ਇਕੱਲੀ ਯੂਨੀਵਰਸਿਟੀ ਹੀ ਨਹੀਂ, ਚੰਡੀਗੜ੍ਹ ਵੀ ਸਾਡਾ, ਉਹ ਵੀ ਲੈਣਾ : ਬਲਬੀਰ ਰਾਜੇਵਾਲ

ਕਿਹਾ, ਪੰਜਾਬ ’ਚ ਹਰਿਆਣਾ ਪੁਲਿਸ ਨੇ ਕਿਸਾਨਾਂ ਨੂੰ ਚੰਡੀਗੜ੍ਹ ਜਾਣ ਤੋਂ ਰੋਕਿਆ

ਚੰਡੀਗੜ੍ਹ, 10 ਨਵੰਬਰ, ਦੇਸ਼ ਕਲਿੱਕ ਬਿਓਰੋ :

ਪੰਜਾਬ ਯੂਨੀਵਰਸਿਟੀ ਵਿੱਚ ਵਿਦਿਆਰਥੀਆਂ ਵੱਲੋਂ ਅੱਜ ਇਕੱਠ ਦੇ ਦਿੱਤੇ ਗਏ ਸੱਦੇ ਵਿਚ ਰਿਕਾਰਡ ਤੋੜ ਪੰਜਾਬ ਭਰ ਵਿਚ ਲੋਕ ਪਹੁੰਚੇ। ਪੰਜਾਬ ਵਿਚੋਂ ਚੰਡੀਗੜ੍ਹ ਵਿਚ ਜਾਣ ਤੋਂ ਰੋਕਣ ਲਈ ਪੁਲਿਸ ਵੱਲੋਂ ਸਖਤ ਬੈਰੀਕੇਡ ਕੀਤੇ ਗਏ, ਪਰ ਸੰਘਰਸ਼ਕਾਰੀ ਸਾਰੇ ਬੈਰੀਕੇਡ ਤੋੜ ਕੇ ਪੰਜਾਬ ਯੂਨੀਵਰਸਿਟੀ ਪਹੁੰਚੇ। ਇਸ ਮੌਕੇ ਸੰਬੋਧਨ ਕਰਦੇ ਹੋਏ ਕਿਸਾਨ ਆਗੂ ਬਲਬੀਰ ਸਿੰਘ ਰਾਜੇਵਾਲ ਨੇ ਕਿਹਾ ਕਿ ਵਿਦਿਆਰਥੀਆਂ ਨੇ ਯੂਨੀਵਰਸਿਟੀ ਦੇ ਮੁੱਦੇ ਨੂੰ ਗੰਭੀਰਤਾ ਨਾਲ ਲਿਆ ਅਤੇ ਕਿਸੇ ਸਿੱਟੇ ਉਤੇ ਪਹੁੰਚਾਇਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਹੁਣ ਸਿਰਫ ਯੂਨੀਵਰਸਿਟੀ ਤੱਕ ਹੀ ਸੀਮਤ ਨਹੀਂ ਰਿਹਾ, ਪੰਜਾਬੀਆਂ ਵਿਚ ਸਾਰੀਆਂ ਮੰਗਾਂ ਲਈ ਨਵੇਂ ਸਿਰੇ ਤੋਂ ਉਮੰਗ ਪੈਦਾ ਹੋਈ ਹੈ। ਰਾਜੇਵਾਲ ਨੇ ਕਿਹਾ ਕਿ ਪੰਜਾਬ ਨਾਲ ਹਮੇਸ਼ਾਂ ਧੱਕਾ ਹੁੰਦਾ ਰਿਹਾ ਹੈ, ਸਾਡੇ ਨਾਲ ਠੱਗੀ ਵਜੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਲਈ ਸਮੇਂ ਸਮੇਂ ਦੀਆਂ ਪਾਰਟੀਆਂ ਇਸ ਲਈ ਜ਼ਿੰਮੇਵਾਰੀ ਹਨ, ਜਿੰਨਾਂ ਨੇ ਧਿਆਨ ਨਹੀਂ ਦਿੱਤਾ। ਉਨ੍ਹਾਂ ਕਿਹਾ ਕਿ ਸਾਨੂੰ ਜਦੋਂ ਮੋਹਾਲੀ ਵਿਚ ਰੋਕਿਆ ਗਿਆ ਤਾਂ ਸਾਡੇ ਉਤੇ ਹਮਲਾ ਕਰਨ ਲਈ ਹਰਿਆਣਾ ਪੁਲਿਸ ਦੀ ਟੁਕੜੀ ਭੇਜੀ ਗਈ। ਉਨ੍ਹਾਂ ਕਿਹਾ ਕਿ ਮੈਂ ਪੰਜਾਬ ਸਰਕਾਰ ਨੂੰ ਪੁੱਛਣਾ ਚਾਹੁੰਦਾ ਹਾਂ ਕਿ ਹਰਿਆਣਾ ਪੁਲਿਸ ਦੀ ਕਿਵੇਂ ਜੁਅਰਤ ਪੈ ਗਈ ਕਿ ਉਹ ਪੰਜਾਬ ਵਿਚ ਆ ਕਿ ਹਮਲਾ ਕਰੇ। ਉਨ੍ਹਾਂ ਕਿਹਾ ਕਿ ਜਿਹੜੇ ਚੰਡੀਗੜ੍ਹ ਵਿਚ ਸਾਨੂੰ ਵੜ੍ਹਨ ਨਹੀਂ ਦਿੰਦੇ ਉਹ ਵੀ ਅਸੀਂ ਲੈਣਾ ਹੈ। ਚੰਡੀਗੜ੍ਹ ਸਾਡਾ ਹੈ। ਉਨ੍ਹਾਂ ਰਾਜਨੀਤਿਕ ਪਾਰਟੀਆਂ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਕਿਹਾ ਕਿ ਪਤਾ ਨਹੀਂ ਕੀ ਹੋਇਆ ਕਿ ਚੋਣਾਂ ਜਿੱਤੀਆਂ ਤੇ ਸੱਤਾ ਲਈ ਚੁੱਪ ਹੋ ਜਾਂਦੇ ਹਨ। ਉਨ੍ਹਾਂ ਕਿਹਾ ਕਿ ਜਿਵੇਂ ਵਿਦਿਆਰਥੀ ਸੱਦਾ ਦਿੰਦੇ ਰਹਿਣਗੇ ਉਸੇ ਤਰ੍ਹਾਂ ਸਾਡੇ ਜੱਥੇ ਆਉਂਦੇ ਰਹਿਣਗੇ।