ਸੰਗਰੂਰ, 28 ਅਪ੍ਰੈਲ, ਦੇਸ਼ ਕਲਿਕ ਬਿਊਰੋ :
ਸੰਗਰੂਰ ਵਿਖੇ ਇੱਕ ਵਿਅਕਤੀ ਨੇ ਛੋਲੇ ਭਟੂਰੇ ਦੀ ਥਾਲੀ ਦੇ ਰੇਟ ਵਧਣ ਸਬੰਧੀ ਡੀਸੀ ਨੂੰ ਸ਼ਿਕਾਇਤ ਕੀਤੀ। ਵਿਅਕਤੀ ਦਾ ਦੋਸ਼ ਹੈ ਕਿ ਪਹਿਲਾਂ ਇਸ ਪਲੇਟ ਦੀ ਕੀਮਤ 20 ਰੁਪਏ ਸੀ। ਰੇਹੜੀ ਵਾਲੇ ਨੇ ਪਲੇਟ ਦਾ ਰੇਟ 10 ਵਧਾ ਕੇ 30 ਰੁਪਏ ਕਰ ਦਿੱਤਾ। ਹੁਣ ਉਸ ਨੇ ਰੇਟ 40 ਰੁਪਏ ਰੱਖਿਆ ਹੈ। ਵਿਅਕਤੀ ਨੇ ਵੱਧ ਵਸੂਲੀ ਦਾ ਦੋਸ਼ ਲਾਉਂਦਿਆਂ ਕਾਰਵਾਈ ਦੀ ਮੰਗ ਕੀਤੀ ਹੈ। 2 ਹਫਤਿਆਂ ਬਾਅਦ ਡੀਸੀ ਜਤਿੰਦਰ ਜੋਰਵਾਲ ਨੇ ਐਸਡੀਐਮ ਨੂੰ ਜਾਂਚ ਕਰਨ ਲਈ ਕਿਹਾ ਹੈ।
ਸ਼ਿਕਾਇਤ ਕਰਤਾ ਬਿੰਦਰ ਸਿੰਘ ਨੇ ਦੱਸਿਆ ਕਿ ਉਹ 16 ਅਪਰੈਲ ਨੂੰ ਕੰਮ ’ਤੇ ਗਿਆ ਸੀ। ਗਰਮੀ ਕਾਰਨ ਉਸ ਦੀ ਦਾਲ ਖਰਾਬ ਹੋ ਗਈ। ਇਸ ਲਈ ਉਹ ਸੰਗਰੂਰ ਦੇ ਕੋਲਾ ਪਾਰਕ ਦੇ ਪਿੱਛੇ ਸਥਿਤ ਛੋਲੇ ਭਟੂਰੇ ਦੀ ਦੁਕਾਨ 'ਤੇ ਗਿਆ। ਭਟੂਰੇ ਖਾਣ ਤੋਂ ਬਾਅਦ ਰੇਹੜੀ ਵਾਲੇ ਨੇ ਉਸ ਕੋਲੋਂ 40 ਰੁਪਏ ਮੰਗੇ। ਉਸ ਦੀ ਜੇਬ ਵਿੱਚ ਸਿਰਫ਼ 50 ਰੁਪਏ ਸਨ।
ਇਸ ਤੋਂ ਪਹਿਲਾਂ ਉਸਨੇ ਇੱਥੇ ਭਟੂਰੇ ਖਾਧੇ ਸਨ।ਉਦੋਂ ਰੇਹੜੀ ਵਾਲੇ ਨੇ 30 ਰੁਪਏ ਲਏ ਸਨ। ਪਹਿਲਾਂ ਪਲੇਟ ਦਾ ਰੇਟ 20 ਰੁਪਏ ਸੀ।ਉਕਤ ਵਿਅਕਤੀ ਨੇ ਕਿਹਾ ਕਿ ਦੁਕਾਨਦਾਰ ਮਨਮਾਨੇ ਢੰਗ ਨਾਲ ਕੀਮਤ ਵਧਾ ਰਿਹਾ ਹੈ। ਇਹ ਗਰੀਬਾਂ ਦੀਆਂ ਜੇਬਾਂ 'ਤੇ ਡਾਕਾ ਹੈ।
ਐਸਡੀਐਮ ਚਰਨਜੋਤ ਸਿੰਘ ਵਾਲੀਆ ਨੇ ਦੱਸਿਆ ਕਿ ਉਕਤ ਵਿਅਕਤੀ ਨੇ ਭਟੂਰੇ ਦੀ ਰੇਹੜੀ ਵਾਲੇ ਖ਼ਿਲਾਫ਼ ਡੀਸੀ ਨੂੰ ਸ਼ਿਕਾਇਤ ਦਿੱਤੀ ਸੀ। ਉਸ ਨੂੰ ਡੀ.ਸੀ.ਸਾਹਿਬ ਨੇ ਮਾਰਕ ਕਰ ਕੇ ਉਨ੍ਹਾਂ ਕੋਲ ਪਹੁੰਚਾਇਆ ਹੈ। ਉਕਤ ਵਿਅਕਤੀ ਨੇ ਦੋਸ਼ ਲਾਇਆ ਕਿ ਭਟੂਰਾ ਵੇਚਣ ਵਾਲੇ ਨੇ ਜ਼ਿਆਦਾ ਪੈਸੇ ਲਏ ਹਨ। ਉਹ ਜਾਂਚ ਕਰ ਰਹੇ ਹਨ।