ਰਾਮ ਮੰਦਿਰ ਚੜ੍ਹਾਵਾ ਚੋਰੀ ਮਾਮਲਾ; SIT ਦੀ ਚਾਰਜਸ਼ੀਟ ‘ਚ ਹੋਏ ਵੱਡੇ ਖੁਲਾਸੇ
ਅਯੁੱਧਿਆ ਰਾਮ ਮੰਦਰ ਚੜ੍ਹਾਵਾ ਮਾਮਲਾ: SIT ਦੀ ਕਰੀਬ 70 ਹਜ਼ਾਰ ਪੰਨਿਆਂ ਦੀ ਚਾਰਜਸ਼ੀਟ, CCTV ’ਚ 105 ਵਾਰ ਨਕਦੀ ਹਟਾਉਣ ਦੇ ਮਾਮਲੇ
ਅਯੁੱਧਿਆ 26 ਸਤੰਬਰ 2026
ਅਯੁੱਧਿਆ ਸਥਿਤ ਰਾਮ ਮੰਦਰ ਦੇ ਚੜ੍ਹਾਵੇ ਦੀ ਕਥਿਤ ਹੇਰਾਫੇਰੀ ਦੇ ਮਾਮਲੇ ਵਿੱਚ ਸੁਪਰੀਮ ਕੋਰਟ ਦੇ ਨਿਰਦੇਸ਼ਾਂ ਤਹਿਤ ਬਣਾਈ ਵਿਸ਼ੇਸ਼ ਜਾਂਚ ਟੀਮ (SIT) ਨੇ ਕਰੀਬ 70 ਹਜ਼ਾਰ ਪੰਨਿਆਂ ਦੀ ਚਾਰਜਸ਼ੀਟ ਦਾਖ਼ਲ ਕੀਤੀ ਹੈ। ਜਾਂਚ ਮੁਤਾਬਕ ਕਥਿਤ ਤੌਰ ’ਤੇ ਨਕਦੀ ਦੀ ਹੇਰਾਫੇਰੀ ਬੈਂਕ ਵਿੱਚ ਰਕਮ ਜਮ੍ਹਾਂ ਕਰਵਾਉਣ ਤੋਂ ਪਹਿਲਾਂ ਚੜ੍ਹਾਵੇ ਦੀ ਗਿਣਤੀ ਦੌਰਾਨ ਹੋਈ।
ਚਾਰਜਸ਼ੀਟ ਵਿੱਚ CCTV ਫੁਟੇਜ ਦੇ ਆਧਾਰ ’ਤੇ ਗਿਣਤੀ ਵਾਲੇ ਕਮਰੇ ਵਿੱਚੋਂ ਨਕਦੀ ਹਟਾਉਣ ਜਾਂ ਲੁਕਾਉਣ ਦੀਆਂ 105 ਘਟਨਾਵਾਂ ਦਾ ਜ਼ਿਕਰ ਕੀਤਾ ਗਿਆ ਹੈ। ਜਾਂਚ ਦੌਰਾਨ ਡਿਜੀਟਲ ਸੁਨੇਹਿਆਂ, ਬੈਂਕ ਰਿਕਾਰਡਾਂ, ਜਾਇਦਾਦ ਅਤੇ ਹੋਰ ਵਿੱਤੀ ਦਸਤਾਵੇਜ਼ਾਂ ਦੀ ਵੀ ਜਾਂਚ ਕੀਤੀ ਗਈ।
ਮਾਮਲੇ ਵਿੱਚ ਅਨੁਕਲਪ ਮਿਸ਼ਰਾ, ਅਵਿਨਾਸ਼ ਸ਼ੁਕਲਾ ਉਰਫ਼ ਸ਼ਾਨੀ, ਲਵਕੁਸ਼ ਮਿਸ਼ਰਾ, ਮਨੀਸ਼ ਕੁਮਾਰ ਯਾਦਵ, ਕਰੁਨੇਸ਼ ਪਾਂਡੇ, ਰਾਮਸ਼ੰਕਰ ਮਿਸ਼ਰਾ, ਰਾਮ ਸ਼ੰਕਰ ਯਾਦਵ ਉਰਫ਼ ਟੀਨੂ ਅਤੇ ਸੁਭਾਸ਼ ਸ੍ਰੀਵਾਸਤਵ ਨੂੰ ਮੁਲਜ਼ਮ ਬਣਾਇਆ ਗਿਆ ਹੈ। ਪੁਲਿਸ ਨੇ ਅਨੁਕਲਪ ਮਿਸ਼ਰਾ ਨੂੰ ਕਥਿਤ ਸਾਜ਼ਿਸ਼ ਦਾ ਮੁੱਖ ਮੁਲਜ਼ਮ ਦੱਸਿਆ ਹੈ।
SIT ਮੁਤਾਬਕ ਜਾਂਚ ਦੌਰਾਨ ਸੱਤ ਮੁਲਜ਼ਮਾਂ ਕੋਲੋਂ ਕਥਿਤ ਤੌਰ ’ਤੇ 79.85 ਲੱਖ ਰੁਪਏ ਬਰਾਮਦ ਕੀਤੇ ਗਏ। ਜਾਂਚ ਵਿੱਚ ਮੰਦਰ ਨੂੰ ਦਾਨ ਕੀਤੀਆਂ 803 ਕੀਮਤੀ ਵਸਤਾਂ ਦੀ ਵੀ ਜਾਂਚ ਕੀਤੀ ਗਈ ਅਤੇ ਇਨ੍ਹਾਂ ਦੇ ਰਿਕਾਰਡ ਵਿੱਚ ਕੋਈ ਗੜਬੜ ਨਹੀਂ ਮਿਲੀ।
