ਆਫਲਾਈਨ ਟੈਕਸੀ ਬੁਕਿੰਗ ਬਣੀ ਮੌਤ ਦਾ ਸਫ਼ਰ, 22 ਸਾਲਾ ਚਾਲਕ ਦੀ ਹੱਤਿਆ; ਛੇ ਮੁਲਜ਼ਮ ਗ੍ਰਿਫ਼ਤਾਰ
ਨਵੀਂ ਦਿੱਲੀ, 22 ਅਗਸਤ 2026:
ਦਿੱਲੀ ਤੋਂ ਜੈਪੁਰ ਜਾਣ ਲਈ ਕੀਤੀ ਗਈ ਇੱਕ ਆਫਲਾਈਨ ਟੈਕਸੀ ਬੁਕਿੰਗ 22 ਸਾਲਾ ਚਾਲਕ ਲਈ ਮੌਤ ਦਾ ਸਫ਼ਰ ਬਣ ਗਈ। ਪੁਲਿਸ ਅਨੁਸਾਰ ਉੱਤਰ ਪ੍ਰਦੇਸ਼ ਦੇ ਔਰਈਆ ਵਾਸੀ ਆਸ਼ੀਸ਼ ਪਾਲ ਨੂੰ ਕੁਝ ਨੌਜਵਾਨਾਂ ਨੇ ਜੈਪੁਰ ਜਾਣ ਲਈ ਟੈਕਸੀ ਕਿਰਾਏ ’ਤੇ ਲਈ ਅਤੇ ਰਸਤੇ ਵਿੱਚ ਕਿਰਾਏ ਨੂੰ ਲੈ ਕੇ ਹੋਏ ਵਿਵਾਦ ਮਗਰੋਂ ਉਸ ਦੀ ਕਥਿਤ ਤੌਰ ’ਤੇ ਹੱਤਿਆ ਕਰ ਦਿੱਤੀ।
ਪੁਲਿਸ ਮੁਤਾਬਕ ਮੁਲਜ਼ਮਾਂ ਨੇ ਪਹਿਲਾਂ ਆਸ਼ੀਸ਼ ਨਾਲ ਕੁੱਟਮਾਰ ਕੀਤੀ ਅਤੇ ਫਿਰ ਗਲਾ ਘੁੱਟ ਕੇ ਉਸ ਦੀ ਜਾਨ ਲੈ ਲਈ। ਇਸ ਤੋਂ ਬਾਅਦ ਲਾਸ਼ ਨੂੰ ਟੈਕਸੀ ਵਿੱਚ ਲੁਕਾ ਕੇ ਰਾਜਸਥਾਨ ਲਿਜਾਇਆ ਗਿਆ ਅਤੇ ਮੋਖਮਪੁਰਾ ਖੇਤਰ ਦੇ ਜੰਗਲੀ ਇਲਾਕੇ ਵਿੱਚ ਸੁੱਟ ਦਿੱਤਾ ਗਿਆ।
ਜਾਂਚ ਦੌਰਾਨ ਦਿੱਲੀ ਪੁਲਿਸ ਨੇ ਸੀਸੀਟੀਵੀ ਦ੍ਰਿਸ਼ਾਂ, ਤਕਨੀਕੀ ਸਬੂਤਾਂ ਅਤੇ ਵਾਹਨ ਦੀ ਆਵਾਜਾਈ ਦੇ ਆਧਾਰ ’ਤੇ ਮਾਮਲੇ ਦੀ ਗੁੱਥੀ ਸੁਲਝਾਈ। ਪੁਲਿਸ ਨੇ ਇੱਕ ਨਾਬਾਲਗ ਸਮੇਤ ਛੇ ਮੁਲਜ਼ਮਾਂ ਨੂੰ ਕਾਬੂ ਕੀਤਾ ਹੈ। ਇਨ੍ਹਾਂ ਵਿੱਚ ਅਨਿਲ ਜਾਟ, ਕਾਲੂਰਾਮ, ਸੁਮਿਤ, ਮੰਗਲ ਦੀਪ ਉਰਫ਼ ਸਾਨੂ ਅਤੇ ਅਰਜੁਨ ਰਿਨਵਾ ਸ਼ਾਮਲ ਹਨ।
ਪੁੱਛਗਿੱਛ ਵਿੱਚ ਸਾਹਮਣੇ ਆਇਆ ਕਿ ਮੁਲਜ਼ਮ ਕਥਿਤ ਤੌਰ ’ਤੇ ਆਰਥਿਕ ਤੰਗੀ ਕਾਰਨ ਟੈਕਸੀ ਲੁੱਟਣ ਦੀ ਯੋਜਨਾ ਬਣਾ ਰਹੇ ਸਨ। ਪੁਲਿਸ ਨੇ ਲੁੱਟੀ ਗਈ ਟੈਕਸੀ ਵੀ ਬਰਾਮਦ ਕਰ ਲਈ ਹੈ।