- ਅਫ਼ਰੀਕੀ ਦੇਸ਼ ਜਿਬੂਤੀ ਦੇ ਤੱਟ ਨੇੜੇ ਪ੍ਰਵਾਸੀਆਂ ਨਾਲ ਭਰੀ ਕਿਸ਼ਤੀ ਡੁੱਬੀ, 109 ਮੌਤਾਂ; 116 ਲਾਪਤਾ
- ਕਿਸ਼ਤੀ ’ਚ ਸਵਾਰ ਸਨ ਲਗਭਗ 350 ਲੋਕ
- 80 ਤੋਂ ਵੱਧ ਨੂੰ ਬਚਾਇਆ ਗਿਆ; ਮ੍ਰਿਤਕਾਂ ਵਿੱਚ 15 ਬੱਚੇ ਵੀ ਸ਼ਾਮਲ
ਨਵੀਂ ਦਿੱਲੀ: 11 ਅਕਤੂਬਰ (ਦੇਸ਼ ਕਲਿੱਕ ਬਿਊਰੋ): ਅਫ਼ਰੀਕੀ ਦੇਸ਼ ਜਿਬੂਤੀ ਦੇ ਤੱਟ ਨੇੜੇ ਪ੍ਰਵਾਸੀਆਂ ਨਾਲ ਭਰੀ ਇੱਕ ਕਿਸ਼ਤੀ ਡੁੱਬਣ ਕਾਰਨ 109 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ 116 ਲੋਕ ਲਾਪਤਾ ਹਨ। ਕਿਸ਼ਤੀ ਵਿੱਚ ਲਗਭਗ 350 ਲੋਕ ਸਵਾਰ ਸਨ ਅਤੇ 80 ਤੋਂ ਵੱਧ ਲੋਕਾਂ ਨੂੰ ਬਚਾ ਲਿਆ ਗਿਆ ਹੈ। ਸੰਯੁਕਤ ਰਾਸ਼ਟਰ ਦੀ ਅੰਤਰਰਾਸ਼ਟਰੀ ਪ੍ਰਵਾਸ ਸੰਗਠਨ (ਆਈਓਐੱਮ) ਮੁਤਾਬਕ, ਇਹ ਹਾਦਸਾ 8 ਅਤੇ 9 ਅਕਤੂਬਰ ਦੀ ਦਰਮਿਆਨੀ ਰਾਤ ਨੂੰ ਜਿਬੂਤੀ ਦੇ ਓਬੋਕ ਸ਼ਹਿਰ ਦੇ ਉੱਤਰ ਵਿੱਚ ਵਾਪਰਿਆ। ਹਾਦਸੇ ਵਿੱਚ ਬਚੇ ਸਾਰੇ ਲੋਕ ਇਥੋਪੀਆ ਦੇ ਨਾਗਰਿਕ ਦੱਸੇ ਗਏ ਹਨ।
ਆਈਓਐੱਮ ਅਨੁਸਾਰ, ਹੁਣ ਤੱਕ 109 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ। ਇਨ੍ਹਾਂ ਵਿੱਚ 52 ਪੁਰਸ਼, 42 ਔਰਤਾਂ ਅਤੇ 15 ਬੱਚੇ ਸ਼ਾਮਲ ਹਨ। ਮ੍ਰਿਤਕ ਬੱਚਿਆਂ ਵਿੱਚ 9 ਕੁੜੀਆਂ ਅਤੇ 6 ਮੁੰਡੇ ਹਨ।
ਜਿਬੂਤੀ ਤੋਂ ਯਮਨ ਜਾ ਰਹੀ ਸੀ ਕਿਸ਼ਤੀ
ਹਾਦਸੇ ਵਿੱਚ ਬਚੇ ਲੋਕਾਂ ਨੇ ਦੱਸਿਆ ਕਿ ਕਿਸ਼ਤੀ ਜਿਬੂਤੀ ਤੋਂ ਯਮਨ ਵੱਲ ਜਾ ਰਹੀ ਸੀ, ਜਦੋਂ ਇਹ ਸਮੁੰਦਰ ਵਿੱਚ ਪਲਟ ਗਈ। ਲਾਪਤਾ ਲੋਕਾਂ ਦੀ ਭਾਲ ਅਤੇ ਪ੍ਰਭਾਵਿਤ ਪਰਿਵਾਰਾਂ ਦੀ ਸਹਾਇਤਾ ਲਈ ਆਈਓਐੱਮ ਦੀਆਂ ਟੀਮਾਂ ਜਿਬੂਤੀ ਦੇ ਅਧਿਕਾਰੀਆਂ ਨਾਲ ਮਿਲ ਕੇ ਕੰਮ ਕਰ ਰਹੀਆਂ ਹਨ। ਜਿਬੂਤੀ ਵਿੱਚ ਆਈਓਐੱਮ ਦੇ ਮਿਸ਼ਨ ਮੁਖੀ ਅਲੈਗਜ਼ੈਂਡਰ ਕੋਇਸਾਕ ਨੇ ਇਸ ਘਟਨਾ ਨੂੰ ਜਾਨੀ ਨੁਕਸਾਨ ਦੀ ਬੇਹੱਦ ਦੁਖਦਾਈ ਘਟਨਾ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀਆਂ ਸੰਵੇਦਨਾਵਾਂ ਉਨ੍ਹਾਂ ਪਰਿਵਾਰਾਂ ਨਾਲ ਹਨ, ਜਿਨ੍ਹਾਂ ਨੇ ਆਪਣੇ ਪਿਆਰਿਆਂ ਨੂੰ ਗੁਆ ਦਿੱਤਾ ਹੈ ਜਾਂ ਹਾਲੇ ਵੀ ਉਨ੍ਹਾਂ ਦੀ ਖ਼ਬਰ ਦੀ ਉਡੀਕ ਕਰ ਰਹੇ ਹਨ।
ਬਿਹਤਰ ਜ਼ਿੰਦਗੀ ਦੀ ਭਾਲ ਵਿੱਚ ਜੋਖ਼ਮ ਭਰਿਆ ਸਫ਼ਰ
ਆਈਓਐੱਮ ਮੁਤਾਬਕ, ਗ਼ਰੀਬੀ, ਅਸੁਰੱਖਿਆ ਅਤੇ ਜਲਵਾਯੂ ਤਬਦੀਲੀ ਦੇ ਵਧਦੇ ਪ੍ਰਭਾਵਾਂ ਕਾਰਨ ਕਈ ਲੋਕ ਰੁਜ਼ਗਾਰ ਅਤੇ ਬਿਹਤਰ ਜ਼ਿੰਦਗੀ ਦੀ ਭਾਲ ਵਿੱਚ ਇਹ ਖ਼ਤਰਨਾਕ ਸਮੁੰਦਰੀ ਰਸਤਾ ਅਪਣਾਉਂਦੇ ਹਨ। ਪ੍ਰਵਾਸੀ ਜਿਬੂਤੀ ਤੋਂ ਬਾਬ-ਅਲ-ਮੰਦਬ ਜਲਡਮਰੂਮੱਧ ਪਾਰ ਕਰਕੇ ਯਮਨ ਪਹੁੰਚਣ ਦੀ ਕੋਸ਼ਿਸ਼ ਕਰਦੇ ਹਨ। ਇਸ ਤੋਂ ਬਾਅਦ ਉਨ੍ਹਾਂ ਦਾ ਟੀਚਾ ਖਾੜੀ ਦੇਸ਼ਾਂ ਤੱਕ ਪਹੁੰਚਣਾ ਹੁੰਦਾ ਹੈ। ਇਸ ਰਸਤੇ ’ਤੇ ਕਿਸ਼ਤੀਆਂ ਡੁੱਬਣ ਅਤੇ ਜਾਨਾਂ ਜਾਣ ਦਾ ਖ਼ਤਰਾ ਬਣਿਆ ਰਹਿੰਦਾ ਹੈ। ਸੰਗਠਨ ਨੇ ਕਿਹਾ ਕਿ ਮੱਧ ਪੂਰਬ ਵਿੱਚ ਅਸਥਿਰਤਾ ਦੇ ਬਾਵਜੂਦ ਲੋਕ ਬਿਹਤਰ ਆਰਥਿਕ ਮੌਕਿਆਂ ਦੀ ਭਾਲ ਵਿੱਚ ਆਪਣੀਆਂ ਜਾਨਾਂ ਜੋਖ਼ਮ ਵਿੱਚ ਪਾ ਕੇ ਇਹ ਯਾਤਰਾ ਕਰ ਰਹੇ ਹਨ।
