ਨਵੀਂ ਦਿੱਲੀ, 17 ਅਪ੍ਰੈਲ, ਦੇਸ਼ ਕਲਿੱਕ ਬਿਓਰੋ :
ਉਤਰ-ਪੂਰਵੀ ਦਿੱਲੀ ਵਿੱਚ ਦੋਹਰਾ ਕਤਲ ਕੀਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਬੀਤੇ ਕੱਲ੍ਹ ਇਕ ਨੌਜਵਾਨ ਨੇ ਆਪਣੇ ਪਿਤਾ ਨਾਲ ਰਲਕੇ ਆਪਣੀ ਭੈਣ ਅਤੇ ਚਾਚੇ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਕਤਲ ਕੀਤੇ ਜਾਣ ਤੋਂ ਬਾਅਦ ਖੁਦ ਹੀ ਪੁਲਿਸ ਨੂੰ ਫੋਨ ਕਰਕੇ ਜਾਣਕਾਰੀ ਦਿੱਤੀ।ਭਜਨਪੁਰਾ ਥਾਣਾ ਪੁਲਿਸ ਨੇ ਮੌਕੇ ਉਤੇ ਪਹੁੰਚਕੇ 20 ਸਾਲਾ ਕੁਦੁਸ਼ ਅਤੇ 46 ਸਾਲਾ ਮੁਹੰਮਦ ਸ਼ਾਹਿਤ ਨੂੰ ਗ੍ਰਿਫਤਾਰ ਕਰ ਲਿਆ।
ਪੁਲਿਸ ਨੇ ਦੱਸਿਆ ਕਿ 35 ਸਾਲਾ ਦਾਨਿਸ਼ ਪਰਿਵਾਰ ਨਾਲ ਕੈਲਾਸ਼ ਨਗਰ ਰਹਿੰਦਾ ਸੀ ਅਤੇ ਫਲ ਵੇਚਣ ਦਾ ਕੰਮ ਕਰਦਾ ਸੀ। ਉਸਦਾ ਪਰਿਵਾਰ ਮੂਲ ਰੂਪ ਵਿੱਚ ਉਪਰੀ ਕੋਟ ਯੂਪੀ ਦਾ ਰਹਿਣ ਵਾਲਾ ਹੈ। 22 ਸਾਲਾ ਸ਼ਾਅਨਾ (ਕਾਲਪਨਿਕ ਨਾਂ)ਪਰਿਵਾਰ ਨਾਲ ਘੋਂੜਾ ਵਿਖੇ ਕਿਰਾਏ ਦੇ ਮਕਾਨ ਵਿੱਚ ਰਹਿੰਦੀ ਸੀ। ਸ਼ਾਅਨਾ ਦੇ ਪਰਿਵਾਰ ਵਿੱਚ ਮਾਤਾ-ਪਿਤਾ ਤੋਂ ਇਲਾਵਾ 7 ਹੋਰ ਭੈਣ-ਭਰਾ ਹਨ।
ਪੁਲਿਸ ਅਨੁਸਾਰ ਬੀਤੇ ਕੱਲ੍ਹ ਸ਼ਾਮ ਨੂੰ ਇਕ ਕਾਲ ਆਈ ਕਿ ਕਾਲ ਕਰਨ ਵਾਲੇ ਨੇ ਆਪਣੇ ਚਾਚੇ ਅਤੇ ਭੈਣ ਦਾ ਕਤਲ ਕਰ ਦਿੱਤਾ ਹੈ। ਕੁਦੁਸ਼ ਅਤੇ ਸ਼ਾਹਿਦ ਨੇ ਫਲ ਕੱਟਣ ਵਾਲੇ ਚਾਕੂ ਨਾਲ ਦਾਨਿਸ਼ ਦਾ ਗਲ ਕੱਟ ਦਿੱਤਾ। ਇਸ ਦੌਰਾਨ ਸ਼ਾਅਨਾ ਉਸਨੂੰ ਬਚਾਉਣ ਆਈ ਤਾਂ ਮੁਲਜਮਾਂ ਨੇ ਉਸ ਦੇ ਹੱਥ ਪੈਣ ਬੰਨ੍ਹ ਦਿੱਤੇ। ਸ਼ਾਇਨਾ ਰੌਲਾ ਪਾਉਣ ਲੱਗੀ ਤਾਂ ਉਨ੍ਹਾਂ ਉਸਦਾ ਵੀ ਗਲ ਵਢ ਦਿੱਤਾ। ਇਸ ਤੋਂ ਬਾਅਦ ਪਿਤਾ ਅਤੇ ਪੁੱਤ ਨੇ ਪੁਲਿਸ ਨੂੰ ਫੋਨ ਕਰਕੇ ਘਟਨਾ ਦੀ ਜਾਣਕਾਰੀ ਦਿੱਤੀ।ਮਿਲੀ ਜਾਣਕਾਰੀ ਅਨੁਸਾਰ ਮੁਲਜਮਾਂ ਨੇ ਦੋਵਾਂ ਦਾ ਕਤਲ ਇਸ ਕਰਕੇ ਕੀਤਾ ਕਿ ਉਨ੍ਹਾਂ ਨੂੰ ਸ਼ੱਕ ਸੀ ਕਿ ਮ੍ਰਿਤਕਾਂ ‘ਚ ਨਜਾਇਜ਼ ਸੰਬੰਧ ਸਨ।