ਡੇਟਿੰਗ ਐਪ ਦਾ ਸਿਆਪਾ! ਹਨੀਟ੍ਰੈਪ, ਜਬਰੀ ਵਸੂਲੀ ਤੇ ਲੁੱਟ-ਖੋਹ ਦੇ ਗਿਰੋਹ ਦਾ ਪਰਦਾਫਾਸ਼, ਚਾਰ ਮੁਲਜ਼ਮ ਗ੍ਰਿਫ਼ਤਾਰ
ਨਵੀਂ ਦਿੱਲੀ 16 ਨਵੰਬਰ 2026
ਦਿੱਲੀ ਪੁਲਿਸ ਨੇ ਦੱਖਣੀ-ਪੂਰਬੀ ਦਿੱਲੀ ਵਿੱਚ ਹਨੀਟ੍ਰੈਪ, ਜਬਰੀ ਵਸੂਲੀ ਅਤੇ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਇੱਕ ਕਥਿਤ ਗਿਰੋਹ ਦਾ ਪਰਦਾਫਾਸ਼ ਕਰਦਿਆਂ ਚਾਰ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਵਿੱਚ ਇੱਕ ਵਿਅਕਤੀ ਵੀ ਸ਼ਾਮਲ ਹੈ। ਪੁਲਿਸ ਦੀ ਜਾਂਚ ਦੌਰਾਨ 3.01 ਲੱਖ ਰੁਪਏ ਦੇ ਸ਼ੱਕੀ ਕ੍ਰੈਡਿਟ ਕਾਰਡ ਲੈਣ-ਦੇਣ ਦਾ ਵੀ ਪਤਾ ਲੱਗਿਆ ਹੈ। ਇਸ ਸਬੰਧੀ 30 ਅਕਤੂਬਰ 2026 ਨੂੰ ਸਰਿਤਾ ਵਿਹਾਰ ਥਾਣੇ ਵਿੱਚ ਮਾਮਲਾ ਦਰਜ ਕੀਤਾ ਗਿਆ ਸੀ।
ਪੁਲਿਸ ਅਨੁਸਾਰ, ਮਾਮਲੇ ਦਾ ਖ਼ੁਲਾਸਾ ਇੱਕ ਵਿਅਕਤੀ ਦੀ ਸ਼ਿਕਾਇਤ ਤੋਂ ਬਾਅਦ ਹੋਇਆ। ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਉਸ ਦੀ ਜਾਣ-ਪਛਾਣ ਡੇਟਿੰਗ ਐਪ ‘ਗ੍ਰਿੰਡਰ’ ਰਾਹੀਂ ਇੱਕ ਔਰਤ ਨਾਲ ਹੋਈ ਸੀ। ਮੁਲਾਕਾਤ ਤੈਅ ਹੋਣ ਤੋਂ ਬਾਅਦ ਉਹ ਤੁਗਲਕਾਬਾਦ ਇਲਾਕੇ ਦੇ ਇੱਕ ਹੋਟਲ ਵਿੱਚ ਪਹੁੰਚਿਆ। ਇਸ ਤੋਂ ਬਾਅਦ ਓਖਲਾ ਅੰਡਰਪਾਸ ਨੇੜੇ ਔਰਤ ਦੇ ਸਾਥੀਆਂ ਨੇ ਉਸ ਨੂੰ ਘੇਰ ਲਿਆ, ਕੁੱਟਮਾਰ ਕੀਤੀ ਅਤੇ ਧਮਕੀਆਂ ਦਿੱਤੀਆਂ।
ਮੁਲਜ਼ਮ ਕਥਿਤ ਤੌਰ ’ਤੇ ਉਸ ਨੂੰ ਗੌਤਮਪੁਰੀ ਦੀ ਮਸਜਿਦ ਕਲੋਨੀ ਸਥਿਤ ਇੱਕ ਕਿਰਾਏ ਦੇ ਮਕਾਨ ਵਿੱਚ ਲੈ ਗਏ, ਜਿੱਥੇ ਉਸ ਨੂੰ ਬੰਦੀ ਬਣਾ ਕੇ ਚਾਰ ਲੱਖ ਰੁਪਏ ਦੀ ਮੰਗ ਕੀਤੀ ਗਈ। ਇਹ ਰਕਮ ਸਮਝੌਤੇ ਅਤੇ ਤਲਾਕ ਦੇ ਖ਼ਰਚੇ ਦੇ ਨਾਂ ’ਤੇ ਮੰਗੀ ਗਈ ਸੀ। ਪੀੜਤ ਨੂੰ ਕਰਜ਼ਾ ਲੈਣ ਅਤੇ ਕ੍ਰੈਡਿਟ ਕਾਰਡ ਰਾਹੀਂ ਪੈਸਿਆਂ ਦਾ ਪ੍ਰਬੰਧ ਕਰਨ ਲਈ ਵੀ ਕਥਿਤ ਤੌਰ ’ਤੇ ਮਜਬੂਰ ਕੀਤਾ ਗਿਆ।





