Breaking- ਸ਼ਿਕਾਗੋ ’ਚ ਭਾਰਤੀ ਵੱਲੋਂ ਪਤਨੀ ਦਾ ਕਤਲ, ਏਅਰਪੋਰਟ ਤੋਂ ਗ੍ਰਿਫ਼ਤਾਰ
ਸ਼ਿਕਾਗੋ, 15 ਅਗਸਤ 2026- ਅਮਰੀਕਾ ਦੇ ਸ਼ਿਕਾਗੋ ਵਿੱਚ ਇੱਕ ਗੁਜਰਾਤੀ-ਭਾਰਤੀ ਵਿਅਕਤੀ ਵੱਲੋਂ ਆਪਣੀ ਪਤਨੀ ਦਾ ਕਥਿਤ ਤੌਰ ’ਤੇ ਕਤਲ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਅੰਕੁਰ ਪਟੇਲ ਨੂੰ ਘਟਨਾ ਤੋਂ ਕਰੀਬ ਨੌਂ ਘੰਟਿਆਂ ਬਾਅਦ ਹਵਾਈ ਅੱਡੇ ਤੋਂ ਗ੍ਰਿਫ਼ਤਾਰ ਕਰ ਲਿਆ। ਉਸ ’ਤੇ ਪਹਿਲੇ ਦਰਜੇ ਦੇ ਕਤਲ ਦੇ ਦੋਸ਼ ਲਗਾਏ ਗਏ ਹਨ।
ਅਮਰੀਕੀ ਮੀਡੀਆ ਰਿਪੋਰਟਾਂ ਮੁਤਾਬਕ ਅਲਬਾਨੀ ਪਾਰਕ ਦੇ ਨੌਰਥ ਐਵਰਸ ਐਵੇਨਿਊ ਦੇ 4800 ਬਲਾਕ ਸਥਿਤ ਇੱਕ ਅਪਾਰਟਮੈਂਟ ਵਿੱਚੋਂ ਅੰਕੁਰ ਦੀ ਪਤਨੀ ਦੀ ਲਾਸ਼ ਬਰਾਮਦ ਹੋਈ। ਪੁਲਿਸ ਦੇ ਪਹੁੰਚਣ ਤੋਂ ਪਹਿਲਾਂ ਅੰਕੁਰ ਮੌਕੇ ਤੋਂ ਫਰਾਰ ਹੋ ਗਿਆ ਸੀ।
ਸੂਤਰਾਂ ਮੁਤਾਬਕ ਮ੍ਰਿਤਕ ਔਰਤ ਦਾ ਆਪਣੇ ਤੋਂ ਕਰੀਬ 10 ਸਾਲ ਛੋਟੇ ਵਿਅਕਤੀ ਨਾਲ ਕਥਿਤ ਸਬੰਧ ਸੀ ਅਤੇ ਉਹ ਲਗਭਗ ਡੇਢ ਮਹੀਨੇ ਤੱਕ ਉਸ ਨਾਲ ਰਹੀ ਸੀ। ਬਾਅਦ ਵਿੱਚ ਉਹ ਅੰਕੁਰ ਦੇ ਘਰ ਵਾਪਸ ਆਈ ਅਤੇ ਆਪਣੀ ਪੰਜ ਸਾਲਾ ਧੀ ਨੂੰ ਪਤੀ ਕੋਲ ਛੱਡ ਦਿੱਤਾ।
ਦੋਸ਼ ਹੈ ਕਿ ਅੰਕੁਰ ਨੇ ਪਤਨੀ ਨੂੰ ਧੀ ਨੂੰ ਲੈ ਜਾਣ ਲਈ ਘਰ ਬੁਲਾਇਆ ਸੀ। ਇਨਕਾਰ ਕਰਨ ’ਤੇ ਉਸ ਨੇ ਕਥਿਤ ਤੌਰ ’ਤੇ ਚਾਕੂ ਨਾਲ ਉਸ ਦੀ ਗਰਦਨ ’ਤੇ ਹਮਲਾ ਕਰ ਦਿੱਤਾ। ਇਹ ਵੀ ਜਾਂਚ ਦਾ ਵਿਸ਼ਾ ਹੈ ਕਿ ਕੀ ਉਸ ਨੇ ਆਪਣੀ ਧੀ ਨੂੰ ਪਹਿਲਾਂ ਹੀ ਭਾਰਤ ਭੇਜ ਦਿੱਤਾ ਸੀ।
ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਮ੍ਰਿਤਕਾ ਦੀ ਪਛਾਣ ਅਜੇ ਜਨਤਕ ਨਹੀਂ ਕੀਤੀ।