ਨਿਊਯਾਰਕ ’ਚ ਚੋਰੀ ਦਾ ਸਾਮਾਨ ਖਰੀਦ ਕੇ ਵੇਚਣ ਦਾ ਦੋਸ਼, ਡੇਲੀ ਮਾਲਕ ਗ੍ਰਿਫ਼ਤਾਰ
ਨਿਊਯਾਰਕ 8 ਅਕਤੂਬਰ 2026
ਨਿਊਯਾਰਕ ਦੇ ਟਾਊਨ ਆਫ਼ ਕੋਲੋਨੀ ਵਿੱਚ ਪੁਲਿਸ ਨੇ ਚੋਰੀ ਦਾ ਸਾਮਾਨ ਖਰੀਦ ਕੇ ਆਪਣੀ ਦੁਕਾਨ ਵਿੱਚ ਮੁੜ ਵੇਚਣ ਦੇ ਦੋਸ਼ ਹੇਠ 26 ਸਾਲਾ ਬਸ਼ਾਰ ਐਮ. ਮੋਹਸੇਨ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਮੋਹਸੇਨ ਸਕਾਈ ਬਲੂ ਡੇਲੀ ਐਂਡ ਗ੍ਰੋਸਰੀ ਦਾ ਮਾਲਕ ਦੱਸਿਆ ਗਿਆ ਹੈ। ਇਹ ਕਾਰਵਾਈ ਕੋਲੋਨੀ ਪੁਲਿਸ ਦੀ ਰਿਟੇਲ ਥੈਫਟ ਯੂਨਿਟ ਵੱਲੋਂ ਕਈ ਹਫ਼ਤਿਆਂ ਤੱਕ ਕੀਤੀ ਗਈ ਜਾਂਚ ਤੋਂ ਬਾਅਦ ਕੀਤੀ ਗਈ।
ਪੁਲਿਸ ਮੁਤਾਬਕ ਜਾਂਚ ਉਸ ਵੇਲੇ ਸ਼ੁਰੂ ਹੋਈ, ਜਦੋਂ ਸੂਚਨਾ ਮਿਲੀ ਕਿ ਕੁਝ ਵਿਅਕਤੀ ਇਲਾਕੇ ਦੇ ਵੱਖ-ਵੱਖ ਰਿਟੇਲ ਸਟੋਰਾਂ ਤੋਂ ਸਾਮਾਨ ਚੋਰੀ ਕਰਕੇ ਸੈਂਡ ਕ੍ਰੀਕ ਰੋਡ ਸਥਿਤ ਡੇਲੀ ’ਤੇ ਵੇਚ ਰਹੇ ਹਨ। ਦੋਸ਼ ਹੈ ਕਿ ਦੁਕਾਨ ਵੱਲੋਂ ਇਹ ਸਾਮਾਨ ਘੱਟ ਕੀਮਤ ’ਤੇ ਖਰੀਦ ਕੇ ਗਾਹਕਾਂ ਨੂੰ ਮੁੜ ਵੇਚਿਆ ਜਾਂਦਾ ਸੀ।
ਪੁਲਿਸ ਅਨੁਸਾਰ ਚੋਰੀ ਕੀਤੇ ਸਾਮਾਨ ਵਿੱਚ ਐਨਰਜੀ ਡ੍ਰਿੰਕਸ, ਬਿਊਟੀ ਪ੍ਰੋਡਕਟਸ ਅਤੇ ਸਫਾਈ ਨਾਲ ਸਬੰਧਤ ਵਸਤਾਂ ਸ਼ਾਮਲ ਸਨ। ਜਾਂਚ ਪੂਰੀ ਕਰਨ ਤੋਂ ਬਾਅਦ ਪੁਲਿਸ ਨੇ ਦੁਕਾਨ ਦੀ ਤਲਾਸ਼ੀ ਲਈ ਵਾਰੰਟ ਹਾਸਲ ਕੀਤਾ ਅਤੇ ਮਾਮਲੇ ਨਾਲ ਸਬੰਧਤ ਸਬੂਤ ਜ਼ਬਤ ਕੀਤੇ।
ਮੋਹਸੇਨ ਨੂੰ ਪੁੱਛਗਿੱਛ ਲਈ ਥਾਣੇ ਲਿਜਾਇਆ ਗਿਆ, ਜਿੱਥੇ ਉਸ ਨੂੰ ਚੋਰੀ ਦੀ ਸੰਪਤੀ ਆਪਣੇ ਕੋਲ ਰੱਖਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ। ਬਾਅਦ ਵਿੱਚ ਉਸ ਨੂੰ ਕੋਲੋਨੀ ਟਾਊਨ ਕੋਰਟ ਵਿੱਚ ਪੇਸ਼ ਹੋਣ ਲਈ ਨੋਟਿਸ ਦੇ ਕੇ ਰਿਹਾਅ ਕਰ ਦਿੱਤਾ ਗਿਆ। ਪੁਲਿਸ ਨੇ ਕਿਹਾ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ।
