ਮੋਹਾਲੀ, 30 ਨਵੰਬਰ, ਜਸਵੀਰ ਗੋਸਲ :
ਗੌਰਮਿੰਟ ਸਕੂਲ ਲੈਕਚਰਾਰ ਯੂਨੀਅਨ ਪੰਜਾਬ ਦੀ ਮੀਟਿੰਗ ਸੂਬਾ ਪ੍ਰਧਾਨ ਸ੍ਰੀ ਸੰਜੀਵ ਕੁਮਾਰ ਦੀ ਪ੍ਰਧਾਨਗੀ ਵਿੱਚ ਹੋਈ ਇਸ ਮੀਟਿੰਗ ਵਿੱਚ ਯੋਗਤਾ ਦੇ ਆਧਾਰ ਉੱਤੇ ਲੈਕਚਰਾਰਾਂ ਤੋਂ ਪ੍ਰਿੰਸੀਪਲ ਦੀਆਂ ਤਰੱਕੀਆਂ ਨੂੰ ਵਿਚਾਰਿਆ ਗਿਆ ਇਸ ਬਾਰੇ ਉਹਨਾਂ ਵਿਸਥਾਰ ਵਿੱਚ ਦੱਸਦਿਆਂ ਕਿਹਾ ਕਿ ਵਿਭਾਗ ਵੱਲੋਂ ਇਹਨਾਂ ਤਰੱਕੀਆਂ ਲਈ ਯੋਗਤਾ ਐਮਏ ਅਤੇ ਬੀਐਡ ਪੰਜ ਸਾਲ ਦੇ ਤਜਰਬੇ ਨਾਲ ਰੱਖੀ ਗਈ ਹੈ ਉਹਨਾਂ ਦੱਸਿਆ ਕਿ ਮੌਜੂਦਾ ਸਮੇਂ ਜਿਹੜੇ ਲੈਕਚਰਾਰ ਤਰੱਕੀਆਂ ਲਈ ਵਿਚਾਰੇ ਜਾ ਰਹੇ ਹਨ ਉਨਾਂ ਦਾ ਤਜਰਬਾ 25 ਸਾਲ ਤੋਂ ਉੱਪਰ ਦਾ ਹੈ ਅਤੇ ਉਹਨਾਂ ਵਿੱਚੋਂ 10 ਫੀਸਦੀ ਲੈਕਚਰਾਰ ਪੀ-ਐੱਚ ਡੀ, 20 ਫੀਸਦੀ ਲੈਕਚਰਾਰ ਐੱਮ ਫਿਲ ਜਾਂ ਐਮ ਐਡ ਜਾਂ ਐਲ ਐਲ ਬੀ ਜਾਂ ਮਾਸਟਰ ਆਫ਼ ਮਾਸ ਕਮਿਉਨੀਕੇਸ਼ਨ ਜਾਂ ਅਲੱਗ ਅਲੱਗ ਵਿਸ਼ਿਆਂ ਵਿੱਚ ਦੋ ਤੋਂ ਤਿੰਨ ਐੱਮ. ਏ ਹਨ |
ਉਹਨਾਂ ਅੱਗੇ ਦੱਸਿਆ ਕਿ ਤਕਰੀਬਨ 25 ਫੀਸਦੀ ਸਕੂਲ ਲੈਕਚਰਾਰ ਕਾਲਜ ਜਾਂ ਯੂਨੀਵਰਸਿਟੀ ਪੱਧਰ ਦੀ ਯੋਗਤਾ ਰੱਖਦੇ ਹਨ| ਇਸ ਦੇ ਨਾਲ ਹੀ ਇਹਨਾਂ ਲੈਕਚਰਾਰਾਂ ਦਾ ਤਕਰੀਬਨ 15 ਤੋਂ 20 ਸਾਲ ਦਾ ਪ੍ਰਬੰਧਕੀ (ਡੀਡੀ ਓ ਪਾਵਰਾਂ ਸਮੇਤ ਜਾਂ ਬਤੌਰ ਇੰਚਾਰਜ) ਤਜ਼ਰਬਾ ਵੀ ਹੈ | ਜਥੇਬੰਦੀ ਦੇ ਮੁੱਖ ਸਲਾਹਕਾਰ ਸੁਖਦੇਵ ਸਿੰਘ ਰਾਣਾ ਨੇ ਦੱਸਿਆ ਕਿ ਬਹੁਤ ਸਾਰੇ ਲੈਕਚਰਾਰ ਪੰਜਾਬ ਸਰਕਾਰ ਵੱਲੋਂ ਸਟੇਟ ਅਵਾਰਡ ਅਤੇ ਭਾਰਤ ਸਰਕਾਰ ਵੱਲੋਂ ਰਾਸ਼ਟਰੀ ਪੁਰਸਕਾਰ ਪ੍ਰਾਪਤ ਕਰਕੇ ਆਪਣੇ ਕੀਰਤੀਮਾਨ ਸਥਾਪਿਤ ਕਰ ਚੁੱਕੇ ਹਨ|ਇਸ ਦੇ ਨਾਲ਼ ਹੀ ਬਹੁਤ ਸਾਰੇ ਲੈਕਚਰਾਰ ਯੂਨੀਵਰਸਿਟੀ ਗ੍ਰਾਟ ਕਮਿਸ਼ਨ ਵੱਲੋਂ ਲਈ ਜਾਂਦੀ ਨੈਸ਼ਨਲ ਅਲਿਜ਼ੀਬਿਲਟੀ ਪਰੀਖਿਆ ਵੀਂ ਕਲੀਅਰ ਹਨ ਜਥੇਬੰਦੀ ਦੇ ਸੂਬਾ ਜਨਰਲ ਸਕੱਤਰ ਸਰਦਾਰ ਬਲਰਾਜ ਸਿੰਘ ਬਾਜਵਾ ਨੇ ਕਿਹਾ ਕਿ ਮੌਜੂਦਾ ਸਮੇਂ ਜਦੋਂ ਪੰਜਾਬ ਵਿੱਚ 1100 ਦੇ ਕਰੀਬ ਸੀਨੀਅਰ ਸੈਕੰਡਰੀ ਸਕੂਲ ਪ੍ਰਿੰਸੀਪਲਾਂ ਤੋਂ ਸੱਖਣੇ ਹਨ ਉਸ ਸਮੇਂ ਸਕੂਲਾਂ ਦਾ ਪ੍ਰਬੰਧ ਇਹ ਸਕੂਲ ਲੈਕਚਰਾਰ ਆਪਣਾ ਵਿਸ਼ਾ ਪੜਾਉਂਦੇ ਦੇ ਨਾਲ ਨਾਲ ਸੰਭਾਲ ਰਹੇ ਹਨ|
ਸੂਬਾ ਸਕੱਤਰ ਜਨਰਲ ਸਰਦਾਰ ਰਵਿੰਦਰ ਪਾਲ ਸਿੰਘ ਨੇ ਕਿਹਾ ਕਿ ਸਰਕਾਰ ਵੱਲੋਂ ਉੱਚ ਯੋਗਤਾ ਪ੍ਰਾਪਤ ਤੇ ਲੰਮਾ ਤਜਰਬਾ ਰੱਖਣ ਵਾਲੇ ਲੈਕਚਰਾਰਾਂ ਨੂੰ ਬਤੌਰ ਪ੍ਰਿੰਸੀਪਲ ਸੇਵਾਵਾਂ ਪ੍ਰਦਾਨ ਕਰਨਾ ਇੱਕ ਸ਼ਲਾਘਾਯੋਗ ਕਾਰਜ ਹੈ ਜਿਸ ਦਾ ਜਥੇਬੰਦੀ ਭਰਵਾਂ ਸਵਾਗਤ ਕਰਦੀ ਹੈ | ਇਸ ਸਬੰਧ ਵਿੱਚ ਸੂਬਾ ਪ੍ਰੈੱਸ ਸਕੱਤਰ ਸਰਦਾਰ ਰਣਬੀਰ ਸਿੰਘ ਸੋਹਲ ਨੇ ਕਿਹਾ ਕਿ ਕੁਝ ਕਾਡਰ ਦੋਖੀ ਲੈਕਚਰਾਰਾਂ ਦੀ ਯੋਗਤਾ ਤੇ ਤਜਰਬੇ ਨੂੰ ਘੱਟ ਆਂਕਦੇ ਹੋਏ ਸਮਾਜ ਵਿੱਚ ਕਾਡਰ ਦੇ ਅਕਸ ਨੂੰ ਢਾਹ ਲਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਉਹਨਾਂ ਅਜਿਹੇ ਅੰਸਰਾਂ ਨੂੰ ਅਗਾਹ ਕਰਦਿਆਂ ਸਲਾਹ ਦਿੱਤੀ ਕਿ ਉਹ ਲੈਕਚਰਾਰ ਕਾਡਰ ਵਿਰੋਧੀ ਗਤੀਵਿਧੀਆਂ ਤੋਂ ਬਾਜ ਆ ਜਾਣ ਨਹੀਂ ਤਾਂ ਜਥੇਬੰਦੀ ਕਾਨੂੰਨੀ ਅਤੇ ਵਿਭਾਗੀ ਚਾਰਾਜੋਈ ਕਰਨ ਦੇ ਰਾਹ ਪਵੇਗੀ|