ਭਾਰਤ-ਬ੍ਰਿਟੇਨ ਵਪਾਰਕ ਸਾਂਝ ਨੂੰ ਹੁਲਾਰਾ: £1 ਅਰਬ ਤੋਂ ਵੱਧ ਦੇ ਨਵੇਂ ਸੌਦਿਆਂ ਦਾ ਐਲਾਨ
100 ਤੋਂ ਵੱਧ ਕੰਪਨੀਆਂ ਅਤੇ ਉੱਤਰੀ ਇੰਗਲੈਂਡ ਦੇ ਸੱਤ ਮੇਅਰ ਭਾਰਤ ਦੌਰੇ ’ਤੇ; ਮੇਟਾ ਵੱਲੋਂ AI ਖੋਜ ਲਈ £50 ਮਿਲੀਅਨ ਦਾ ਨਿਵੇਸ਼
ਨਵੀਂ ਦਿੱਲੀ, 12 ਅਕਤੂਬਰ 2026: ਭਾਰਤ ਅਤੇ ਬ੍ਰਿਟੇਨ ਵਿਚਾਲੇ ਵਪਾਰਕ ਅਤੇ ਨਿਵੇਸ਼ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨ ਲਈ £1 ਅਰਬ ਤੋਂ ਵੱਧ ਦੇ ਨਵੇਂ ਵਪਾਰਕ ਸੌਦਿਆਂ ਦਾ ਐਲਾਨ ਕੀਤਾ ਗਿਆ ਹੈ। ਬ੍ਰਿਟਿਸ਼ ਹਾਈ ਕਮਿਸ਼ਨ ਅਨੁਸਾਰ, ਬ੍ਰਿਟੇਨ ਦੇ 100 ਤੋਂ ਵੱਧ ਕਾਰੋਬਾਰੀ ਅਦਾਰਿਆਂ ਦਾ ਵਫ਼ਦ ਭਾਰਤ ਪਹੁੰਚਿਆ ਹੈ। ਇਸ ਵਿੱਚ ਬ੍ਰਿਟੇਨ ਦੇ ਵਪਾਰ, ਵਾਤਾਵਰਣ ਅਤੇ ਸਕਾਟਲੈਂਡ ਨਾਲ ਸਬੰਧਤ ਵਿਭਾਗਾਂ ਦੇ ਮੰਤਰੀਆਂ ਦੇ ਨਾਲ ਉੱਤਰੀ ਇੰਗਲੈਂਡ ਦੇ ਸੱਤ ਮੇਅਰ ਵੀ ਸ਼ਾਮਲ ਹਨ।
ਇਸ ਦੌਰੇ ਦਾ ਮੁੱਖ ਉਦੇਸ਼ ਭਾਰਤ-ਬ੍ਰਿਟੇਨ ਮੁਕਤ ਵਪਾਰ ਸਮਝੌਤੇ (FTA) ਦੇ ਲਾਭਾਂ ਨੂੰ ਵਧਾਉਣਾ ਅਤੇ ਦੋਵਾਂ ਦੇਸ਼ਾਂ ਵਿਚਾਲੇ ਨਿਵੇਸ਼ ਤੇ ਕਾਰੋਬਾਰੀ ਭਾਈਵਾਲੀ ਨੂੰ ਉਤਸ਼ਾਹਿਤ ਕਰਨਾ ਹੈ।
ਐਲਾਨੇ ਗਏ ਸੌਦਿਆਂ ਵਿੱਚ ਮੇਟਾ ਫਾਰ ਡਾਟਾ ਟੈਕਨਾਲੋਜੀਜ਼ (MFD) ਵੱਲੋਂ ਬ੍ਰਿਟੇਨ ਵਿੱਚ ਆਰਟੀਫਿਸ਼ਲ ਇੰਟੈਲੀਜੈਂਸ (AI) ਖੋਜ ਲਈ £50 ਮਿਲੀਅਨ ਦਾ ਨਿਵੇਸ਼ ਸ਼ਾਮਲ ਹੈ। ਇਸ ਤੋਂ ਇਲਾਵਾ, ਬ੍ਰਿਟੇਨ ਦੀ ਹਵਾਬਾਜ਼ੀ ਸੇਵਾ ਕੰਪਨੀ ਮੇਨਜ਼ੀਜ਼ ਏਵੀਏਸ਼ਨ ਨੇ ਭਾਰਤ ਵਿੱਚ ਆਪਣਾ ਕਾਰੋਬਾਰ ਵਧਾ ਕੇ £600 ਮਿਲੀਅਨ ਤੋਂ ਵੱਧ ਦੀ ਆਮਦਨ ਪੈਦਾ ਕਰਨ ਦਾ ਟੀਚਾ ਰੱਖਿਆ ਹੈ।
ਬ੍ਰਿਟਿਸ਼ ਹਾਈ ਕਮਿਸ਼ਨ ਮੁਤਾਬਕ, ਜੁਲਾਈ 2025 ਵਿੱਚ ਇਤਿਹਾਸਕ ਮੁਕਤ ਵਪਾਰ ਸਮਝੌਤੇ ’ਤੇ ਦਸਤਖ਼ਤ ਹੋਣ ਤੋਂ ਬਾਅਦ ਦੋਵਾਂ ਦੇਸ਼ਾਂ ਵਿਚਾਲੇ ਐਲਾਨੇ ਗਏ ਸੌਦਿਆਂ ਦਾ ਕੁੱਲ ਮੁੱਲ ਲਗਭਗ £12 ਅਰਬ ਤੱਕ ਪਹੁੰਚ ਗਿਆ ਹੈ। ਇਨ੍ਹਾਂ ਸਮਝੌਤਿਆਂ ਨਾਲ ਦੋਵਾਂ ਦੇਸ਼ਾਂ ਵਿੱਚ ਹਜ਼ਾਰਾਂ ਨੌਕਰੀਆਂ ਨੂੰ ਸਮਰਥਨ ਮਿਲਣ ਦੀ ਉਮੀਦ ਹੈ। ਬ੍ਰਿਟੇਨ ਅਨੁਸਾਰ, ਭਾਰਤ ਨਾਲ ਵਪਾਰ ਸਮਝੌਤੇ ਤੋਂ ਲੰਬੇ ਸਮੇਂ ਵਿੱਚ ਦੁਵੱਲੇ ਵਪਾਰ ਨੂੰ ਹਰ ਸਾਲ £25.5 ਅਰਬ ਦਾ ਹੁਲਾਰਾ ਮਿਲ ਸਕਦਾ ਹੈ।
