- ਤੁਰਕੀਏ ਜਾ ਰਹੀ ਫੈਰੀ ਬੋਟ ਸਮੁੰਦਰ ’ਚ ਪਲਟੀ: 7 ਦੀ ਮੌਤ, 24 ਲਾਪਤਾ
- 270 ਤੋਂ ਵੱਧ ਯਾਤਰੀ ਸਨ ਸਵਾਰ
ਨਵੀਂ ਦਿੱਲੀ, 30 ਅਗਸਤ (ਦੇਸ਼ ਕਲਿੱਕ ਬਿਊਰੋ): ਮੈਡੀਟੇਰੇਨੀਅਨ ਸਾਗਰ ਵਿੱਚ ਤੁਰਕੀਏ ਜਾ ਰਹੀ ਇੱਕ ਫੈਰੀ ਬੋਟ ਐਤਵਾਰ ਨੂੰ ਸਮੁੰਦਰ ਵਿੱਚ ਪਲਟ ਗਈ। ਇਹ ਫੈਰੀ ਯੂਰਪੀ ਦੇਸ਼ ਸਾਈਪ੍ਰਸ ਦੇ ਉੱਤਰੀ ਤੱਟ ਤੋਂ 270 ਤੋਂ ਵੱਧ ਯਾਤਰੀਆਂ ਨੂੰ ਲੈ ਕੇ ਰਵਾਨਾ ਹੋਈ ਸੀ। ਤੁਰਕੀਏ ਦੀਆਂ ਮੀਡੀਆ ਰਿਪੋਰਟਾਂ ਮੁਤਾਬਕ ਹਾਦਸੇ ਵਿੱਚ ਘੱਟੋ-ਘੱਟ 7 ਲੋਕਾਂ ਦੀ ਮੌਤ ਹੋ ਗਈ ਹੈ। ਉੱਤਰੀ ਸਾਈਪ੍ਰਸ ਦੇ ਪ੍ਰਧਾਨ ਮੰਤਰੀ ਉਨਾਲ ਉਸਤੇਲ ਨੇ ਦੱਸਿਆ ਕਿ ਹੁਣ ਤੱਕ 237 ਲੋਕਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਹੈ। ਕਈ ਯਾਤਰੀਆਂ ਨੇ ਪਲਟੀ ਹੋਈ ਬੋਟ ਦੇ ਉੱਪਰ ਚੜ੍ਹ ਕੇ ਆਪਣੀ ਜਾਨ ਬਚਾਉਣ ਦੀ ਕੋਸ਼ਿਸ਼ ਕੀਤੀ। ਉੱਥੇ ਹੀ 24 ਹੋਰ ਲੋਕਾਂ ਦੀ ਭਾਲ ਲਈ ਰਾਹਤ ਅਤੇ ਬਚਾਅ ਮੁਹਿੰਮ ਜਾਰੀ ਹੈ। ਉਨ੍ਹਾਂ ਮੁਤਾਬਕ ਖਰਾਬ ਮੌਸਮ ਦੇ ਬਾਵਜੂਦ ਫੈਰੀ ਰਵਾਨਾ ਹੋਈ ਸੀ। ਰਵਾਨਗੀ ਤੋਂ ਕਰੀਬ 15 ਮਿੰਟ ਬਾਅਦ ਬੋਟ ਵਿੱਚ ਪਾਣੀ ਭਰਨਾ ਸ਼ੁਰੂ ਹੋ ਗਿਆ ਅਤੇ ਇਸ ਤੋਂ ਬਾਅਦ ਇਹ ਹਾਦਸਾ ਵਾਪਰ ਗਿਆ। ਰਾਹਤ ਅਤੇ ਬਚਾਅ ਟੀਮਾਂ ਲਗਾਤਾਰ ਮੌਕੇ ’ਤੇ ਕੰਮ ਕਰ ਰਹੀਆਂ ਹਨ।
ਸਾਈਪ੍ਰਸ ਤੱਟ ਤੋਂ 7.5 ਕਿਲੋਮੀਟਰ ਦੂਰ ਵਾਪਰਿਆ ਹਾਦਸਾ
ਤੁਰਕੀਏ ਦੀਆਂ ਮੀਡੀਆ ਰਿਪੋਰਟਾਂ ਅਨੁਸਾਰ ਇਹ ਹਾਦਸਾ ਉੱਤਰੀ ਸਾਈਪ੍ਰਸ ਦੇ ਤੱਟ ਤੋਂ ਕਰੀਬ 7.5 ਕਿਲੋਮੀਟਰ ਦੂਰ ਵਾਪਰਿਆ। ਕੈਟਾਮਰੈਨ ਸ਼ੈਲੀ ਦੀ ਇਹ ਫੈਰੀ ਤੁਰਕੀਏ ਦੇ ਮਰਸਿਨ ਸੂਬੇ ਦੇ ਤਾਸੁਕੂ ਬੰਦਰਗਾਹ ਵੱਲ ਜਾ ਰਹੀ ਸੀ। ਇਹ ਉੱਤਰੀ ਸਾਈਪ੍ਰਸ ਦੇ ਕਾਇਰੇਨੀਆ ਬੰਦਰਗਾਹ ਤੋਂ ਰਵਾਨਾ ਹੋਈ ਸੀ।
ਕੀ ਹੁੰਦੀ ਹੈ ਕੈਟਾਮਰੈਨ ਫੈਰੀ ?
ਕੈਟਾਮਰੈਨ ਇੱਕ ਖਾਸ ਕਿਸਮ ਦੀ ਕਿਸ਼ਤੀ ਜਾਂ ਫੈਰੀ ਹੁੰਦੀ ਹੈ, ਜਿਸ ਵਿੱਚ ਹੇਠਾਂ ਦੋ ਸਮਾਨਾਂਤਰ ਹਿੱਸੇ ਜਾਂ ਹਲ ਹੁੰਦੇ ਹਨ। ਇਹ ਡਿਜ਼ਾਈਨ ਆਮ ਤੌਰ ’ਤੇ ਬੋਟ ਨੂੰ ਪਾਣੀ ਵਿੱਚ ਵਧੇਰੇ ਸਥਿਰ ਰੱਖਣ ਵਿੱਚ ਮਦਦ ਕਰਦਾ ਹੈ। ਹਾਲਾਂਕਿ, ਬਹੁਤ ਖਰਾਬ ਮੌਸਮ, ਤੇਜ਼ ਹਵਾਵਾਂ ਅਤੇ ਉੱਚੀਆਂ ਲਹਿਰਾਂ ਵਿੱਚ ਇਸ ਦੇ ਪਲਟਣ ਦਾ ਖਤਰਾ ਵੀ ਰਹਿੰਦਾ ਹੈ। ਲੋੜ ਤੋਂ ਵੱਧ ਯਾਤਰੀਆਂ ਜਾਂ ਸਮਾਨ ਦਾ ਭਾਰ ਵੀ ਖਤਰਾ ਵਧਾ ਸਕਦਾ ਹੈ। ਕੈਟਾਮਰੈਨ ਦੇ ਪਲਟਣ ਤੋਂ ਬਾਅਦ ਇਸਨੂੰ ਮੁੜ ਸਿੱਧਾ ਕਰਨਾ ਆਮ ਜਹਾਜ਼ ਦੇ ਮੁਕਾਬਲੇ ਕਾਫ਼ੀ ਮੁਸ਼ਕਲ ਹੋ ਸਕਦਾ ਹੈ। ਫਿਲਹਾਲ ਲਾਪਤਾ ਯਾਤਰੀਆਂ ਦੀ ਭਾਲ ਲਈ ਰੈਸਕਿਊ ਆਪਰੇਸ਼ਨ ਜਾਰੀ ਹੈ।
