ਮਹਿੰਗਾਈ ਦਾ ਝਟਕਾ: ਗੈਸ ਸਿਲੰਡਰ ਦੀਆਂ ਕੀਮਤਾਂ ‘ਚ ਵਾਧਾ
ਨਵੀਂ ਦਿੱਲੀ/ਚੰਡੀਗੜ੍ਹ, 1 ਜੂਨ 2026: ਮਹੀਨੇ ਦੀ ਪਹਿਲੀ ਤਾਰੀਖ਼ ਦੀ ਸਵੇਰ ਆਮ ਆਦਮੀ ਲਈ ਬਜਟ ਵਿਗਾੜਨ ਵਾਲੀ ਖ਼ਬਰ ਲੈ ਕੇ ਆਈ ਹੈ। ਸੀ.ਐਨ.ਜੀ. (CNG) ਦੀਆਂ ਕੀਮਤਾਂ ਵਿੱਚ ਲੱਗੀ ਅੱਗ ਦੇ ਠੀਕ ਦੋ ਦਿਨਾਂ ਬਾਅਦ ਹੁਣ ਐਲ.ਪੀ.ਜੀ. (LPG) ਸਿਲੰਡਰਾਂ ਦੇ ਦਾਮ ਵੀ ਵਧਾ ਦਿੱਤੇ ਗਏ ਹਨ।
ਇਸ ਵਾਰ ਮਹਿੰਗਾਈ ਦੀ ਸਭ ਤੋਂ ਵੱਧ ਮਾਰ ਉਨ੍ਹਾਂ ਵਿਦਿਆਰਥੀਆਂ, ਪ੍ਰਵਾਸੀ ਮਜ਼ਦੂਰਾਂ ਅਤੇ ਨੌਕਰੀਪੇਸ਼ਾ ਨੌਜਵਾਨਾਂ ‘ਤੇ ਪਈ ਹੈ ਜੋ ਘਰ ਤੋਂ ਦੂਰ ਰਹਿ ਕੇ 5 ਕਿੱਲੋ ਵਾਲੇ ‘ਛੋਟੂ’ ਗੈਸ ਸਿਲੰਡਰ ਦੀ ਵਰਤੋਂ ਕਰਦੇ ਹਨ। ਹਾਲਾਂਕਿ, ਘਰ ਦੀ ਰਸੋਈ ਸੰਭਾਲਣ ਵਾਲੇ ਪਰਿਵਾਰਾਂ ਲਈ ਇੱਕ ਰਾਹਤ ਦੀ ਖ਼ਬਰ ਵੀ ਹੈ।
ਦੂਜੇ ਰਾਜਾਂ ਅਤੇ ਸ਼ਹਿਰਾਂ ਵਿੱਚ ਰਹਿ ਕੇ ਪੜ੍ਹਾਈ ਜਾਂ ਨੌਕਰੀ ਕਰਨ ਵਾਲੇ ਨੌਜਵਾਨਾਂ ਵਿੱਚ ਪ੍ਰਸਿੱਧ 5 ਕਿੱਲੋ ਵਾਲੇ ਫ੍ਰੀ ਟਰੇਡ ਐਲ.ਪੀ.ਜੀ. ‘ਛੋਟੂ’ ਸਿਲੰਡਰ ਦੀਆਂ ਕੀਮਤਾਂ ਵਿੱਚ ਤੇਲ ਕੰਪਨੀਆਂ ਨੇ 11 ਰੁਪਏ ਦਾ ਵਾਧਾ ਕਰ ਦਿੱਤਾ ਹੈ। ਇਸ ਵਾਧੇ ਤੋਂ ਬਾਅਦ ਦੇਸ਼ ਦੀ ਰਾਜਧਾਨੀ ਦਿੱਲੀ ਵਿੱਚ ਹੁਣ 5 ਕਿੱਲੋ ਵਾਲੇ ਗੈਸ ਸਿਲੰਡਰ ਦੀ ਕੀਮਤ 810.50 ਰੁਪਏ ਤੋਂ ਵਧ ਕੇ 821.50 ਰੁਪਏ ਹੋ ਗਈ ਹੈ।
ਹੋਟਲਾਂ, ਢਾਬਿਆਂ ਅਤੇ ਰੈਸਟੋਰੈਂਟਾਂ ਵਿੱਚ ਵਰਤੇ ਜਾਣ ਵਾਲੇ 19 ਕਿੱਲੋ ਵਾਲੇ ਕਮਰਸ਼ੀਅਲ ਗੈਸ ਸਿਲੰਡਰ ਦੇ ਦਾਮ ਇੱਕ ਵਾਰ ਫਿਰ ਵਧਾ ਦਿੱਤੇ ਗਏ ਹਨ। ਦਿੱਲੀ ਵਿੱਚ ਇਸ ਦੀ ਕੀਮਤ 42 ਰੁਪਏ ਵਧਾਈ ਗਈ ਹੈ, ਜਦੋਂ ਕਿ ਕੋਲਕਾਤਾ ਵਿੱਚ ਇਹ 53.50 ਰੁਪਏ ਮਹਿੰਗਾ ਹੋ ਗਿਆ ਹੈ। ਇਸ ਤਾਜ਼ਾ ਉਛਾਲ ਤੋਂ ਬਾਅਦ 19 ਕਿੱਲੋ ਵਾਲਾ ਕਮਰਸ਼ੀਅਲ ਸਿਲੰਡਰ ਹੁਣ ਦਿੱਲੀ ਵਿੱਚ 3,113.50 ਰੁਪਏ (ਪਹਿਲਾਂ 3,071.50 ਰੁਪਏ) ਅਤੇ ਕੋਲਕਾਤਾ ਵਿੱਚ 3,255.50 ਰੁਪਏ (ਪਹਿਲਾਂ 3,202 ਰੁਪਏ) ਦਾ ਮਿਲੇਗਾ। ਇਸ ਨਾਲ ਬਾਹਰ ਦਾ ਖਾਣਾ ਅਤੇ ਚਾਹ-ਨਾਸ਼ਤਾ ਵੀ ਮਹਿੰਗਾ ਹੋ ਸਕਦਾ ਹੈ।
ਲੌਜਿਸਟਿਕਸ (ਸਪਲਾਈ ਚੇਨ) ਵਿੱਚ ਆ ਰਹੀਆਂ ਦਿੱਕਤਾਂ ਅਤੇ ਈਰਾਨ ਯੁੱਧ ਕਾਰਨ ਪੈਦਾ ਹੋਏ ਵਿਸ਼ਵਵਿਆਪੀ ਊਰਜਾ ਸੰਕਟ ਦੀ ਵਜ੍ਹਾ ਨਾਲ ਇਸ ਸਾਲ ਕਮਰਸ਼ੀਅਲ ਸਿਲੰਡਰਾਂ ਦੇ ਦਾਮ ਰਿਕਾਰਡ ਪੱਧਰ ‘ਤੇ ਪਹੁੰਚ ਗਏ ਹਨ; ਜਨਵਰੀ 2026 ਵਿੱਚ ਕੀਮਤ ਸਿਰਫ਼ 1,691.50 ਰੁਪਏ ਸੀ। ਫ਼ਰਵਰੀ ਤੋਂ ਅਪ੍ਰੈਲ ਵਿੱਚ ਲਗਾਤਾਰ ਵਧਦੇ ਹੋਏ ਦਾਮ 2,078.50 ਰੁਪਏ ਤੱਕ ਪਹੁੰਚੇ। ਮਈ ਵਿੱਚ ਸਿੱਧਾ 993 ਰੁਪਏ ਦੇ ਇਤਿਹਾਸਕ ਵਾਧੇ ਨਾਲ ਦਾਮ 3,071.50 ਰੁਪਏ ਹੋ ਗਏ ਸਨ। ਹੁਣ ਜੂਨ ਵਿੱਚ 42 ਰੁਪਏ ਹੋਰ ਵਧ ਕੇ ਕੀਮਤ ਹੁਣ 3,113.50 ਰੁਪਏ ਦੇ ਰਿਕਾਰਡ ਪੱਧਰ ‘ਤੇ ਜਾ ਪਹੁੰਚੀ ਹੈ।
ਇਸ ਚੌਤਰਫ਼ਾ ਮਹਿੰਗਾਈ ਦੇ ਵਿਚਕਾਰ ਆਮ ਪਰਿਵਾਰਾਂ ਅਤੇ ਸੁਆਣੀਆਂ ਲਈ ਰਾਹਤ ਦੀ ਗੱਲ ਇਹ ਹੈ ਕਿ ਘਰ ਦੀ ਰਸੋਈ ਵਿੱਚ ਵਰਤੇ ਜਾਣ ਵਾਲੇ 14.2 ਕਿੱਲੋ ਵਾਲੇ ਘਰੇਲੂ ਐਲ.ਪੀ.ਜੀ. ਸਿਲੰਡਰ ਦੇ ਦਾਮ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ। 1 ਜੂਨ ਦੀ ਸਵੇਰ ਤੱਕ ਦੇ ਅਪਡੇਟ ਮੁਤਾਬਕ, ਘਰੇਲੂ ਰਸੋਈ ਗੈਸ ਸਿਲੰਡਰ ਦੇ ਦਾਮ ਪਹਿਲਾਂ ਜਿੰਨੇ ਹੀ ਸਥਿਰ ਬਣੇ ਹੋਏ ਹਨ।