ਸਾਬਕਾ ਪ੍ਰਿੰਸੀਪਲ ਡਾ. ਵਿਦਵਾਨ ਸਿੰਘ ਸੋਨੀ ਦਾ ਦੇਹਾਂਤ, ਸਿੱਖਿਆ ਤੇ ਜੀਵਾਸ਼ਮ ਖੋਜ ਦੇ ਖੇਤਰ ਵਿੱਚ ਛੱਡ ਗਏ ਅਮਿੱਟ ਛਾਪ
ਪਟਿਆਲਾ 4 ਸਤੰਬਰ 2026
ਸਰਕਾਰੀ ਮਹਿੰਦਰਾ ਕਾਲਜ, ਪਟਿਆਲਾ ਦੇ ਸਾਬਕਾ ਪ੍ਰਿੰਸੀਪਲ ਅਤੇ ਪ੍ਰਸਿੱਧ ਭੌਤਿਕ ਵਿਗਿਆਨੀ ਡਾ. ਵਿਦਵਾਨ ਸਿੰਘ ਸੋਨੀ ਦਾ ਸ਼ੁੱਕਰਵਾਰ ਨੂੰ 83 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ। ਉਹ ਆਪਣੇ ਪਿੱਛੇ ਦੋ ਧੀਆਂ ਅਤੇ ਇੱਕ ਪੁੱਤਰ ਛੱਡ ਗਏ ਹਨ। ਉਨ੍ਹਾਂ ਦੇ ਦੇਹਾਂਤ ਨਾਲ ਸਿੱਖਿਆ ਅਤੇ ਵਿਗਿਆਨ ਦੇ ਖੇਤਰ ਵਿੱਚ ਸੋਗ ਦੀ ਲਹਿਰ ਹੈ।
ਡਾ. ਸੋਨੀ ਨੇ ਭੌਤਿਕ ਵਿਗਿਆਨ ਦੇ ਅਧਿਆਪਕ ਅਤੇ ਸਿੱਖਿਆ ਸ਼ਾਸਤਰੀ ਵਜੋਂ ਲੰਮਾ ਸਮਾਂ ਸੇਵਾ ਨਿਭਾਈ। ਇਸ ਦੇ ਨਾਲ ਹੀ ਉਨ੍ਹਾਂ ਦੀ ਡੂੰਘੀ ਰੁਚੀ ਜੀਵਾਸ਼ਮ ਵਿਗਿਆਨ ਅਤੇ ਪ੍ਰਾਗ-ਇਤਿਹਾਸਕ ਪੱਥਰ ਦੇ ਸੰਦਾਂ ਦੇ ਅਧਿਐਨ ਵਿੱਚ ਸੀ। ਲਗਭਗ ਦੋ ਦਹਾਕੇ ਪਹਿਲਾਂ ਸ਼ੁਰੂ ਹੋਈ ਇਹ ਰੁਚੀ ਬਾਅਦ ਵਿੱਚ ਗੰਭੀਰ ਖੋਜ ਕਾਰਜ ਵਿੱਚ ਬਦਲ ਗਈ।
ਡਾ. ਸੋਨੀ ਵਿਸ਼ੇਸ਼ ਤੌਰ ’ਤੇ ਸ਼ਿਵਾਲਿਕ ਖੇਤਰ ਵਿੱਚ ਮਿਲਣ ਵਾਲੇ ਜੀਵਾਸ਼ਮਾਂ ਅਤੇ ਪੱਥਰ ਯੁੱਗ ਦੇ ਸੰਦਾਂ ਦੀ ਖੋਜ ਲਈ ਜਾਣੇ ਜਾਂਦੇ ਸਨ। ਉਹ ਹਿਮਾਲਿਆ ਦੀਆਂ ਹੇਠਲੀਆਂ ਪਹਾੜੀਆਂ ਅਤੇ ਉੱਤਰ-ਪੱਛਮੀ ਉਪ-ਹਿਮਾਲਿਆਈ ਖੇਤਰਾਂ ਵਿੱਚ ਲਗਾਤਾਰ ਭਾਲ ਤੇ ਅਧਿਐਨ ਕਰਦੇ ਰਹੇ। ਉਨ੍ਹਾਂ ਨੇ ਜੀਵਾਸ਼ਮਾਂ ਅਤੇ ਪੁਰਾਤਨ ਪੱਥਰ ਦੇ ਸੰਦਾਂ ਦਾ ਵਿਸ਼ਾਲ ਸੰਗ੍ਰਹਿ ਵੀ ਇਕੱਠਾ ਕੀਤਾ।
