World Breaking: ਅਮਰੀਕਾ ’ਚ ਸਾਬਕਾ CIA ਮੁਖਬਰ ਦੀ ਗ੍ਰਿਫ਼ਤਾਰੀ, ਹੁਣ ਦੇਸ਼ ਨਿਕਾਲੇ ਦਾ ਖ਼ਤਰਾ; ਅਦਾਲਤ ਪਹੁੰਚੇ ਵਕੀਲ
ਨਿਊਯਾਰਕ, 21 ਅਗਸਤ 2026
ਅਮਰੀਕਾ ਵਿੱਚ ਅੱਤਵਾਦ ਵਿਰੋਧੀ ਕਾਰਵਾਈਆਂ ਦੌਰਾਨ ਅਮਰੀਕੀ ਖੁਫੀਆ ਏਜੰਸੀਆਂ ਦੀ ਮਦਦ ਕਰਨ ਦਾ ਦਾਅਵਾ ਕਰਨ ਵਾਲੇ ਕੋਸੋਵੋ ਮੂਲ ਦੇ ਬਲੇਰਿਮ ਸਕੋਰੋ ਲਈ ਹੁਣ ਅਮਰੀਕਾ ਵਿੱਚ ਰਹਿਣਾ ਮੁਸ਼ਕਲ ਹੁੰਦਾ ਨਜ਼ਰ ਆ ਰਿਹਾ ਹੈ। 55 ਸਾਲਾ ਸਕੋਰੋ ਨੂੰ ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਇਨਫੋਰਸਮੈਂਟ (ICE) ਨੇ 3 ਅਗਸਤ 2026 ਨੂੰ ਨਿਊ ਜਰਸੀ ਦੇ ਇੱਕ ਇਮੀਗ੍ਰੇਸ਼ਨ ਦਫ਼ਤਰ ਦੇ ਬਾਹਰ ਹਿਰਾਸਤ ਵਿੱਚ ਲਿਆ ਸੀ। ਉਹ ਉੱਥੇ ਆਪਣੇ ਇਮੀਗ੍ਰੇਸ਼ਨ ਦਸਤਾਵੇਜ਼ਾਂ ਨਾਲ ਸਬੰਧਤ ਕਾਰਵਾਈ ਲਈ ਪਹੁੰਚਿਆ ਸੀ।
ਸਕੋਰੋ ਦੇ ਵਕੀਲਾਂ ਨੇ ਉਸ ਨੂੰ ਕੋਸੋਵੋ ਭੇਜੇ ਜਾਣ ਤੋਂ ਰੋਕਣ ਲਈ ਸੰਘੀ ਅਦਾਲਤ ਦਾ ਰੁਖ ਕੀਤਾ ਹੈ। ਵਕੀਲਾਂ ਦਾ ਕਹਿਣਾ ਹੈ ਕਿ ਸਕੋਰੋ ਨੇ ਅਮਰੀਕੀ ਖੁਫੀਆ ਏਜੰਸੀਆਂ ਲਈ ਸਾਲਾਂ ਤੱਕ ਮਹੱਤਵਪੂਰਨ ਕੰਮ ਕੀਤਾ ਅਤੇ ਉਸ ਨੂੰ ਅਮਰੀਕਾ ਵਿੱਚ ਰਹਿਣ ਦੀ ਇਜਾਜ਼ਤ ਮਿਲਣ ਦਾ ਭਰੋਸਾ ਦਿੱਤਾ ਗਿਆ ਸੀ।
ਰਿਪੋਰਟਾਂ ਮੁਤਾਬਕ ਸਕੋਰੋ ਨੇ 2000 ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੇ ਮਾਮਲੇ ਵਿੱਚ ਜੇਲ੍ਹ ਜਾਣ ਤੋਂ ਬਾਅਦ ਅਮਰੀਕੀ ਅਧਿਕਾਰੀਆਂ ਨਾਲ ਸਹਿਯੋਗ ਸ਼ੁਰੂ ਕੀਤਾ। ਬਾਅਦ ਵਿੱਚ ਉਸ ਨੇ ਕਥਿਤ ਤੌਰ ’ਤੇ ਅਲ-ਕਾਇਦਾ ਅਤੇ ਹੋਰ ਅੱਤਵਾਦੀ ਨੈੱਟਵਰਕਾਂ ਬਾਰੇ ਜਾਣਕਾਰੀ ਮੁਹੱਈਆ ਕਰਵਾਈ। ਉਸ ਦੇ ਵਕੀਲਾਂ ਦਾ ਦਾਅਵਾ ਹੈ ਕਿ ਉਸ ਦੇ ਸਹਿਯੋਗ ਨਾਲ ਅਲ-ਕਾਇਦਾ, ਅਲ-ਸ਼ਬਾਬ ਅਤੇ ਹਿਜ਼ਬੁੱਲਾ ਨਾਲ ਜੁੜੇ ਕੁਝ ਲੋਕਾਂ ਦੀ ਗ੍ਰਿਫ਼ਤਾਰੀ ਵਿੱਚ ਮਦਦ ਮਿਲੀ।
2022 ਵਿੱਚ ਇੱਕ ਸੰਘੀ ਜੱਜ ਨੇ ਉਸ ਨੂੰ ਕੋਸੋਵੋ ਭੇਜਣ ’ਤੇ ਰੋਕ ਲਗਾਈ ਸੀ, ਕਿਉਂਕਿ ਉੱਥੇ ਉਸ ਨੂੰ ਤਸ਼ੱਦਦ ਜਾਂ ਜਾਨ ਨੂੰ ਖ਼ਤਰਾ ਹੋਣ ਦਾ ਡਰ ਦੱਸਿਆ ਗਿਆ ਸੀ। ਹੁਣ ਉਸ ਦੇ ਵਕੀਲ ਮੁੜ ਅਦਾਲਤ ਰਾਹੀਂ ਦੇਸ਼ ਨਿਕਾਲੇ ਦੀ ਕਾਰਵਾਈ ਰੋਕਣ ਦੀ ਕੋਸ਼ਿਸ਼ ਕਰ ਰਹੇ ਹਨ।