- ਡੇਟਿੰਗ ਐਪ ’ਤੇ ਮਿਲੇ ਨੌਜਵਾਨ ਨਾਲ ਵਿਆਹ ਕਰਵਾਉਣ ਕੈਨੇਡਾ ਤੋਂ ਭਾਰਤ ਪਹੁੰਚੀ ਮਹਿਲਾ, ਪਰ ਮੁੰਡੇ ਨੇ ਕੀਤਾ ਇਨਕਾਰ
ਨਵੀਂ ਦਿੱਲੀ: 15 ਨਵੰਬਰ (ਦੇਸ਼ ਕਲਿੱਕ ਬਿਊਰੋ): ਰਾਜਸਥਾਨ ਦੇ ਕੋਟਪੁਤਲੀ-ਬਹਿਰੋੜ ਜ਼ਿਲ੍ਹੇ ਦੇ ਨੀਮਰਾਣਾ ਵਿੱਚ ਆਨਲਾਈਨ ਡੇਟਿੰਗ ਐਪ ਰਾਹੀਂ ਸ਼ੁਰੂ ਹੋਈ ਦੋਸਤੀ ਦਾ ਇੱਕ ਵਿਲੱਖਣ ਮਾਮਲਾ ਸਾਹਮਣੇ ਆਇਆ ਹੈ। ਕੈਨੇਡਾ ਤੋਂ ਇੱਕ ਮਹਿਲਾ ਆਪਣੇ ਭਾਰਤੀ ਦੋਸਤ ਨਾਲ ਵਿਆਹ ਕਰਵਾਉਣ ਲਈ ਇੱਥੇ ਪਹੁੰਚੀ ਸੀ, ਪਰ ਨੌਜਵਾਨ ਵੱਲੋਂ ਉਸ ਦੀ ਉਮਰ ਬਾਰੇ ਪਤਾ ਲੱਗਣ ਮਗਰੋਂ ਵਿਆਹ ਤੋਂ ਇਨਕਾਰ ਕਰਨ ਦਾ ਦੋਸ਼ ਹੈ। ਇਸ ਤੋਂ ਬਾਅਦ ਮਹਿਲਾ ਨੇ ਕੈਨੇਡੀਅਨ ਦੂਤਾਵਾਸ ਨਾਲ ਸੰਪਰਕ ਕੀਤਾ, ਜਿਸ ਦੀ ਸੂਚਨਾ ਮਿਲਣ ’ਤੇ ਪੁਲਿਸ ਨੇ ਦਖ਼ਲ ਦਿੱਤਾ। ਨੀਮਰਾਣਾ ਦੇ ਥਾਣਾ ਮੁਖੀ ਸੁਰੇਂਦਰ ਯਾਦਵ ਮੁਤਾਬਕ, ਕੈਨੇਡੀਅਨ ਮਹਿਲਾ ਅਤੇ ਹਰਿਆਣਾ ਦੇ ਪਾਣੀਪਤ ਵਾਸੀ ਨਿਤਿਨ ਦੀ ਮੁਲਾਕਾਤ ਕਰੀਬ ਇੱਕ ਸਾਲ ਪਹਿਲਾਂ ਡੇਟਿੰਗ ਐਪ ਰਾਹੀਂ ਹੋਈ ਸੀ। ਗੱਲਬਾਤ ਵਧਣ ਨਾਲ ਦੋਵਾਂ ਵਿਚਾਲੇ ਦੋਸਤੀ ਹੋ ਗਈ ਅਤੇ ਉਨ੍ਹਾਂ ਨੇ ਵਿਆਹ ਕਰਨ ਦਾ ਫ਼ੈਸਲਾ ਕਰ ਲਿਆ।
11 ਨਵੰਬਰ ਨੂੰ ਦਿੱਲੀ ਪਹੁੰਚੀ ਸੀ ਮਹਿਲਾ
ਪੁਲਿਸ ਅਨੁਸਾਰ, ਵਿਆਹ ਦੀ ਯੋਜਨਾ ਤਹਿਤ ਮਹਿਲਾ ਟੂਰਿਸਟ ਵੀਜ਼ੇ ’ਤੇ 11 ਨਵੰਬਰ ਨੂੰ ਦਿੱਲੀ ਪਹੁੰਚੀ ਸੀ। ਨਿਤਿਨ ਉਸ ਨੂੰ ਹਵਾਈ ਅੱਡੇ ਤੋਂ ਲੈ ਕੇ ਨੀਮਰਾਣਾ ਆਇਆ, ਜਿੱਥੇ ਦੋਵੇਂ ਉਸ ਦੇ ਚਾਚਾ-ਚਾਚੀ ਦੇ ਫਲੈਟ ਵਿੱਚ ਰਹੇ। ਮਹਿਲਾ ਕਰੀਬ ਦੋ ਦਿਨ ਉਸ ਦੇ ਨਾਲ ਰਹੀ ਅਤੇ ਇਸ ਦੌਰਾਨ ਵਿਆਹ ਸਬੰਧੀ ਗੱਲਬਾਤ ਵੀ ਹੋਈ। ਪੁਲਿਸ ਦਾ ਕਹਿਣਾ ਹੈ ਕਿ ਜਦੋਂ ਨਿਤਿਨ ਨੂੰ ਮਹਿਲਾ ਦੀ ਉਮਰ ਕਰੀਬ 61 ਸਾਲ ਹੋਣ ਬਾਰੇ ਪਤਾ ਲੱਗਾ ਤਾਂ ਉਸ ਨੇ ਵਿਆਹ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਇਸ ਗੱਲ ਨੂੰ ਲੈ ਕੇ ਦੋਵਾਂ ਵਿਚਾਲੇ ਤਕਰਾਰ ਹੋ ਗਈ।
ਦੂਤਾਵਾਸ ਦੀ ਸੂਚਨਾ ’ਤੇ ਪਹੁੰਚੀ ਪੁਲਿਸ
ਵਿਵਾਦ ਤੋਂ ਬਾਅਦ ਮਹਿਲਾ ਨੇ 13 ਨਵੰਬਰ ਨੂੰ ਕੈਨੇਡੀਅਨ ਦੂਤਾਵਾਸ ਨਾਲ ਸੰਪਰਕ ਕਰਕੇ ਪੂਰੇ ਮਾਮਲੇ ਦੀ ਜਾਣਕਾਰੀ ਦਿੱਤੀ। ਦੂਤਾਵਾਸ ਵੱਲੋਂ ਸੂਚਨਾ ਮਿਲਣ ’ਤੇ ਨੀਮਰਾਣਾ ਪੁਲਿਸ ਮੌਕੇ ’ਤੇ ਪਹੁੰਚੀ ਅਤੇ ਦੋਵਾਂ ਨੂੰ ਥਾਣੇ ਲਿਆਂਦਾ ਗਿਆ। ਪੁਲਿਸ ਨੇ ਨਿਤਿਨ ਨੂੰ ਪੁੱਛਗਿੱਛ ਲਈ ਹਿਰਾਸਤ ਵਿੱਚ ਲਿਆ ਹੈ, ਜਦਕਿ ਕੈਨੇਡੀਅਨ ਮਹਿਲਾ ਨੂੰ ਕੋਟਪੁਤਲੀ ਦੇ ਕੇਅਰ ਸੈਂਟਰ ਵਿੱਚ ਰੱਖਿਆ ਗਿਆ ਹੈ। ਪੁਲਿਸ ਮੁਤਾਬਕ, ਨਿਤਿਨ ਪਾਣੀਪਤ ਦਾ ਰਹਿਣ ਵਾਲਾ ਹੈ ਅਤੇ ਇੱਕ ਨਿੱਜੀ ਸਕੂਲ ਵਿੱਚ ਅਧਿਆਪਕ ਵਜੋਂ ਕੰਮ ਕਰਦਾ ਹੈ। ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਪੁੱਛਗਿੱਛ ਤੇ ਜਾਂਚ ਦੇ ਨਤੀਜਿਆਂ ਦੇ ਆਧਾਰ ’ਤੇ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।