- ਵਿਦੇਸ਼ਾਂ ਤੋਂ ਡਾਕ ਪਾਰਸਲ ਰਾਹੀਂ ਨਸ਼ਾ ਮੰਗਵਾਉਣ ਵਾਲੇ ਨੂੰ 10 ਸਾਲ ਦੀ ਕੈਦ
ਚੰਡੀਗੜ੍ਹ, 4 ਅਕਤੂਬਰ (ਦੇਸ਼ ਕਲਿੱਕ ਬਿਊਰੋ): ਵਿਦੇਸ਼ਾਂ ਤੋਂ ਅੰਤਰਰਾਸ਼ਟਰੀ ਡਾਕ ਪਾਰਸਲਾਂ ਰਾਹੀਂ ਨਸ਼ੀਲੇ ਪਦਾਰਥ ਮੰਗਵਾਉਣ ਦੇ ਮਾਮਲੇ ਵਿੱਚ ਸੋਲਨ ਦੇ ਰਹਿਣ ਵਾਲੇ ਪੰਕਜ ਸ਼ਰਮਾ ਨੂੰ 10 ਸਾਲ ਦੀ ਸਖ਼ਤ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਵਿਸ਼ੇਸ਼ ਜੱਜ-2, ਸੋਲਨ ਦੀ ਅਦਾਲਤ ਨੇ 3 ਅਕਤੂਬਰ 2026 ਨੂੰ ਉਸ ਨੂੰ ਦੋਸ਼ੀ ਕਰਾਰ ਦਿੰਦਿਆਂ 1 ਲੱਖ ਰੁਪਏ ਜੁਰਮਾਨਾ ਵੀ ਲਗਾਇਆ। ਉਸ ਨੂੰ ਐਨਡੀਪੀਐਸ ਐਕਟ ਦੀ ਧਾਰਾ 22(ਸੀ) ਤਹਿਤ ਦੋਸ਼ੀ ਠਹਿਰਾਇਆ ਗਿਆ ਹੈ। ਇਹ ਕਾਰਵਾਈ ਨਾਰਕੋਟਿਕਸ ਕੰਟਰੋਲ ਬਿਊਰੋ (NCB) ਦੀ ਚੰਡੀਗੜ੍ਹ ਜ਼ੋਨਲ ਯੂਨਿਟ ਵੱਲੋਂ ਕੀਤੀ ਗਈ ਸੀ।
ਬ੍ਰਿਟੇਨ ਤੋਂ ਆਏ ਪਾਰਸਲ ’ਚੋਂ ਮਿਲੀ ਕੋਕੀਨ
ਮਾਮਲਾ 4 ਜੁਲਾਈ 2023 ਦਾ ਹੈ। NCB ਨੂੰ ਸੂਚਨਾ ਮਿਲੀ ਸੀ ਕਿ ਬ੍ਰਿਟੇਨ ਤੋਂ ਆਉਣ ਵਾਲੇ ਇੱਕ ਅੰਤਰਰਾਸ਼ਟਰੀ ਡਾਕ ਪਾਰਸਲ ਵਿੱਚ ਨਸ਼ੀਲੇ ਪਦਾਰਥ ਹੋ ਸਕਦੇ ਹਨ। ਇਸ ਤੋਂ ਬਾਅਦ ਅਦਾਲਤ ਦੀ ਮਨਜ਼ੂਰੀ ਨਾਲ ਨਿਗਰਾਨੀ ਹੇਠ ਪਾਰਸਲ ਦੀ ਡਿਲਿਵਰੀ ਕਰਵਾਈ ਗਈ। ਜਦੋਂ ਪੰਕਜ ਸ਼ਰਮਾ ਸੋਲਨ ਦੇ ਮੁੱਖ ਡਾਕਘਰ ਵਿੱਚ ਪਾਰਸਲ ਲੈਣ ਪਹੁੰਚਿਆ ਤਾਂ NCB ਦੀ ਟੀਮ ਨੇ ਉਸ ਨੂੰ ਕਾਬੂ ਕਰ ਲਿਆ। ਪਾਰਸਲ ਦੀ ਜਾਂਚ ਦੌਰਾਨ 4.7 ਗ੍ਰਾਮ ਕੋਕੀਨ ਬਰਾਮਦ ਹੋਈ।
ਫਰਾਂਸ ਅਤੇ ਜਰਮਨੀ ਤੋਂ ਵੀ ਮੰਗਵਾਇਆ ਸੀ ਨਸ਼ਾ
ਜਾਂਚ ਦੌਰਾਨ ਪੰਕਜ ਸ਼ਰਮਾ ਦੇ ਨਾਮ ’ਤੇ ਫਰਾਂਸ ਤੋਂ ਆਇਆ ਇੱਕ ਹੋਰ ਪਾਰਸਲ ਮਿਲਿਆ, ਜਿਸ ਵਿੱਚੋਂ 56.2 ਗ੍ਰਾਮ MDMA ਬਰਾਮਦ ਹੋਈ। ਇਹ ਮਾਤਰਾ MDMA ਦੀ ਨਿਰਧਾਰਤ ਵਪਾਰਕ ਮਾਤਰਾ 10 ਗ੍ਰਾਮ ਤੋਂ ਪੰਜ ਗੁਣਾ ਤੋਂ ਵੀ ਵੱਧ ਸੀ। ਇਸ ਤੋਂ ਇਲਾਵਾ ਜਰਮਨੀ ਤੋਂ ਆਏ ਇੱਕ ਤੀਜੇ ਪਾਰਸਲ ਵਿੱਚੋਂ 4.4 ਗ੍ਰਾਮ ਕੋਕੀਨ ਮਿਲੀ। NCB ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਮੁਲਜ਼ਮ ਬ੍ਰਿਟੇਨ, ਫਰਾਂਸ ਅਤੇ ਜਰਮਨੀ ਤੋਂ ਅੰਤਰਰਾਸ਼ਟਰੀ ਡਾਕ ਸੇਵਾ ਰਾਹੀਂ ਨਸ਼ੀਲੇ ਪਦਾਰਥ ਮੰਗਵਾ ਰਿਹਾ ਸੀ।
ਅਦਾਲਤ ਵਿੱਚ ਪੇਸ਼ ਕੀਤੇ ਅਹਿਮ ਸਬੂਤ
ਸੁਣਵਾਈ ਦੌਰਾਨ ਇਸਤਗਾਸਾ ਪੱਖ ਨੇ ਡਾਕ ਕਰਮਚਾਰੀਆਂ ਦੀਆਂ ਗਵਾਹੀਆਂ, ਪਾਰਸਲਾਂ ਦੀ ਡਿਲਿਵਰੀ ਨਾਲ ਸਬੰਧਤ ਦਸਤਾਵੇਜ਼, ਪਛਾਣ ਰਿਕਾਰਡ, ਜ਼ਬਤੀ ਕਾਰਵਾਈ ਦੇ ਵੇਰਵੇ, ਮਾਲਖਾਨੇ ਦੇ ਰਿਕਾਰਡ ਅਤੇ ਵਿਗਿਆਨਕ ਜਾਂਚ ਰਿਪੋਰਟਾਂ ਪੇਸ਼ ਕੀਤੀਆਂ। ਇਨ੍ਹਾਂ ਸਬੂਤਾਂ ਦੇ ਆਧਾਰ ’ਤੇ ਅਦਾਲਤ ਨੇ ਪੰਕਜ ਸ਼ਰਮਾ ਨੂੰ ਦੋਸ਼ੀ ਕਰਾਰ ਦਿੱਤਾ। ਉਸ ਵਿਰੁੱਧ 19 ਦਸੰਬਰ 2023 ਨੂੰ ਸੋਲਨ ਦੀ ਵਿਸ਼ੇਸ਼ ਅਦਾਲਤ ਵਿੱਚ ਐਨਡੀਪੀਐਸ ਐਕਟ ਤਹਿਤ ਸ਼ਿਕਾਇਤ ਦਾਇਰ ਕੀਤੀ ਗਈ ਸੀ।
NCB ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਨਸ਼ਾ ਤਸਕਰੀ ਜਾਂ ਇਸ ਨਾਲ ਜੁੜੀ ਕਿਸੇ ਵੀ ਜਾਣਕਾਰੀ ਲਈ ਮਾਨਸ ਰਾਸ਼ਟਰੀ ਨਾਰਕੋਟਿਕਸ ਹੈਲਪਲਾਈਨ 1933 ’ਤੇ ਸੂਚਨਾ ਦੇਣ। ਵਿਭਾਗ ਮੁਤਾਬਕ ਸੂਚਨਾ ਦੇਣ ਵਾਲੇ ਦੀ ਪਛਾਣ ਗੁਪਤ ਰੱਖੀ ਜਾਵੇਗੀ।
