍ਹਾਂ ਅਨੁਸਾਰ ਸਰਹੱਦ ਪਾਰ ਬੈਠੇ ਹੈਂਡਲਰ ਇਸ ਸਾਂਝ ਅਤੇ ਰਿਸ਼ਤੇਦਾਰੀਆਂ ਦਾ ਲਾਹਾ ਲੈ ਕੇ ਸਥਾਨਕ ਨੌਜਵਾਨਾਂ ਨੂੰ ਆਪਣੇ ਜਾਲ ਵਿੱਚ ਫਸਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਪੁਲਿਸ ਵੱਲੋਂ ਉਸ ਕੈਬ ਡਰਾਈਵਰ ਤੋਂ ਵੀ ਪੁੱਛਗਿੱਛ ਕੀਤੀ ਜਾ ਰਹੀ ਹੈ, ਜਿਸ ਨੇ ਮੁਲਜ਼ਮਾਂ ਨੂੰ ਸ੍ਰੀਗੰਗਾਨਗਰ ਤੋਂ ਵਿਜੈਨਗਰ ਛੱਡਿਆ ਸੀ।